ପୁରୀ: ଶ୍ରୀମନ୍ଦିର ନିକଟରେ ପୁଣି ଉଚ୍ଛେଦ ପ୍ରକ୍ରିୟା ନେଇ ପ୍ରସ୍ତୁତି ଆରମ୍ଭ ହୋଇଛି। ମଙ୍ଗଳବାର ପୁରୀରେ ଉଚ୍ଛେଦ ପ୍ରକ୍ରିୟା ବନ୍ଦ ରହିଥିଲା। ବଡ଼ ଅଖଡା ମଠ ଉଚ୍ଛେଦ ସମୟରେ ପ୍ରବଳ ଧୂଳି ଉଡିବା ହେତୁ ଶ୍ରୀମନ୍ଦିର ଆସୁଥିବା ଭକ୍ତ ନାହିଁ ନ ଥିବା ଅସୁବିଧାର ସମ୍ମୁଖୀନ ଥିଲେ। ଏଣୁ ଉଚ୍ଛେଦ ପ୍ରକ୍ରିୟା ବନ୍ଦ କରାଯିବା ସହ ବଡ଼ ଅଖଡା ମଠର ଭଗ୍ନାବଶେଷ ଗୁଡିକୁ ସଫେଇ କରାଯାଇ ସ୍ଥାନାନ୍ତରିତ କରାଯାଇଛି।
ସେପଟେ ଏହି କାର୍ଯ୍ୟ ଶେଷ ହେବା ପରେ ସାନ ଛତା ମଠ ଉଚ୍ଛେଦ ପ୍ରକ୍ରିୟା ଆରମ୍ଭ ହେବା ନେଇ ନୋଟିସ ଦିଆ ସରିଛି। ଅନ୍ୟପଟେ ଏମାର ମଠକୁ ଲାଗି ଥିବା ମଙ୍ଗୁ ମଠ ଭଙ୍ଗା ଯିବା ପ୍ରକ୍ରିୟା ଆରମ୍ଭ ହୋଇଛି। ମଙ୍ଗଳବାର ପୌର କର୍ମଚାରୀ ଆସି ମାପଚୁପ୍ କରିଛନ୍ତି। ମଙ୍ଗୁ ମଠ ସହିତ ଏହାର 23 ଦୋକାନ ଗୃହ ମଧ୍ୟ ଭଙ୍ଗା ହେବ। ଏନେଇ ମଠ କର୍ତ୍ତୃପକ୍ଷ ସହମତି ଦେଇ ସାରିଛନ୍ତି । ଶ୍ରୀମନ୍ଦିରର 75 ମିଟର ଭିତରେ 18ଟି ମଠ ରହିଛି, ସେଗୁଡିକ ଭିତରୁ କେଉଁ ଗୁଡିକ ଉଚ୍ଛେଦ ହେବ ସେ ନେଇ ପ୍ରଶାସନିକସ୍ତରରେ ଆଲୋଚନା ପରେ ନିଷ୍ପତ୍ତି ନିଆଯିବ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
