ପୁରୀ: ଜିଲ୍ଲାରେ ପ୍ରଶାସନ ପକ୍ଷରୁ ଜାରି ରହିଛି ଉଚ୍ଛେଦ ପ୍ରକ୍ରିୟା । ଉଚ୍ଛେଦ ପ୍ରକ୍ରିୟାଟି ଚତୁର୍ଥ ଦିନରେ ପହଞ୍ଚିଥିବା ବେଳେ ଶ୍ରୀମନ୍ଦିର ମେଘନାଦ ପାଚେରୀକୁ ଲାଗିଥିବା ଉଚ୍ଛେଦ ଭଗ୍ନାବଶେଷ ଗୁଡିକୁ ଗୁରୁବାର ସଫା କରାଯାଇଛି । ତେବେ ଏହି ପାଚେରୀକୁ ଲାଗିଥିବା ଏକ ପରିତ୍ୟକ୍ତ କୋଠରୀ ମିଳିଛି । ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି ।
ମିଳିଥିବା ପରିତ୍ୟକ୍ତ କୋଠରୀର ଦ୍ବାର ନଥିବା ଦେଖିବାକୁ ମିଳିଛି । ଯାହାକି ଏକ ଗୁପ୍ତ କୋଠରୀ ବୋଲି କିଛି ଗଣମାଧ୍ୟମରେ ପ୍ରକାଶ ପାଇଛି । ରାମଦୟା ପରିଷଦ ମଠ ପଛରେ ରହିଛି ଏହି ପରିତ୍ୟକ୍ତ କୋଠରୀ । କିଛି ଘରକରଣା ସାମଗ୍ରୀ ପଡିଥିବା ଦେଖାଦେଇଛି । ତେବେ ଏହା ଏକ ଗୁପ୍ତ କୋଠରୀ ଚର୍ଚ୍ଚାକୁ ସମ୍ପୁର୍ଣ୍ଣ ଭିତ୍ତୀହିନ ବୋଲି ରାମଦୟା ପରିଷଦ ମଠର ସଦସ୍ୟମାନେ କହିଛନ୍ତି ।
ଏହି କୋଠରୀରେ ପୂର୍ବରୁ ରୋଷେଇ ହେଉଥିଲା । ସାଧୁ ସନ୍ଥମାନେ ପ୍ରସାଦ ସେବନ କରୁଥିଲେ । ପରେ ମଠର ନୂତନ ଘର ନିର୍ମାଣ ପରେ ଏହା ପଛରେ ରହି ଯାଇଥିଲା । ପାଚେରୀ ଦିଆଯିବା ପରେ ଉକ୍ତ କୋଠରୀରେ କୌଣସି ଦ୍ବାର ନଥିଲା । ଏଣୁ ଗୁପ୍ତ କୋଠରୀ ପ୍ରଚାର ହେବା ଠିକ ନୁହେଁ ବୋଲି କୁହାଯାଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
