ନୂଆପଡା: ଶ୍ରମିକ ତଥା ଦିନ ମଜୁରିଆଙ୍କ ନ୍ୟାର୍ଯ୍ୟ ଦାବିରେ ନୂଆପଡାରେ ଏକତ୍ରିତ ହୋଇଛନ୍ତି ବିଭିନ୍ନ ଶ୍ରମିକ ସଂଗଠନ । ଶ୍ରମିକଙ୍କ ମୌଳିକ ଅଧିକାରକୁ ନେଇ ଆଲୋଚନା କରିଥିଲେ ସାମିଲ ହୋଇଥିବା ଶ୍ରମିକ ନେତାମାନେ ।
ଜିଲ୍ଲାରେ ତିଖାଲି ଡାକବଙ୍ଗଳା ଠାରେ ଶ୍ରମିକ ନେତା ଯଦୁମଣି ପାଣିଗ୍ରାହୀଙ୍କ ଆହ୍ବାନ କ୍ରମେ ବରିଷ୍ଠ ଶ୍ରମିକ ନେତା କେଶବ ବେହେରାଙ୍କ ଅଧ୍ୟକ୍ଷତାରେ ଶ୍ରମିକମାନଙ୍କୁ ନେଇ ଏକ ସାଧାରଣ ସଭା ଅନୁଷ୍ଠିତ ହୋଇଯାଇଛି । ସଭାରେ କୋଠାବାଡି ନିର୍ମାଣ ଶ୍ରମିକ ମଜଦୁରଙ୍କ ନ୍ୟାର୍ଯ୍ୟ ଦାବୀ ଓ ତାଙ୍କ ମୌଳିକ ଅଧିକାର ଉପରେ ଜିଲ୍ଲାରେ କାମ କରୁଥିବା ସମସ୍ତ ଶ୍ରମିକ ସଂଗଠନର ବରିଷ୍ଠ ନେତୃମଣ୍ଡଳୀ ଯୋଗଦେଇ ଆଲୋଚନାରେ ଅଂଶ ଗ୍ରହଣ କରିଛନ୍ତି ।
ରାଷ୍ଟ୍ରୀୟ ଟ୍ରେଡ଼ ୟୁନିଅନ,ଭାରତୀୟ ମଜଦୂର ସଂଘ, ଓଡିଶା କୋଠାବାଡି ମଜଦୂର ସଂଘ,ଚାଷୀ ମୂଲିଆ ସଂଘ,ଓଡିଶା ନିର୍ମାଣ ସଂଘ,ନିର୍ମାଣ ମଜଦୂର ସଂଘ,ବିଜୁ ଶ୍ରମିକ ସାମୃଦ୍ଧ ଏକତ୍ରିତ ହୋଇ ଆଗାମୀ ଦିନରେ ଜିଲ୍ଲାରେ କାମ କରିବାପାଇଁ ସଂକଳ୍ପ ନେଇଛନ୍ତି । ରବିବାର ମିଳିତ ଶ୍ରମିକ ସଂଗଠନର ବରିଷ୍ଠ ନେତୃମଣ୍ଡଳୀଙ୍କ ସର୍ବସମ୍ମତି କ୍ରମେ ନୂଆପଡା ଜିଲ୍ଲା ଶ୍ରମିକ ମହାସଂଘର ଆବାହକ ଭାବରେ ଶ୍ରମିକ ନେତା ଯଦୁମଣି ପାଣିଗ୍ରାହୀଙ୍କୁ ମନୋନୀତ କରିଛନ୍ତି । ଆଗାମୀ ଦିନରେ ପର୍ଯ୍ୟାୟ କ୍ରମେ ସଂଗଠନର ନେତୃମଣ୍ଡଳୀ ଚୟନ କରି ଶ୍ରମିକଙ୍କ ହକ ଅଧିକାର ପାଇଁ ସଂଗ୍ରାମ କରିବେ ବୋଲି ସଂକଳ୍ପ ନେଇଛନ୍ତି ।
ନୂଆପଡାରୁ ମୋତିଲାଲ ବାଗ,ଇଟିଭି ଭାରତ
