ଭୁବନେଶ୍ବର/ପୁରୀ: ସାମୁଦ୍ରିକ ଝଡ 'ବୁଲବୁଲ' ପଶ୍ଚିମବଙ୍ଗର ସାଗରଦୀପରେ ଲ୍ୟାଣ୍ଡଫଲ କରିଛି । ସେପଟେ ଏହାର ପ୍ରଭାବରେ ଓଡିଶାର ଆକାଶ ନାଲି ରଙ୍ଗର ଚାଦରରେ ଢାଙ୍କି ହୋଇ ରଙ୍ଗୀନ ହୋଇଥିବା ଦୃଶ୍ୟ କ୍ୟାମେରାରେ କଏଦ ହୋଇଛି ।
ଶନିବାର ସନ୍ଧ୍ୟାରେ ଓଡିଶା ବିଭିନ୍ନ ସ୍ଥାନରେ ନାଲି ରଙ୍ଗର ଆକାଶ ଦେଖିବାକୁ ମିଳିଥିଲା । ପୁରୀ, ଭୁବନେଶ୍ବର ଓ ଏହାର ଆଖପାଖ ଅଞ୍ଚଳରେ ଏଭଳି ମନୋରମ ଦୃଶ୍ୟ ପରିଲକ୍ଷିତ ହୋଇଥିଲା । ସେହିପରି ଶ୍ରୀକ୍ଷେତ୍ର ଉପରୁ ଟଳିଯାଇଛି 'ବୁଲବୁଲ'ର ବିପଦ । ହେଲେ ଆକାଶ ଗାଢ ନାରଙ୍ଗୀ ରଙ୍ଗରେ ରଙ୍ଗାୟିତ ହୋଇଥିବାର ଦୃଶ୍ୟ ଦେଖିବାକୁ ମିଳିଛି ।
ହଠାତ୍ ଦେଖାଦେଇଥିବା ଏହି ନାରଙ୍ଗୀ ରଙ୍ଗର ଆକାଶ ପର୍ଯ୍ୟଟକଙ୍କୁ ରୋମାଞ୍ଚିତ କରିଥିଲା । ଶ୍ରୀମନ୍ଦିର ସମେତ ବଡ଼ ଦାଣ୍ଡ, ସମୁଦ୍ର କୂଳ ସବୁଆଡେ ଆକାଶ ନାରଙ୍ଗୀ ରଙ୍ଗ ହୋଇ ଯାଇଥିଲା । ଯାହାକି ଶ୍ରୀକ୍ଷେତ୍ର ଆକାଶକୁ କିଛି ସମୟ ଏହି ରଙ୍ଗରେ ଆଚ୍ଛାଦିତ କରି ରଖିଥିଲା । ନାରଙ୍ଗୀ ରଙ୍ଗର ଆକାଶ ଶ୍ରୀକ୍ଷେତ୍ର ଆକାଶକୁ ଆଲୋକିତ କରିଛି । ପ୍ରକୃତିର ଏହି ମନୋଲୋଭା ଦୃଶ୍ୟ ଶ୍ରୀକ୍ଷେତ୍ରବାସୀଙ୍କୁ ଆନ୍ଦୋଳିତ କରିଥିଲା ।
ଭୁବନେଶ୍ବରରୁ ସଞ୍ଜୀବ ରାୟ, ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
