ପୁରୀ: ଉଚ୍ଛେଦ ହେଲା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ସମାଧିସ୍ଥଳ । ବୁଧବାର ରାତିରେ ପୁରୀ ସ୍ଵର୍ଗଦ୍ବାରରେ ଥିବା ବିଜୁ ପଟ୍ଟନାୟକଙ୍କ ସମାଧିସ୍ଥଳକୁ ଉଚ୍ଛେଦ କରାଯାଇଛି। ସ୍ବର୍ଗ ଦ୍ବାରର ବିକାଶ ଓ ନବୀକରଣ କାର୍ଯ୍ୟ ନେଇ ପୁରୀ ଜିଲ୍ଲା ପ୍ରଶାସନ ପକ୍ଷରୁ ଏହି ସମାଧିସ୍ଥଳକୁ ଉଚ୍ଛେଦ କରାଯାଇଛି।
ପୂର୍ବରୁ ରାଜ୍ୟ ସରକାରଙ୍କ ନିଷ୍ପତ୍ତି କ୍ରମେ 5 କୋଟି ଟଙ୍କା ଅନୁଦାନରେ ସ୍ବର୍ଗଦ୍ବାରର ନବୀକରଣ ହେବ। ଅତ୍ୟାଧୁନିକ ବ୍ୟବସ୍ଥା ରହିବା ଫଳରେ ଏଠାରେ ଆସୁଥିବା ଲୋକେ ଶବ ସଂସ୍କାର କାର୍ଯ୍ୟ ସୁବିଧାରେ କରି ପାରିବେ। ହାଇଦ୍ରାବାଦର ବୈକୁଣ୍ଠ ମହାପ୍ରସ୍ଥାନମ ଢାଞ୍ଚାରେ ସ୍ବର୍ଗଦ୍ବାର ଚିତ୍ର ବଦଳିବ। ଶବବାହକ ମାନଙ୍କ ପାଇଁ ବିଶ୍ରାମ କକ୍ଷ ନିର୍ମାଣ ହେବ। ସବୁ ଋତୁରେ ଶବଦାହ ନେଇ ଅନୁକୁଳ ବ୍ୟବସ୍ଥା ହେବ। ସ୍ବର୍ଗଦ୍ବାରରେ ବୃକ୍ଷ ରୋପଣ କରାଯାଇ ସୁନ୍ଦର କରାଯିବା ସହ ଅସ୍ତି ସଂଗ୍ରହ ଓ ସଂରକ୍ଷଣ ନେଇ ବ୍ୟବସ୍ଥା ହେବ। ଏଥିପାଇଁ ସ୍ଥାନ ଅଭାବ ଥିବାରୁ ବିଜୁଙ୍କ ସମାଧି ଉଚ୍ଛେଦ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଥିଲେ।
1999 ମସିହାରେ ପୁରୀ ପୌର ପାଳିକା ସ୍ବର୍ଗଦ୍ବାର ଭିତରେ ବିଜୁ ବାବୁଙ୍କ ସ୍ମୃତିରେ ଏକ ସମାଧିସ୍ଥଳ ନିର୍ମାଣ କରିଥିଲା। ଅନ୍ୟପଟେ ସ୍ବର୍ଗଦ୍ବାରରୁ ବିଜୁ ସମାଧି ଉଠାଇବା ନେଇ ପୁରୀ ଜିଲ୍ଲା ଅଦାଲତରେ 1999 ମସିହାରେ ପୁରୀର ଆଇନଜୀବୀ ରମେଶ ପ୍ରସାଦ ସିଂ ଏକ ମାମଲା ରୁଜୁ କରିଥିଲେ। ସ୍ବର୍ଗଦ୍ବାର ଭଳି ଏକ ହିନ୍ଦୁ ସମାଜ ସ୍ବତନ୍ତ୍ର ସ୍ଥାନରେ ଜାଗା ଅକ୍ତିଆର କରି ସମାଧି ନିର୍ମାଣ ଘଟଣା ପ୍ରତିବାଦରେ ଏହି ମାମଲା ହୋଇଥିଲା ।
ତେବେ ସରକାର ଏହାକୁ ବୁଝି ବିଜୁଙ୍କ ସମାଧି ପୀଠ ହଟାଇବାକୁ ସ୍ବାଗତ ଯୋଗ୍ୟ ବୋଲି ଆଇନଜୀବୀ ରମେଶ ପ୍ରସାଦ ସିଂ କହିଛନ୍ତି। ବିଜୁ ପଟ୍ଟନାୟକଙ୍କୁ ସମସ୍ତେ ଭଲ ପାଆନ୍ତି। ତାଙ୍କ ଭଳି ବ୍ୟକ୍ତିତ୍ବ ପାଇଁ ଅନ୍ୟ ଏକ ସ୍ବତନ୍ତ୍ର ସ୍ଥାନରେ ବିଜୁ ସମାଧି ସ୍ଥଳ କରିବା ଉଚିତ ବୋଲି ଆଇନଜୀବୀ ରମେଶ ପ୍ରସାଦ ସିଂ କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
