ନିମାପଡା: STF କବଜାରେ ବ୍ରାଉନସୁଗାର ବେପାରୀ । ପୁରୀ ଜିଲ୍ଲା ନିମାପଡାରୁ ୧ କେଜି ୮୦ ଗ୍ରାମର ବ୍ରାଉନସୁଗାର ଜବତ କରିଛି STF । ଏହି ଘଟଣାରେ ଜଣେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରାଯାଇଛି । ଅଭିଯୁକ୍ତ ଜଣକ ଗୁଆଲାପଡା ଅଞ୍ଚଳର ପାପୁଲ ମହାନ୍ତି । ତା' ନିକଟରୁ ଜବତ ହୋଇଥିବା ବ୍ରାଉନସୁଗାର ମୂଲ୍ୟ ପ୍ରାୟ କୋଟିଏ ଟଙ୍କାରୁ ଅଧିକ ହୋଇଥିବା ସୂଚନା ମିଳିଛି ।
ପୁରୀ ଜିଲ୍ଲାରେ ଦିନକୁ ଦିନ ବୃଦ୍ଧି ପାଉଛି ବ୍ରାଉନସୁଗାର କାରବାର । ଏଭଳି ମାରାତ୍ମକ ନିଶା କବଳରେ ପଡ଼ି ପଥଭ୍ରଷ୍ଟ ହେଉଛନ୍ତି ଆଜିକାର ଯୁବ ସମାଜ । ଶନିବାର ଅପରାହ୍ନରେ ପୁରୀ ଜିଲ୍ଲାର ନିମାପଡ଼ା ଜିଓ ପେଟ୍ରୋଲ ପମ୍ପ ନିକଟରେ ବ୍ରାଉନସୁଗାର କାରବାର ଚାଲିଥିବା ବେଳେ ଅତର୍କିତ ଭାବରେ ଚଢ଼ାଉ କରି ବେପାରୀଙ୍କୁ କାବୁ କରିଥିଲା STF ଟିମ । ଗିରଫ ଅଭିଯୁକ୍ତଙ୍କ ଠାରୁ ବ୍ରାଉନସୁଗାର ଜବତ କରାଯିବା ସହିତ ଅନ୍ୟାନ୍ୟ ଅପରାଧିକ ସାମଗ୍ରୀ ଜବତ କରାଯାଇଛି । ଗିରଫ ଅଭିଯୁକ୍ତ ହେଲା ନିମାପଡ଼ା ଗୁଆଲାପଡା ଅଞ୍ଚଳର ପାପୁଲ ମହାନ୍ତି ।
ନିମାପଡ଼ା ଅଞ୍ଚଳରେ ବ୍ରାଉନସୁଗାର କାରବାର ଚାଲୁଥିବା ନେଇ ବାରମ୍ବାର ଅଭିଯୋଗ ହୋଇଆସୁଥିବା ବେଳେ STFକୁ ବଡ଼ ସଫଳତା ମିଳିଛି । ତେବେ ନିମାପଡାରେ ବ୍ରାଉନସୁଗାର କାରବାର ହେଉଥିବାର ଘଟଣା ସାମ୍ନାକୁ ଆସିଥିବା ବେଳେ ଏହାର ଚେର ଜିଲ୍ଲାର ଆଉ କେଉଁ କେଉଁ ସ୍ଥାନକୁ ଲମ୍ବିଛି ସେନେଇ ତଦନ୍ତ ଜାରି ରଖିଛି ପୋଲିସ । ଉକ୍ତ ଘଟଣାକୁ ନେଇ ନିମାପଡା ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିବା ସହିତ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି ।
ଏହା ମଧ୍ୟ ପଢନ୍ତୁ - ୫ ଲକ୍ଷରୁ ଊର୍ଦ୍ଧ୍ବ ଟଙ୍କାର ଧଳା ଜହର ଜବତ, ୩ ଗିରଫ
ଏହା ମଧ୍ୟ ପଢନ୍ତୁ- ପୁରୀରେ ବଢୁଛି ଅପରାଧ: ଜଟିଆ ବାବାଜୀ ଛକ ହତ୍ୟାକାଣ୍ଡ ଘଟଣାରେ 2 ଗିରଫ, ଜଣେ ଫେରାର
ସେହିପରି ଗତ କିଛି ମାସ ପୂର୍ବେ ପୁରୀରୁ ବ୍ରାଉନସୁଗାର ଜବତ ହୋଇଥିବା ବେଳେ 4 ଜଣ ବେପାରୀଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ପୁରୀ ପୋଲିସ । କୁମ୍ଭାରପଡ଼ା ଓ ତାଳବଣିଆ ଥାନା ପୋଲିସ ବାନାମ୍ବର ଛକ ଓ ହୁଳୁହୁଳିଆ ବ୍ରିଜରେ ଚଢ଼ାଉ କରି ଚାରି ଜଣ ଅଭିଯୁକ୍ତଙ୍କୁ ଗିରଫ କରିଥିବା ବେଳେ ସେମାନଙ୍କ ଠାରୁ ୧୭ ଗ୍ରାମ ବ୍ରାଉନସୁଗାର ଜବତ ହୋଇଥିଲା । ଏଥିସହ ଦୁଇଟି ମୋବାଇଲ, ଗୋଟିଏ କେଟିଏମ୍ ବାଇକ୍ ଓ ନଗଦ ୪୨୦୦ ଟଙ୍କା ଜବତ କରିଥିଲା ପୋଲିସ ।
ଇଟିଭି ଭାରତ, ନିମାପଡା
