ପୁରୀ: ସମୟ ମଧ୍ୟାହ୍ନ । ଷ୍ଟେସନରେ ପହଞ୍ଚି ଛିଡା ହୋଇଥିଲା ଟ୍ରେନ । ଯାତ୍ରୀ ଓହ୍ଲାଇ ସାରିଥିଲେ । ହଠାତ ବଗିରୁ ବାହାରିଥିଲା ଧୂଆଁ । ଆଶ୍ଚର୍ଯ୍ୟ ହୋଇଥିଲେ ସମସ୍ତେ । ନା ଟ୍ରେନ ଚାଲୁଥିଲା ନା ପେଣ୍ଟ୍ରି କାର ଆକ୍ଟିଭ ଥିଲା । କିନ୍ତୁ ଟ୍ରେନରେ ଲାଗିଥିଲା ନିଆଁ । ଆଉ ହୁତୁହୁତୁ ହୋଇ ଜଳି ଯାଉଥିଲା 3ଟି ବଗି ।
ଏହା ହେଉଛି ପୁରୀ ରେଲୱେ ଷ୍ଟେସନର ଦୃଶ୍ୟ । ଯେଉଁଠାରେ ହାତିଆ-ପୁରୀ ଏକ୍ସପ୍ରେସ ଟ୍ରେନରେ ଲାଗିଥିଲା ନିଆଁ । ଆଜି ମଧ୍ୟାହ୍ନ 12ଟା 40ରେ ଘଟିଥିଲା ଏହି ଘଟଣା । ଟ୍ରେନରେ ନିଆଁ ଲାଗିବା ପରେ ସମଗ୍ର ଷ୍ଟେସନ ଧୂଆଁମୟ ହୋଇଯାଇଥିଲା । ନିଆଁର ପ୍ରକୋପ ଏତେ ଭୟଙ୍କର ଥିଲା ଯେ ଲିଭାଇବା କାର୍ଯ୍ୟରେ ଲାଗିଥିଲେ 8ଟି ଦମକଳ ଗାଡି ।
ଷ୍ଟେସନର 4 ନମ୍ବର ପ୍ଲାଟଫର୍ମରେ ଲାଗିଥିଲା ଟ୍ରେନ । ଧୂଆଁ ବାହାରୁଥିବା ଦେଖି ରେଳ ବିଭାଗ ଅଧିକାରୀ ଅଗ୍ନିଶମ ବିଭାଗକୁ ଖବର ଦେଇଥିଲେ । ପୁରୀ ଓ ଶ୍ରୀ ଜଗନ୍ନାଥ ଅଗ୍ନିଶମ କାର୍ଯ୍ୟାଳୟ ସମେତ ବ୍ରହ୍ମଗିରି, ସତ୍ୟବାଦୀ ଏବଂ ପିପିଲିରୁ 8ଟି ଦମକଳ ଗାଡି ପ୍ଲାଟଫର୍ମରେ ପହଞ୍ଚି ନିଆଁ ଆୟତ୍ତ କରିଥିଲେ । ଅଗ୍ନିକାଣ୍ଡରେ ଟ୍ରେନର ଏସ3, ଏସ4, ଏସ5 କୋଚ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି ।
ତେବେ ଅଗ୍ନିକାଣ୍ଡର କାରଣ ଅସ୍ପଷ୍ଟ ଥିବାବେଳେ ଉଚ୍ଚସ୍ତରୀୟ ତଦନ୍ତପ୍ରତିଶ୍ରୁତି ଦେଇଛନ୍ତି ରେଳ ବିଭାଗଅଧିକାରୀ । ଟ୍ରେନରୁ ସମସ୍ତ ଯାତ୍ରୀ ଓହ୍ଲାଇ ସାରିଥିଲେ । କୌଣସି କ୍ଷୟକ୍ଷତି ହୋଇନାହିଁ ବୋଲି ସୂଚନା ରହିଛି । ଗତ ରଥଯାତ୍ରା ସମୟରେ ମଧ୍ୟ ଏହି ଟ୍ରେନଟି ଲାଇନଚ୍ୟୁତ ହୋଇଥିଲା । ପୁରୀ ଷ୍ଟେସନରେ ଅଗ୍ନିକାଣ୍ଡ କିଛି ନୂଆ ନୁହେଁ । 2015ରେ ମଧ୍ୟ ଏକକାଳୀନ ଲାଗିଥିଲା 3ଟି ଟ୍ରେନରେ ନିଆଁ । ଏହାର ଏନଆଇଏ ତଦନ୍ତ ହୋଇଥିଲା ।
ବିଶ୍ବପ୍ରସିଦ୍ଧ ପର୍ଯ୍ୟଟନସ୍ଥଳୀ ପୁରୀ । ପ୍ରତିଦିନ ଏଠାରେ ହଜାର ହଜାର ପର୍ଯ୍ୟଟକ ସମାଗମ ହୁଅନ୍ତି । ହେଲେ ବାରମ୍ବାର ଏଠାରେ ଘଟୁଛି ଏପରି ଘଟଣା । ଯାହା ପର୍ଯ୍ୟଟକଙ୍କ ସୁରକ୍ଷା ଉପରେ ସୃଷ୍ଟି କରିଛି ପ୍ରଶ୍ନବାଚୀ । ଏନେଇ ରେଳ ବିଭାଗ ଦୃଷ୍ଟି ଦେବାକୁ ଦାବି ହେଉଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
