ପୁରୀ: ପୁରୀରେ ଅଗ୍ନିକାଣ୍ଡ । ପୁରୀର ଗୌଡ଼ ବାଡ଼ ସାହିରେ ଥିବା ଏକ ଖଜା ଦୋକାନରେ ବଡ଼ ଧରଣର ଅଗ୍ନିକାଣ୍ଡ ଘଟିଛି।
ସୂଚନା ଅନୁଯାୟୀ, ସୋମବାର ସନ୍ଧ୍ୟାରେ ଖଜା ଦୋକାନରେ ଖଜା ଛଣା ଯାଉଥିବା ସମୟରେ ହଠାତ୍ ଅଗ୍ନିକାଣ୍ଡ ଘଟିଥିଲା। ସେହି ସମୟରେ ଖଜା ଦୋକାନରେ କର୍ମଚାରୀମାନେ କାମ କରୁଥିଲେ। ଅଗ୍ନିକାଣ୍ଡ ପରେ ଭୟରେ ସମସ୍ତେ ବାହାରକୁ ପଳାଇ ଆସିଥିଲେ। ଖବର ପାଇ ଅଗ୍ନିଶମ ବାହିନୀ ସଠିକ ସମୟରେ ପହଞ୍ଚି ନିଆଁକୁ ଆୟତ୍ତ କରିବାରୁ ଏକ ବଡ଼ ଧରଣର ଅଘଟଣ ରୋକାଯାଇ ପାରିଛି।
ତେବେ ଅଗ୍ନିଶମ ବିଭାଗର କହିବା ଅନୁଯାୟୀ, ଉକ୍ତ ଖଜା ଦୋକାନରେ ଅଗ୍ନି ନିରାପତ୍ତା ବ୍ୟବସ୍ଥା ଗ୍ରହଣ କରାଯାଇ ନଥିଲା। ଫଳରେ ସଙ୍ଗେ ସଙ୍ଗେ ଅଗ୍ନିକାଣ୍ଡକୁ ରୋକା ଯାଇ ପାରି ନଥିଲା।
ତେବେ ନିୟମ ଉଲଘଂନ କରିଥିବା ହେତୁ ଉକ୍ତ ଖଜା ଦୋକାନ ମାଲିକଙ୍କୁ ନୋଟିସ ଜାରି ହୋଇଥିବା ଅଗ୍ନିଶମ ବିଭାଗ କହିଛି। ଅନ୍ୟପଟେ ଜନଗହଳି ଜାଗାରେ ଅଗ୍ନି ନିରାପତା ନ ଥାଇ ଦୋକାନ ଚଳାଇବାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ସୃଷ୍ଟି ହୋଇଛି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
