ପୁରୀ: ମେ’ 3 ରେ ହୋଇଥିବା ସାମୁଦ୍ରିକ ଝଡବାତ୍ୟା ‘ଫନି’କୁ ଏ ମଧ୍ୟରେ ପ୍ରାୟ ଦେଢମାସ ପୁରିଲାଣି । ବାତ୍ୟାରେ ସାରା ରାଜ୍ୟ ଛାରଖାର ହୋଇଯାଇଥିବା ବେଳେ ସର୍ବାଧିକ କ୍ଷତିଗ୍ରସ୍ତ ହୋଇଥିଲା ପୁରୀ । ଆଗକୁ ରଥଯାତ୍ରା ଥିବାରୁ ପୁରୀ ସହରକୁ ପୁଣି ଥରେ ସଜାଡିବାକୁ ତତ୍ପର ପ୍ରଶାସନ । ସେନେଇ ଆଜି ପୁଣି ସ୍ଥିତି ପରଖି ସମୀକ୍ଷା ବୈଠକ କରିଛନ୍ତି କେନ୍ଦ୍ରୀୟ ଟିମ ।
ତେବେ ପୁରୀର ପୁନଃନିର୍ମାଣ କାର୍ଯ୍ୟ କେମିତି ଚାଲିଛି ଓ କିଭଳି କେନ୍ଦ୍ରୀୟ ସହାୟତା ମିଳିବ ସେ ନେଇ ଆଜି ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। କେନ୍ଦ୍ର ଗୃହବିଭାଗ ସଚିବ ବିବେକ ଭରଦ୍ୱାଜଙ୍କ ନେତୃତ୍ୱରେ ପୁରୀ ଜିଲ୍ଲାର ସଦର ବ୍ଲକ, ସତ୍ୟବାଦୀ ଆଦି ଅଞ୍ଚଳରେ ବୁଲି ସ୍ଥିତି ସମୀକ୍ଷା କରିଛନ୍ତି ଟିମ ।
ପରେ ଜିଲ୍ଲା ପ୍ରଶାସନ ସହ ଏକ ବୈଠକରେ ଏନେଇ କେନ୍ଦ୍ରୀୟ ଟିମ ଆଲୋଚନା କରିଥିଲା। ଫନି କ୍ଷତିଗ୍ରସ୍ତଙ୍କୁ ଯେଉଁ ସହାୟତା ଯୋଗାଇଦେବା କଥା ତାହା କେନ୍ଦ୍ର ସରକାର ନିଶ୍ଚିତ ଯୋଗାଇ ଦେବେ ବୋଲି ଆଶ୍ବାସନା ଦେଇଛି କେନ୍ଦ୍ରୀୟ ଟିମ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
