ନୂଆପଡା : ପରକୀୟା ପ୍ରୀତି ପାଇଁ ସ୍ତ୍ରୀକୁ ହତ୍ୟା କଲା ସ୍ବାମୀ । ଏଭଳି ଅଭାବନୀୟ ଘଟଣା ଘଟିଛି ନୂଆପଡା ଜିଲ୍ଲା ଖଡ଼ିଆଳ ଥାନା ଅନ୍ତର୍ଗତ ଚଲାନପଡା ଗ୍ରାମରେ । ଏହି ଘଟଣାକୁ ନେଇ ମୃତ ମହିଳାଙ୍କ ବାପଘର ଲୋକେ ଥାନାରେ ଅଭିଯୋଗ କରିଥିଲେ । ପରେ ଅଭିଯୋଗକୁ ଭିତ୍ତି କରି ପୋଲିସ ଅଭିଯୁକ୍ତ ସ୍ବାମୀକୁ ଗିରଫ କରିଛି । ଗିରଫ ଅଭିଯୁକ୍ତ ହେଲା ଯୁଧୀଷ୍ଠିର ବାରିକ ।
ସୂଚନାନୁସାରେ ଗତ 2009 ମସିହାରେ କାସିପଳା ଗାଁର କେଶବ ଚଲାନଙ୍କ ଝିଅ ସସ୍ମିତାଙ୍କ ସହିତ ଚଲାନପଡା ଗ୍ରାମର ଯୁଧୀଷ୍ଠିର ବାରିକଙ୍କ ବିବାହ ହୋଇଥିଲା । ତେବେ ବାହାଘର କିଛି ବର୍ଷ ସବୁ କିଛି ଠିକଠାକ ଚାଲିଥିଲା । ହେଲେ ଗତ କିଛି ବର୍ଷ ହେବ ଯୁଧୀଷ୍ଠିର ଅନ୍ୟ ଏକ ମହିଳାଙ୍କ ପ୍ରେମରେ ପଡ଼ିଥିଲେ । ଏହାକୁ ନେଇ ଉଭୟ ସ୍ବାମୀ, ସ୍ତ୍ରୀଙ୍କ ମଧ୍ୟରେ ବହୁ ସମୟରେ ଗଣ୍ଡଗୋଳ ଲାଗୁଥିଲା । ସସ୍ମିତା ଅନେକ ସମୟରେ ରୋକ ଲଗାଉଥିଲେ ।
ଆଜି ଯୁଧିଷ୍ଠିର ଓ ସସ୍ମିତାଙ୍କ ମଧ୍ୟରେ ଏହି କଥାକୁ ନେଇ ପୁଣିଥରେ ଝଗଡ଼ା ହୋଇଥିଲା । ଏଥିରେ ଯୁଧୀଷ୍ଠିର ଉତକ୍ଷିପ୍ତ ହୋଇ ସ୍ତ୍ରୀ ସସ୍ମିତାଙ୍କ ତଣ୍ଟିଚିପି ଦେଇଥିଲା । ଫଳରେ ସସ୍ମିତା ଅଣନିଶ୍ବାସୀ ହୋଇ ପଡ଼ିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା । ଏ ସମ୍ପର୍କରେ ସସ୍ମିତାଙ୍କ ବାପଘର ଲୋକେ ଜାଣିପାରି ନିକଟସ୍ଥ ଥାନାରେ ଲିଖିତ ଅଭିଯୋଗ କରିଥିଲେ । ପରେ ପୋଲିସ ଅଭିଯୋଗକୁ ଭିତ୍ତି କରି ଘଟଣାସ୍ଥଳରେ ପହଞ୍ଚି ଅଭିଯୁକ୍ତକୁ ଗିରଫ କରିଥିଲେ ।
ଇଟିଭି ଭାରତ, ନୂଆପଡ଼ା
