ପୁରୀ: ଖାଉଟି ସାମଗ୍ରୀ ବଣ୍ଟନରେ ପ୍ରଶାସନର ମନମୁଖୀ କାର୍ଯ୍ୟ । କୋରୋନା ମହାମାରୀ ପାଇଁ କେନ୍ଦ୍ର ସରକାରଙ୍କ ପକ୍ଷରୁ ଦିଆଯାଇଥିବା ଖାଉଟି ସାମଗ୍ରୀରେ ଅନିୟମିତତାକୁ ବିରୋଧ କରିଛି ଭାରତୀୟ ଜନତା ପାର୍ଟି । ଏନେଇ ପୁରୀ ଜିଲ୍ଲା ଗୋପ ବ୍ଲକ ସମ୍ମୁଖରେ ଧାରଣା ଦେଇଛି ବିଜେପି ।
ଦୀର୍ଘ ଚାରିମାସ ହେବ ପୁରୀର ଗୋରଡା ଓ ଡଭାର ପଞ୍ଚାୟତର 650 ଜଣ ହିତାଧିକାରୀ ଖାଉଟି ସାମଗ୍ରୀ ପାଇବାରୁ ବଞ୍ଚିତ ହୋଇଛନ୍ତି । ଖାଉଟି ସାମଗ୍ରୀ ନ ମିଳିବାରୁ ପଞ୍ଚାୟତ ଲୋକ ବାରମ୍ବାର ଏମଆଇ,ବିଡିଓ ଓ ଜିଲ୍ଲା ପ୍ରଶାସନଙ୍କୁ ଭେଟିବା ପରେ ବି କିଛି ସୁଫଳ ମିଳି ନଥିଲା । ଗାଁର ସ୍ତ୍ରୀ ଲୋକମାନେ ବାରମ୍ବାର ଲିଖିତ ଅଭିଯୋଗ ବି କରିଛନ୍ତି ହେଲେ ଜିଲ୍ଲା ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନାହିଁ ।
ମାସିକିଆ ଖାଉଟି ସାମଗ୍ରୀ ବଣ୍ଟନରେ ଅନିୟମିତତାକୁ ନିନ୍ଦା କରିଛି ରାଜ୍ୟ ବିଜେପି । ଘଟଣା ନେଇ ବିଜେଡିକୁ ସିଧାସଳଖ ଟାର୍ଗେଟ କରିଛି ବିଜେପି । ଖାଉଟି ସାମଗ୍ରୀ ବଣ୍ଟନରେ ହେରଫେରକୁ ନେଇ ସଂପୁକ୍ତ ଡିଲରଙ୍କୁ ଏହି ଦାୟିତ୍ଵରୁ ଅପସାରଣ କରିବାକୁ ଦାବୀ କରି ଧାରଣ ଦେଇଛି ବିଜେପି ।
ଘଟଣାରେ ଗୋପ ବ୍ଲକର ବିଡିଓଙ୍କୁ କଡା ସମାଲୋଚନା କରିଛନ୍ତି ରାଜ୍ୟ ବିଜେପି ଉପ ସଭାପତି ପ୍ରଭାତୀ ପରିଡା । ଲୋକଙ୍କୁ ଖାଉଟି ସାମଗ୍ରୀ ଦେବାରେ ହେରଫେର କରୁଥିବା କର୍ମଚାରୀଙ୍କ ପ୍ରତି ବିଡ଼ିଓ ଦୃଢ଼ କାର୍ଯ୍ୟାନୁଷ୍ଠାନ ନ ନେଲେ ଆଗକୁ ଆନ୍ଦୋଳନ ତୀବ୍ର ହେବ ବୋଲି କିହିଛି ବିଜେପି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଈଟିଭି ଭାରତ
