ନୂଆପଡା: ଜିଲ୍ଲାର ଜୟ କିଷାନ ମଜଦୂର ସଂଗ୍ରାମ ପରିଷଦ ଆବାହକ ଯଦୁମଣି ପାଣିଗ୍ରାହୀଙ୍କ ନେତୃତ୍ବରେ ପରିଷଦର ଶତାଧିକ ସଦସ୍ୟ ବିଭିନ୍ନ ସମସ୍ୟାର 17 ଦଫା ଦାବିପତ୍ର ନୂଆପଡା ଜିଲ୍ଲାପାଳଙ୍କୁ ପ୍ରଦାନ କରିଛନ୍ତି। ଏନେଇ ଜୟ କିଷାନ ମଜଦୂର ସଂଗ୍ରାମ ପରିଷଦର ସଦସ୍ୟ ମଙ୍ଗଳବାର ବିକ୍ଷୋଭ ପ୍ରଦର୍ଶନ କରିଛନ୍ତି।
କ୍ଷତିଗ୍ରସ୍ତ ଚାଷୀ ବେକରେ ମକାମାଲ, ମୁଣ୍ଡରେ କପା ଟୋପି, ହାତରେ ଚାଷ ଜମିରେ ନଷ୍ଟ ହୋଇଥିବା ଧାନ କେଣ୍ଡା ଧରି ବିକ୍ଷୋଭ ପ୍ରଦର୍ଶନ କରିଛନ୍ତି। ବର୍ତ୍ତମାନ ଜିଲ୍ଲାରେ ଧାନ ଅମଳ ଚାଲିଥିବାବେଳେ ଜିଲ୍ଲାରେ ଶୀଘ୍ର ଧାନ ମଣ୍ଡି ଖୋଲିବା, ମକା,କପା ଫସଲ ବିକ୍ରି କରିବା ପାଇଁ ଜିଲ୍ଲାରେ ମଣ୍ଡି ନ ଥିବାବେଳେ,ତୁରନ୍ତ ମଣ୍ଡି ବ୍ୟବସ୍ଥା ଦାବି କରିଛନ୍ତି ଚାଷୀ।
ବିଗତ ବର୍ଷ ମାନଙ୍କରେ ମଣ୍ଡିରେ ଟୋକନ ବ୍ୟବସ୍ଥାକୁ ନେଇ ଅବସ୍ଥା ଦେଖାଦେଇଛି ତେଣୁ ବିନା ଟୋକନରେ ଧାନ ବିକ୍ରି କରିବା ପାଇଁ ବ୍ୟବସ୍ଥା କରାଯାଉ ବୋଲି ସେମାନେ ଦାବି କରିଛନ୍ତି । ଧାନ କୁଇଣ୍ଟାଲ ପ୍ରତି 500 ଟଙ୍କା ବୋନସ ସହ FAQ ମାନର ଧାନ ବାହାନା ରେ ଚଳିତ ବର୍ଷ କଟନୀ ଛଟନି ନ କରିବା ପାଇଁ ଦାବି କରିଛନ୍ତି ।
ବକେୟା ନିର୍ମାଣ ଶ୍ରମିକ ମାନଙ୍କୁ କୋରୋନା ସହାୟତା 1500 ଟଙ୍କା ତୁରନ୍ତ ପ୍ରଦାନ କରିବା ସହ TMC ସେଣ୍ଟର ସହାୟତା 2000 ଟଙ୍କା ତୁରନ୍ତ ପ୍ରଦାନ କରାଯାଉ ବୋଲି ସେମାନେ କହିଛନ୍ତି । ଏଭଳି 17 ଦଫା ଦାବି ପୂରଣ କରିବା ପାଇଁ ଜିଲ୍ଲା ପ୍ରଶାସନ ପାଖରେ ଦାବି କରିଛନ୍ତି। ଦାବି ପୂରଣ ନ ହେଲେ ଆଗାମୀ ଦିନରେ ଆଇନ ଅମାନ୍ୟ ଆନ୍ଦୋଳନ କରିବେ ବୋଲି ଜୟ କିଷାନ ମଜଦୂର ସଂଗ୍ରାମ ପରିଷଦ ଚେତାବନୀ ଦେଇଛି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
