ପୁରୀ: ଶ୍ରୀକୃଷ୍ଣଙ୍କ ଜନ୍ମୋତ୍ସବରେ ପ୍ରସିଦ୍ଧ ଅଲାରନାଥ ମନ୍ଦିରରେ ଲାଗିଛି ଉତ୍ସବର ମାହୋଲ । ଏହି ଅବସରରେ ମନ୍ଦିରରେ ପ୍ରସ୍ତୁତ ହୋଇଛି ସ୍ବତନ୍ତ୍ର ନଡିଆ କୋରା । ପ୍ରତିବର୍ଷ ପରି ଏବର୍ଷ ମଧ୍ୟ ଏଠାରେ ବେଶ୍ ଆଡମ୍ବରରେ ପାଳନ ହେଉଛି ପବିତ୍ର ଜନ୍ମାଷ୍ଟମୀ ଉତ୍ସବ ।
ଭୋରୁ ଭୋରୁ ଦୁଆର ଫିଟା ଯାଇ ପ୍ରତିଦିନର ନୀତି ସରିବା ପରେ ମନ୍ଦିରରେ ସର୍ବ ସାଧାରଣ ଦର୍ଶନ କରିଥିଲେ । ଏହାପରେ ଭୋଗ ଲାଗି କରାଯାଇଥିଲା । ତେବେ ସନ୍ଧ୍ୟା ଧୂପ ପରେ ଜନ୍ମାଷ୍ଟମୀ ନୀତି ଆରମ୍ଭ କରାଯିବ । ଏନେଇ ଭିତର ମନ୍ଦିର ଓ ବାହାର ମନ୍ଦିର ଶୁଦ୍ଧ କରାଯାଇ ଆବଶ୍ୟକ ପାଳିଆ ସେବକଙ୍କ ବ୍ୟତୀତ ଅନ୍ୟମାନଙ୍କୁ ମନ୍ଦିରରୁ ବାହାର କରାଯିବ । ପରେ ପରେ ସମସ୍ତ ଆଲୋକକୁ ଲିଭାଯାଇ ମନ୍ଦିରକୁ ସମ୍ପୂର୍ଣ୍ଣ ଅନ୍ଧକାରମୟ କରାଯିବ ।
ଏହି ସମୟରେ ମଝି ମନ୍ଦିରରେ ମୂରୁଜରେ ମଣ୍ଡଳୀ କଟା ଯାଇ ଜାତ କର୍ମ ଆରମ୍ଭ ହେବ । ସମାନ ଭାବେ ମନ୍ଦିର ମଧ୍ୟରେ ଥିବା ଏକ ପୁରାତନ ତାଳପତ୍ର ପୋଥିକୁ ପଢାଯାଇ ଶ୍ରୀକୃଷ୍ଣଙ୍କ ଜନ୍ମ ନୀତିକୁ ସମ୍ପର୍ଣ୍ଣ କରାଯିବ । ସେହି ସମୟରେ ଜଣେ ପାଳିଆ ସେବକ ଉଗ୍ରସେନ ବେଶରେ ବାହାରେ ‘ହୁସିଆର ସାବଧାନ’ର ଡାକରା ଦେବା ସହ ପ୍ରହରା ଦେବେ ।
ଅନ୍ୟ ଜଣେ ସେବକ ବାସୁଦେବ ବେଶ ହୋଇ ଜନ୍ମିତ କୃଷ୍ଣଙ୍କୁ ଏକ ସ୍ବର୍ଣ୍ଣ ପତ୍ରରେ ମୁଣ୍ଡାଇ ଯମୁନା ନଦୀ ପାର ହେବେ । ଏହିପରି ନୀତିକାନ୍ତି ସରିବା ପରେ କୃଷ୍ଣଙ୍କ ପାଖରେ କ୍ଷୀର, ଲବଣି ଓ ସ୍ବତନ୍ତ୍ର ଭାବେ ପ୍ରସ୍ତୁତ କରାଯାଇଥିବା 300 ନଡିଆର କୋରାକୁ ଅର୍ପଣ କରାଯିବ ।
ବ୍ରହ୍ମଗିରିରୁ ଦେବାଶିଷ ଦାସ, ଇଟିଭି ଭାରତ
