ପୁରୀ: ଫନି ଭାଙ୍ଗିଦେଇଥିଲା ପୁରୀ ସହରର ଅଣ୍ଟା । ବାତ୍ୟା ଯୋଗୁଁ ସାରା ସହର କ୍ଷତିଗ୍ରସ୍ତ ହୋଇଥିଲା । ଶ୍ରୀମନ୍ଦିର ଠାରୁ ସମୁଦ୍ର ବେଳାଭୂମି, ମହାପ୍ରଭୁଙ୍କ ଠାରୁ ସାଧାରଣ ଜନତା ସମସ୍ତେ ହୋଇଥିଲେ ପ୍ରଭାବିତ । ଏବେବି ଅଣ୍ଟା ସଳଖି ଛିଡା ହୋଇନି ସହର । ଆଉ ପାଖେଇ ଆସିଲାଣି ପ୍ରସିଦ୍ଧ ଘୋଷଯାତ୍ରା ।
ପର୍ଯ୍ୟଟକଙ୍କ ପ୍ରବଳ ଭିଡକୁ ଦୃଷ୍ଟିରେ ରଖି ଚିନ୍ତାରେ ପ୍ରଶାସନ । ବାତ୍ୟାରେ ଧ୍ବସ୍ତବିଧ୍ବସ୍ତ ହୋଇଥିବା ହୋଟେଲ ଶିଳ୍ପକୁ ନେଇ ଦେଖାଦେଇଛି ଆଶଙ୍କା । ପୂର୍ବ ଅପେକ୍ଷା ଏଥର କମ ପର୍ଯ୍ୟଟକ ହେବେ ବୋଲି ଆଶା କରାଯାଉଥିଲା । କିନ୍ତୁ ହାର ମାନି ନଥିଲା ହୋଟେଲ ଆସୋସିଏସନ । କଠିନ ପ୍ରଚେଷ୍ଟା ଓ ତତ୍ପରତା ସହ କାର୍ଯ୍ୟ କରି 95 ପ୍ରତିଶତ ହୋଟେଲ ପୂର୍ବ ଭଳି ସାଜସଜ୍ଜାର ସହ ଛିଡା ହୋଇଛନ୍ତି ।
ପୁରୀ ସହରରେ ଛୋଟ ବଡ 800ରୁ ଅଧିକ ହୋଟେଲ ଓ ଲଜିଂ ରହିଛି । ସେଥି ମଧ୍ୟରୁ 40ରୁ ଉର୍ଦ୍ଧ୍ବ ବଡ ତାରକା ହୋଟେଲ ରହିଛି । ହେଲେ ଫନି ପରେ ଏସମସ୍ତ ହୋଟେଲରେ ରହଣି ନେଇ ଆଶଙ୍କା ପ୍ରକାଶ ପାଇଥିଲା । ତେବେ ରଥଯାତ୍ରା ସମୟରେ ଏହି ଆଶଙ୍କାକୁ ଦୂର କରିଛି ପୁରୀ ହୋଟେଲ ଆସୋସିଏସନ । ସମସ୍ତ ହୋଟେଲରେ ପର୍ଯ୍ୟଟକଙ୍କ ଲାଗି ସବୁପ୍ରକାର ପ୍ରସ୍ତୁତି ସରିଛି । ନୂଆ ରୂପ ଓ ଉତ୍ସାହର ସହ ଭକ୍ତଙ୍କୁ ସ୍ବାଗତ କରିବାକୁ ଏହା ପ୍ରସ୍ତୁତ ରହିଛି । ପୂର୍ବରୁ କ୍ଷତିଗ୍ରସ୍ତ ହୋଟେଲ ଯୋଗୁଁ କମ ପର୍ଯ୍ୟଟକ ଆସିବାର ଅନୁମାନ କରାଯାଉଥିଲା । ହେଲେ ଏବେ ଏହି ଆଶଙ୍କାକୁ ଦୂର କରିଛି ଆସୋସିଏସନ ।
ଏହାସହ କ୍ଷତିଗ୍ରସ୍ତ ହୋଟେଲର ପୁନରୁଦ୍ଧାର ଲାଗି ରାଜ୍ୟ ସରକାରଙ୍କ ଠାରୁ କମ ସୁଧରେ ଋଣର ଆଶା ରଖିଛି ଆସୋସିଏସନ । ତେବେ ସରକାର ମଧ୍ୟ ନିରାଶ କରିନାହାନ୍ତି । ପାନୀୟ ଜଳ ଠାରୁ ବିଦ୍ୟୁତ ଯାଏଁ ପ୍ରଶାସନ ବ୍ୟବସ୍ଥା ଯୋଗାଇ ଦେଇଛନ୍ତି । ପୁରୀ ପର୍ଯ୍ୟଟନ ବିଭାଗ ମଧ୍ୟ ରଥଯାତ୍ରା ଲାଗି ସ୍ବତନ୍ତ୍ର ପ୍ୟାକେଜର ବ୍ୟବସ୍ଥା କରିଛି । ପର୍ଯ୍ୟଟକଙ୍କୁ ସମସ୍ତ ସୂଚନା ଯୋଗାଇବା ପାଇଁ ସମୁଦ୍ର ବେଳାଭୂମି, ରେଲୱେ ଷ୍ଟେସନ ଓ ବଡଦାଣ୍ଡରେ ବ୍ୟବସ୍ଥା ହୋଇଛି । ବିଶ୍ବପ୍ରସିଦ୍ଧ ରଥଯାତ୍ରାକୁ ସଫଳ କରିବା ଲାଗି ପ୍ରଶାସନ ଠାରୁ ହୋଟେଲ ଆସୋସିଏସନ ସମସ୍ତେ ପ୍ରସ୍ତୁତ । ଗତଥର 8 ଲକ୍ଷ ଆସିଥିବାବେଳେ ଏଥର ଅଧିକ ସଂଖ୍ୟାରେ ସମାଗମ ହେବାର ଆଶା କରାଯାଉଛି ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
