ପୁରୀ: ଜିଲ୍ଲାର ବାସେଳିସାହି ଥାନାରେ ହାଜତ ମୃତ୍ୟୁ ଅଭିଯୋଗ ଘଟଣା ଉପରେ ପୁରୀ ଏସ୍ପି ଅଖିଳେଶ୍ବର ସିଂହ ପ୍ରତିକ୍ରିୟା ରଖିଛନ୍ତି । ଏହି ଅଭିଯୋଗକୁ ପୁରୀ ଏସପି ଖଣ୍ଡନ କରିବା ସହ ଘଟଣାର ତଦନ୍ତ କରାଯିବ ବୋଲି କହିଛନ୍ତି ।
ହାଜତରେ ଅଭିଯୁକ୍ତର ମୃତ୍ୟୁ ଅଭିଯୋଗକୁ ପୁରୀ ଏସପି ଆଖିଲେଶ୍ବର ସିଂ ଖଣ୍ଡନ କରିଛନ୍ତି । ତାଙ୍କ ସୂଚନା ଅନୁଯାୟୀ ଅଭିଯୁକ୍ତକୁ ଏକ ଡକାୟତି ମାମଲାରେ ଧରିବା ପାଇଁ ପୋଲିସ ଟିମ ଯାଇଥିବା ବେଳେ ପୋଲିସ ସହ ତା'ର ଧସ୍ତାଧସ୍ତି ହୋଇଥିଲା । ଅଭିଯୁକ୍ତ ଜଣକ ପୋଲିସ ଉପରକୁ ଆକ୍ରମଣ କରିଥିଲା । ଏହି ସମୟରେ ଅଭିଯୁକ୍ତ ଅସୁସ୍ଥ ହୋଇପଡିବା ପରେ ତାକୁ ପୁରୀ ଜିଲ୍ଲା ସଦର ମହକୁମା ଚିକିତ୍ସାଳୟକୁ ନିଆଯାଇଥିଲା । ତେବେ ସେଠାରେ ଚିକିତ୍ସିତ ଅବସ୍ଥାରେ ତାର ମୃତ୍ୟୁ ହୋଇଛି ବୋଲି ଏସପି କହିଛନ୍ତି ।
ହାଜତ ମୃତ୍ୟୁ ପ୍ରସଙ୍ଗରେ ମତ ରଖି ସେ କହିଛନ୍ତି, ଯଦି ପ୍ରକୃତରେ ହାଜତରେ ଅଭିଯୁକ୍ତର ମୃତ୍ୟୁ ଘଟିଥାଏ ତେବେ ଏନଏଚଆରସିର ଗାଇଡଲାଇନ ଅନୁଯାୟୀ ତଦନ୍ତ କରାଯିବ ଏବଂ ଦୋଷୀ ବିରୋଧରେ ଆଇନ ଅନୁଯାୟୀ ଦୃଢ କାର୍ଯ୍ୟନୁଷ୍ଠାନ ନିଆଯିବ । ଏସପି ହାଜତ ମୃତ୍ୟୁ ଅଭିଯୋଗକୁ ଖଣ୍ଡନ କରୁଥିବା ବେଳେ ଏପଟେ ମୃତ ଅଭିଯୁକ୍ତର ଶରୀରରେ ମାଡ଼ର ଦାଗ ରହିଥିବା ସୂଚନା ମିଳିଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
