ବ୍ରହ୍ମଗିରି: ମାଟିରେ ପୋତା ହେଲା ଫନି ବିପନ୍ନଙ୍କ ପାଇଁ ଆସିଥିବା ଚୁଡା ବସ୍ତା । ଗୋଟିଏ କି ଦୁଇ ବସ୍ତା ନୁହେଁ ବଂର 100ରୁ ଊର୍ଦ୍ଧ୍ୱ ଚୁଡା ବସ୍ତାକୁ ଚିଲିକା କୂଳରେ ପୋତାଯାଇଛି । ବ୍ରହ୍ମଗିରି କୃଷ୍ଣପ୍ରସାଦ ବ୍ଲକ ଅଧିନ ସାତପଡ଼ାଠାରେ ଦେଖାଦେଇଛି ପ୍ରଶାସନର ଏଭଳି ପାରିବା ପଣିଆ । କୃଷ୍ଣପ୍ରସାଦ ବ୍ଲକ କର୍ମଚାରୀମାନେ ଜେସିବି ସହାୟତାରେ ଗାତ ଖୋଳି ନଷ୍ଟ ହୋଇଯାଇଥିବା ଚୁଡାକୁ ପୋତିଛନ୍ତି ।
ପ୍ରଳୟଙ୍କାରୀ ବନ୍ୟା ଫନି ପରେ ଏବେ ବି ଅଣ୍ଟା ସଳଖି ପାରିନି ପୁରୀ ଜିଲ୍ଲାର ବ୍ରହ୍ମଗିରି ଓ କୃଷ୍ଣପ୍ରସାଦ ବ୍ଲକ । ବାତ୍ୟା ଫନିରେ ଛାରଖାର୍ ହୋଇଯାଇଥିବା ବ୍ରହ୍ମଗିରି ଓ ସାତପଡ଼ା ଅଞ୍ଚଳର ଅନେକ ଲୋକଙ୍କ ଘର ଓ ବେଉସା ଉଜୁଡ଼ି ଯାଇଥିଲା । ପେଟକୁ ମୁଠାଏ ଦାନା ପାଇଁ ଲୋକେ ଡହଳବିକଳ ହେଉଥିଲେ ।
ଆଉ ଏହି ସମୟରେ ବନ୍ୟା ବିପନ୍ନଙ୍କୁ ସହାୟତା ପାଇଁ ସରକାରୀ ଓ ବେସରକାରୀ ସ୍ତରରେ ହାତ ଲମ୍ବିଥିଲା । ଶୁଖିଲା ଖାଦ୍ୟ ଚୁଡା, ଗୁଡ, ବିସ୍କୁଟ ଆଦି ବଣ୍ଟା ଯାଇଥିଲା । ହେଲେ ବାତ୍ୟା ବିପନ୍ନଙ୍କୁ ସେ ସବୁ ଦିଆଯାଇନାହିଁ । ସାତପଡ଼ାସ୍ଥିତ ଓଟିଡିସିର ଏକ କୋଠରୀରେ ମହଜୁଦ ଥିବା 100 ବସ୍ତାରୁ ଊର୍ଦ୍ଧ୍ବ ରିଲିଫ ଚୁଡାକୁ ପ୍ରଶାସନ ନଷ୍ଟ କରିଦେଇଛି । ଯାହାକୁ ଦେଖି ପ୍ରଶାସନର ପାରିବା ପଣିଆ ଉପରେ ଏବେ ପ୍ରଶ୍ନ ଉଠିଛି ।
ବ୍ରହ୍ମଗିରିରୁ ଦେବାଶିଷ ଦାସ, ଇଟିଭି ଭାରତ
