ପୁରୀ: ଗତ 3 ଦିନ ହେବ ପୁରୀ ସହରରେ ଲାଗି ରହୁଥିବା ପାନୀୟ ଜଳ ଯୋଗାଣ ସମସ୍ୟା ସମାଧାନ ହୋଇଛି । ପାନୀୟ ଜଳ ଆସୁଥିବା ଅଞ୍ଚଳର ଗ୍ରାମବାସୀଙ୍କ ସହ ଆଲୋଚନା କରିଛନ୍ତି ପୁରୀ ଜିଲ୍ଲାପାଳ ସମର୍ଥ ବର୍ମା ।
ଏହି ସମସ୍ୟା ସମ୍ପର୍କରେ ସଦର ବ୍ଲକ ସିରୋଇକୋଣା ଓ ଉତ୍ତରକୋଣା ଗ୍ରାମର ପ୍ରତିନିଧିମାନଙ୍କ ସହ ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟରେ ଆଲୋଚନା ହୋଇଛି । ଧାଉଡିଆ ନଦୀର ରିଜରଭଏର ୧ ଓ ୨ ରୁ ପ୍ରତିବନ୍ଧକ ହଟେଇବା ସହ ପୁରୀକୁ ଜଳ ଯୋଗାଣରେ ସହଯୋଗ କରିବା ନିମନ୍ତେ ପ୍ରତିନିଧି ମାନେ ପ୍ରତିଶ୍ରୁତି ଦେଇଛନ୍ତି । ଗ୍ରାମବାସୀଙ୍କ ଦାବି ପ୍ରତି ଆଇନ ଅନୁଯାୟୀ ପଦକ୍ଷେପ ଗ୍ରହଣ କରିବା ପାଇଁ ବିଭାଗୀୟ ଅଧିକାରୀ ମାନଙ୍କୁ ଦାୟିତ୍ବ ଦିଆଯାଇଛି ।
ଆଲୋଚନାରେ ଅତିରିକ୍ତ ଜିଲ୍ଲାପାଳ ବିନୟ କୁମାର ଦାଶ, ଉପଜିଲ୍ଲାପାଳ ଭବତାରଣ ସାହୁ, ତହସିଲଦାର ରବିନ୍ଦ୍ର ପ୍ରଧାନ,ଜଳଯୋଗାଣ ନିର୍ବାହୀ ଯନ୍ତ୍ରୀ ସରୋଜ କୁମାର ମିଶ୍ର ପ୍ରମୁଖ ଉପସ୍ଥିତ ଥିଲେ । ଅନ୍ୟପଟେ ପୁରୀ ସହରରେ ପାନୀୟ ଜଳ ସମସ୍ୟା ପାଇଁ ସିଧାସଳଖ ପ୍ରଶାସନକୁ ଦାୟୀ କରିଛନ୍ତି ବୁଦ୍ଧିଜୀବୀ । ପୁରୀ ସହରରେ ମଧୁର ଜଳ ନିମ୍ନ ଗାମୀ ହେଉଥିବା ବେଳେ ଅନେକ ଆପାର୍ଣ୍ଟମେଣ୍ଟ ଓ ହୋଟେଲ ପକ୍ଷରୁ ବେଆଇନ ଭାବେ ବୋରିଂ କରାଯାଇ ପାଣି ଉଠାଯାଉଛି। ଫଳରେ ମଧୁର ଜଳ ସ୍ତର ମାଟି ତଳେ କାମୁଥିବା ବେଳେ ପ୍ରଶାସନ ଏ ଦିଗରେ ଉଚିତ ପଦକ୍ଷେପ ନେବାକୁ ବୁଦ୍ଧିଜିବୀ କହିଛନ୍ତି ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
