ପୁରୀ: ଆଜିଠୁ ଖୋଲିଲା ବିଶ୍ବ ପ୍ରସିଦ୍ଧ କୋଣାର୍କ ମନ୍ଦିର । କୋରୋନା ମହାମାରୀ ଯୋଗୁଁ 5 ମାସ ଧରି ପର୍ଯ୍ୟଟକଙ୍କ ପାଇଁ ବନ୍ଦ ରହିଥିଲା ମନ୍ଦିର । କେନ୍ଦ୍ର ସରକାରଙ୍କ ଅନଲକ-4 ଗାଇଡଲାଇନ ଅନୁସାରେ ମନ୍ଦିର ଖୋଲିବା ପାଇଁ ନିଷ୍ପତ୍ତି ନିଆଯାଇଛି । ଭାରତୀୟ ପ୍ରତ୍ନତାତ୍ତ୍ବିକ ସର୍ବେକ୍ଷଣ କର୍ତ୍ତୃପକ୍ଷଙ୍କ ସହ ରାଜ୍ୟ ସରକାର ଆଲୋଚନା କରିବା ପରେ ମଙ୍ଗଳବାର ମନ୍ଦିର ଖୋଲିବା ନେଇ ସ୍ବୀକୃତି ଦେଇଛନ୍ତି ।
ତେବେ ବର୍ତ୍ତମାନ ପର୍ଯ୍ୟଟକଙ୍କ ପାଇଁ ଏଠାରେ ରହିବ ବିଭିନ୍ନ କଟକଣା । ପ୍ରବେଶ ପଥରେ ପର୍ଯ୍ୟଟକଙ୍କର କରାଯିବ ଥର୍ମାଲ ସ୍କ୍ରିନିଂ । ବର୍ତ୍ତମାନ ଅଫଲାଇନ ଟିକେଟ ବଦଳରେ ମନ୍ଦିର ବାହାରେ ଥିବା ସାଇନ ବୋର୍ଡରେ ଲାଗିଥିବା କ୍ୟୁଆର କୋଡକୁ ସ୍କାନ କରି ଟିକେଟ ନେବେ ପର୍ଯ୍ୟଟକ । ଅନଲାଇନ ପେମେଣ୍ଟ ମଧ୍ୟ କରି ପାରିବେ ଟିକେଟ ।
ଭିଡ଼ ନିୟନ୍ତ୍ରଣ ପାଇଁ କଡାକଡି ବ୍ୟବସ୍ଥା ହୋଇଛି । ଦିନକୁ କେବଳ 4500 ପର୍ଯ୍ୟଟକଙ୍କୁ ମିଳିବ ଅନୁମତି । ଟ୍ରାଫିକ ନିୟନ୍ତ୍ରଣ ପାଇଁ ଦିନର ପ୍ରଥମାର୍ଦ୍ଧରେ 2500 ଓ ଦ୍ବିତୀୟାର୍ଦ୍ଧରେ 2000 ପର୍ଯ୍ୟଟକଙ୍କୁ ଛଡାଯିବ । ସେପଟେ ମନ୍ଦିର ଖୋଲିବା ପରେ କୋଣାର୍କ ମନ୍ଦିର ପରିସରରେ ଥିବା ବ୍ୟବସାୟୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । ଦୀର୍ଘ 5 ମାସ ଜୀବିକା ହରାଇଥିବା ବ୍ୟବସାୟୀ ଭଲ ବ୍ୟବସାୟ ସହ ସ୍ବାଭାବିକ ଅବସ୍ଥାକୁ ଫେରିବା ନେଇ ଆଶା ରଖିଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
