ପୁରୀ : ପୁରୀ ଗସ୍ତରେ ଆସି ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରି ଆଶିଷ ଲାଭ କଲେ ଭାରତର ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ। ଶ୍ରୀମନ୍ଦିର ଉତ୍ତରଦ୍ୱାର ଦେଇ ରାମନାଥ କୋବିନ୍ଦ, ତାଙ୍କ ପତ୍ନୀ ଓ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିଛନ୍ତି । ମହାପ୍ରଭୁଙ୍କୁ ଭିତର କାଠ ନିକଟରୁ ଦର୍ଶନ କରି ନିଜକୁ ବେଶ୍ ଭାଗ୍ୟବାନ ମନେ କରିଛନ୍ତି ପୂର୍ବତନ ରାଷ୍ଟ୍ରପତି । ତେବେ ଉତ୍ତରଦ୍ୱାର ଠାରେ ପହଞ୍ଚିବା ପରେ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଶ୍ରୀମନ୍ଦିର ପ୍ରଶାସନ ଓ ସେବାୟତଙ୍କ ପକ୍ଷରୁ ଖଣ୍ଡୁଆ ପ୍ରଦାନ କରି ସ୍ୱାଗତ କରାଯାଇଥିଲା। ଶ୍ରୀମନ୍ଦିର ଭିତରେ ୧୦ ମିନିଟ ଅତିବାହିତ କରିଥିଲେ ରାମନାଥ କୋବିନ୍ଦ। ଦେଶର ସୁଖ ସମୃଦ୍ଧି ପାଇଁ ମହାପ୍ରଭୁଙ୍କ ନିକଟରେ ସେ ପ୍ରାର୍ଥନା କରିଥିଲେ। ଦର୍ଶନ ସାରି ଫେରିବା ପରେ ଭୁବନେଶ୍ୱର ପ୍ରତ୍ୟାବର୍ତ୍ତନ କରିଥିଲେ ରାମନାଥ କୋବିନ୍ଦ ।
ଏହା ମଧ୍ଯ ପଢନ୍ତୁ.. One Nation One Election: ୨୩ରେ ବସିବ ପ୍ରଥମ ବୈଠକ, ପୂର୍ବତନ ରାଷ୍ଟ୍ରପତି କୋବିନ୍ଦଙ୍କ ସୂଚନା
ତେବେ ପୁରୀ ଆସିବା ପୂର୍ବରୁ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ ଏକ ଘରୋଇ ବିଶ୍ବବିଦ୍ୟାଳୟର ତୃତୀୟ ସମାବର୍ତ୍ତନ ଉତ୍ସବରେ ଯୋଗଦେଇଥିଲେ । ରାଜଧାନୀ ଭୁବନେଶ୍ବରରେ ୱାନ ନେସନ ୱାନ ଇଲେକ୍ସନ ନେଇ ପ୍ରତିକ୍ରିୟା ରଖିଛନ୍ତି । ୱାନ ନେସନ ୱାନ ଇଲେକ୍ସନର ପ୍ରଥମ ବୈଠକ ଆସନ୍ତା ୨୩ ତାରିଖରେ ବସିବ ବୋଲି ସୂଚନା ଦେଇଛନ୍ତି । ତେବେ ୱାନ ନେସନ ୱାନ ଇଲେକ୍ସନ ନେଇ କେନ୍ଦ୍ର ସରକାର ଏକ କମିଟି ମଧ୍ୟ ଗଠନ କରିଛନ୍ତି । ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ନେତୃତ୍ବରେ ଗଠିତ ଏହି କମିଟିରେ କଂଗ୍ରେସ ସାଂସଦ ଅଧୀର ରଞ୍ଜନ ଚୌଧୁରୀଙ୍କ ନାଁ ରହିଥିବାବେଳେ ସେ ଏଥିରୁ ନିଜକୁ ଅଲଗା କରିନେଇଛନ୍ତି ।
ଏହା ମଧ୍ଯ ପଢନ୍ତୁ..One nation, One Election: 8ଜଣିଆ କମିଟିରେ ଶାହ, ଆଜାଦ ଓ ଅଧୀର
ତେବେ ଚଳିତ ୧୮ ତାରିଖରୁ ୨୨ ଯାଏଁ ସଂସଦର ସ୍ବତନ୍ତ୍ର ଅଧିବେଶନ ଚାଲିବାକୁ ଥିବାବେଳେ ଏହାର କୌଣସି ଏଜେଣ୍ଡା ପ୍ରକାଶ ପାଇନାହିଁ । ଏହାରି ମଧ୍ୟରେ ସରକାର ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଗଠିତ ଟିମ ଏହି ପ୍ରସ୍ତାବର ଅନୁଧ୍ୟାନ କରିବା ନେଇ ଘୋଷଣା କରିଥିଲେ । ଏହା ପରେ କିମିଟରେ ଥିବା ମୋଟ ୮ ଜଣ ସଦସ୍ୟଙ୍କ ନାମ ସାମ୍ନାକୁ ଆସିଥିଲା । ସମଗ୍ର ଦେଶରେ ଏକକାଳୀନ ବିଧାନସଭା ଏବଂ ଲୋକସଭା ନିର୍ବାଚନ କରିବା ପାଇଁ କେନ୍ଦ୍ର ସରକାର ଏକ କମିଟି ଗଠନ କରିଛନ୍ତି ।
ଇଟିଭି ଭାରତ, ପୁରୀ
