ପୁରୀ: ଦେବସ୍ନାନ ପୂର୍ଣ୍ଣିମାରେ ସ୍ନାନ ପରେ ବର୍ତ୍ତମାନ ଜ୍ବରରେ ପୀଡିତ 3 ଠାକୁର । ପ୍ରଭୁଙ୍କୁ ସୁସ୍ଥ କରିବା ଲାଗି ଚାଲିଛି ଉପଚାର । ସେବାୟତମାନେ ମହାପ୍ରଭୁଙ୍କ ଚିକିତ୍ସାରେ ଲାଗି ପଡିଛନ୍ତି । ଏହାରି ମଧ୍ୟରେ ପ୍ରଭୁଙ୍କ ସୁସ୍ଥତା ଲାଗି କଟକ ନିଆଳି ପବିତ୍ର ମାଧବାନନ୍ଦ ଜୀଉ ମନ୍ଦିରରୁ ଆସି ପହଁଚିଛି ଅଣସର ଫଳଭାର ।
ଅଣସର ନୀତି: ଚିକିତ୍ସା ପାଇଁ ଆସିଲା ଫଳଭାର
ନିଆଳିର ଭାରଯାତ୍ରୀମାନେ ନାମ ସଂକୀର୍ତ୍ତନ ସହ ଶ୍ରୀମନ୍ଦିର ନିକଟରେ ପହଞ୍ଚି ଭାର ସାମଗ୍ରୀ ନୃସିଂହ ଚକଡ଼ାରେ ପହଞ୍ଚାଇଛନ୍ତି । ଏହି ଅଣସର ଭାର ସାମଗ୍ରୀ ମଧ୍ୟରେ ପଣସ , ଆମ୍ବ , ସପୁରୀ , କଦଳୀ , ପିଜୁଳି , ଖଜୁରୀ , ତୁଳସୀ ଓ ବିଭିନ୍ନ ପ୍ରକାର ଫୁଲ ରହିଛି । ଶ୍ରୀମାଧବାନନ୍ଦଜୀଉ ମନ୍ଦିର ସେବକ ତ୍ରିଲୋଚନ ପୁଷ୍ପାଳକ ଏହାର ନେତୃତ୍ବ ନେଇଛନ୍ତି । ଗତ ଦୁଇ ବର୍ଷ ଧରି ମହାପ୍ରଭୁଙ୍କ ମଉଳା କ୍ଷେତ୍ର କୁହାଯାଉଥିବା ଶ୍ରୀମାଧବାନନ୍ଦଜୀଉ ପୀଠରୁ ପୋଢୁଆଁ ଭାର ପଠାଯିବା ମଧ୍ୟ ଉଲ୍ଲେଖନୀୟ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
