ପୁରୀ: ଶ୍ରୀମନ୍ଦିର ଭିତରର ଫଟୋ ପୁଣି ଭାଇରାଲ ହୋଇଛି । ମା ଲକ୍ଷ୍ମୀଙ୍କ ମନ୍ଦିର ଭିତର ଜଗମୋହନରେ ମହାପ୍ରଭୁଙ୍କ ପଇତା ତିଆରି ସମୟର ଫଟୋ ଭାଇରାଲ ହୋଇଛି । ଜଣେ ପାଟରା ସେବାୟତ ଅଶୋକ ପାତ୍ର ସେଠାରେ ଏହି ସେଲ୍ଫି ଉଠାଇଥିବା ଦେଖିବାକୁ ମିଳୁଛି । ତେବେ ଏହି ଫଟୋ ଭାଇରାଲ ହେବା ପରେ ପାଟରା ନିଯୋଗ ସେବାୟତ ପାତ୍ରଙ୍କୁ ନିଲମ୍ବନ କରିଛନ୍ତି।
ସୁରକ୍ଷା ଦୃଷ୍ଟିକୋଣରୁ ଶ୍ରୀମନ୍ଦିର ପ୍ରଶାସନ ଶ୍ରୀମନ୍ଦିର ଭିତରେ ଫଟୋ ଉଠାଇବା ପାଇଁ କଟକଣା ଜାରି କରିଛନ୍ତି । ଏଥିପାଇଁ ଶ୍ରୀମନ୍ଦିରରେ ମୋବାଇଲ ବ୍ୟବହାରକୁ ମଧ୍ୟ ନିଷେଧ କରାଯାଇଛି । ଏହା ପରେ ମଧ୍ୟ ଅନେକ ସମୟରେ ଶ୍ରୀମନ୍ଦିର ଭିତର ଫଟୋ ଭାଇରାଲ ହେଉଛି । ପୂର୍ବରୁ ପୋଲିସ କର୍ମଚାରୀ ଓ ସେବାୟତମାନେ ନିୟମ ଉଲଙ୍ଘନ କରି ଭିତରେ ଫଟୋ ଉଠାଇଥିବା ଅନେକ ନଜିର ରହିଛି ।
ଏଥିପାଇଁ ଶ୍ରୀମନ୍ଦିରର ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ସମସ୍ତଙ୍କ ପାଇଁ ଆଇନ ସମାନ ହୋଇଥିବାବେଳେ ସେବାୟତମାନେ ଏହାକୁ ପାଳନ କରୁ ନ ଥିବା ଦେଖାଯାଉଛି । ତେଣୁ ଦ୍ବାର ନିକଟରେ ମୋବାଇଲ ଯାଞ୍ଚକୁ କଡାକଡି କରିବାକୁ ଦାବି ହେଉଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
