ପୁରୀ: ପିପିଲିରେ ରାଜନୈତିକ ହିଂସା ହୋଇଥିବାର ଅଭିଯୋଗ ହୋଇଛି । ବିଜେପି ରାଲିରେ ଯାଉଥିବା ଯୁବକକୁ ବିଜେଡି କର୍ମୀ ମାଡ଼ ମାରି, ଗାଡି ଚାବି ନେଇଥିବା ଅଭିଯୋଗ ହୋଇଛି । ଏହାର ପ୍ରତିବାଦରେ ବିଜେପି ବିଧାୟକ ପ୍ରାର୍ଥୀ ଆଶ୍ରିତ ପଟ୍ଟନାୟକ ରାଲି ଛାଡି ସହଜ ପୁର ପଞ୍ଚାୟତ ରାଇରିଗିପୁରରେ ଧାରଣା ଦେଇଥଲେ ।
ଏହାର ପ୍ରତିବାଦରେ ଆଜି (ଶୁକ୍ରବାର) ବିଜେପି ପକ୍ଷରୁ ପିପିଲି ଥାନା ଘେରାଉ କରାଯାଇଥିଲା । ତୁରନ୍ତ ବିଜେପି କର୍ମୀଙ୍କୁ ଆକ୍ରମଣ କରିଥିବା ବିଜେଡି କର୍ମୀକୁ ଗିରଫ କରା ନଗଲେ ଥାନା ଆଗରେ ଅନିର୍ଦ୍ଦିଷ୍ଟ କାଳ ପାଇଁ ଧାରଣା ଦେବାକୁ ବିଜେପି କହିଥିଲା । ପରେ ପୋଲିସ ପକ୍ଷରୁ ଦୋଷୀ ଵ୍ୟକ୍ତିଙ୍କ ବିରୋଧରେ କାର୍ଯ୍ୟନୁଷ୍ଠାନ ନେବା ନେଇ ପ୍ରତିଶୃତି ପରେ ବିଜେପି ଧରଣାରୁ ଉଠିଥିଲା । ବିଜେଡି କର୍ମୀ ଯେଭଳି ଗୁଣ୍ଡାରାଜ କରି ସାଧାରଣରେ ଭୟ ସୃଷ୍ଟି କରୁଛନ୍ତି ତାହାକୁ ବିଜେପି ଗ୍ରହଣ କରିବ ନାହିଁ ବୋଲି ବିଜେପିର ବରିଷ୍ଠ ନେତା ପୃଥ୍ବୀରାଜ ହରିଚନ୍ଦନ କହିଛନ୍ତି । ତୁରନ୍ତ ଜିଲ୍ଲା ପୋଲିସ ଶାନ୍ତି ଶୃଙ୍ଖଳା ଉପରେ କଡା ପଦକ୍ଷେପ ନେବାକୁ ବିଜେପି ଦାବି କରିଛି ।
ଅଭିଯୋଗ ଅନୁଯାୟୀ ଜଣେ ବିଜେପି କର୍ମୀ ରାସ୍ତାରେ ଯାଉଥିବା ବେଳେ ବିଜେଡି କର୍ମୀମାନେ ତାଙ୍କୁ ଆକ୍ରମଣ କରିବା ସହ ବାଇକ ଭାଙ୍ଗି ଦେଇଛନ୍ତି । ତେବେ ବିଜେଡି ଯେଭଳି ଅରାଜକତା ଆରମ୍ଭ କରିଛି ଏନେଇ ନିର୍ବାଚନରେ ଭୋଟର ଏହାର ଉପଯୁକ୍ତ ଜବାବ ଦେବେ ବୋଲି ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
