ପୁରୀ: ବୈଶାଖ ପ୍ରଥମ ମଙ୍ଗଳବାରରେ କାକଟପୁର ମା' ମଙ୍ଗଳାଙ୍କ ପୀଠରେ ଅନୁଷ୍ଠିତ ହେଲା ଝାମୁଯାତ୍ରା । ପରମ୍ପରା ଅନୁଯାୟୀ ଆଜି କାକଟପୁର ଅଧିଷ୍ଠାତ୍ରୀ ଦେବୀ ମା' ମଙ୍ଗଳାଙ୍କ ଝାମୁଯାତ୍ରା ଅନୁଷ୍ଠିତ ହୋଇଛି । ବିଶ୍ୱାସ ରହିଛି ଆଜିର ଦିନରେ ମା' ମଙ୍ଗଳାଙ୍କୁ ପୂଜାର୍ଚ୍ଚନା କଲେ ସବୁ ମନସ୍କାମନା ପୂର୍ଣ୍ଣ ହୋଇଥାଏ । ଏହି ବିଶ୍ଵାସରେ ହଜାର ହଜାର ଶ୍ରଦ୍ଧାଳୁଙ୍କର ଭିଡ ଜମିଥିଲା କାକଟପୁର ମା' ମଙ୍ଗଳାଙ୍କ ପୀଠରେ ।
ରିତିନୀତି ନୁସାରେ ମା'ଙ୍କର ପୂଜା କାର୍ଯ୍ୟ ସମ୍ପୂର୍ଣ୍ଣ ହେବା ପରେ ମାନସିକଧାରୀ ପାଟୁଆମାନେ ମା'ଙ୍କର ଆଜ୍ଞାମାଳ ପାଇବା ପରେ ଘଟତୋଳା ତୁଠରୁ ଜଳ ତୋଳି ନୃତ୍ୟ ପରିବେଷଣ କରି ମା'ଙ୍କ ସମ୍ମୁଖରେ ଝାମୁନିଆଁରେ ଚାଲିଥିଲେ । ପ୍ରାୟ 11 ଫୁଟରୁ ନିଆଁର ଗାଢରେ ଚାଲିଥିଲେ ପାଟୁଆମାନେ । ମା'ଙ୍କ ଉଦ୍ଦେଶ୍ୟରେ ଏହି ନିଆଁଗାଢରେ ଚାଲିବା ପାଇଁ ମାନସିକଧାରୀମାନେ ଗୋଟିଏ ମାସ ପୂର୍ବରୁ ନିଷ୍ଠାର ସହିତ ରହି ନିରାମିଷ ଭୋଜନ କରି ଅଲଗା ରହିବାକୁ ପଡିଥାଏ ।
କୋଭିଡ କଟକଣା ପାଇଁ ଦୀର୍ଘ ଦୁଇ ବର୍ଷ ଧରି ମା'ଙ୍କ ସାନିଧ୍ୟ ଲାଭରୁ ବଞ୍ଚିତ ଶ୍ରଦ୍ଧାଳୁ ଆଜି ଦର୍ଶନ ପାଇ ବେଶ୍ ଉତ୍ସାହିତ ଥିଲେ । ଏହି ପରମ୍ପରା ବହୁ ପୁରାତନ କାଳରୁ ରହି ଆସିଛି । ସବୁ ସ୍ଥାନରେ ପଣାସଂକ୍ରାନ୍ତିରେ ଝାମୁଯାତ୍ରା ହେଉ ଥିବାବେଳେ କାକଟପୁରରେ ମା'ଙ୍କ ଠାରେ ବୈଶାଖ ମାସ ପ୍ରଥମ ମଙ୍ଗଳବାରରେ ଝାମୁ ଯାତ୍ରା ଅନୁଷ୍ଠିତ ହୋଇଥାଏ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
