ନୂଆପଡା: ସରକାର ଗରିବଙ୍କୁ ଭଲରେ ରହିବା ପାଇଁ ବିଭିନ୍ନ ଯୋଜନାରେ ପକ୍କା ଘର ନିର୍ମାଣ କରୁଥିବା ବେଳେ ପ୍ରକୃତ ହିତାଧିକାରୀ ଏହି ଯୋଜନା ପାଇ ପାରୁନାହାନ୍ତି । ଏବେବି କାହାର ଘର ନାହିଁ ତ କିଏ ଭୋକ ଉପାସରେ ଦିନ କାଟୁଛନ୍ତି । ଏଭଳି ଏକ ଘଟଣା ଦେଖିବାକୁ ମିଳିଛି ନୂଆପଡା ଜ଼ିଲ୍ଲା ଖଡ଼ିଆଳ ବ୍ଲକ ଝୋଲପଥର ଗାଁରେ । ବିଧବା ମହିଳା ଖୀରଦେଇ ହେର୍ଣ୍ଣାଙ୍କ ପାଖରେ ଏଯାଏଁ ପହଞ୍ଚି ପାରିଲାନାହିଁ ସରକାରୀ ଯୋଜନା । ଅସହାୟ ଖୀରଦେଇ ହେର୍ଣ୍ଣା ଏବଂ ତାଙ୍କର 10ବର୍ଷର ନାବାଳକ ସନ୍ତାନ ଦୁଃଖ ଦୁର୍ଦ୍ଦଶାରେ ଦିନ କାଟୁଛନ୍ତି ।
ସ୍ବାମୀ ମିନିକେତନ ହେର୍ଣ୍ଣାଙ୍କ ମୃତ୍ୟୁକୁ 2ବର୍ଷ ବିତି ଯାଇଥିଲେ ସୁଦ୍ଧା ବେସାହାରା ଖୀରଦେଇ ହେର୍ଣ୍ଣାଙ୍କୁ ବିଧବା ଭତ୍ତା, ଜାତୀୟ ପରିବାର ମଙ୍ଗଳ ଯୋଜନା,ହରିଶ୍ଚନ୍ଦ୍ର ଯୋଜନା ଆଦି କିଛି ବି ମିଳିନଥିବା ଅଭିଯୋଗ କରିଛନ୍ତି । ତେବେ ସରକାରଙ୍କ ଜନ କଲ୍ୟାଣକାରୀ ଯୋଜନା କାହା ପାଇଁ ବୋଲି ପ୍ରଶ୍ନ କରିଛନ୍ତି ଗାଁର ସାଧାରଣ ଲୋକେ । ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ମିନିକେତନ ହେର୍ଣ୍ଣା, କିଡନୀ ରୋଗରେ ପୀଡିତ ହୋଇ ଚିକିତ୍ସା ଅଭାବରୁ ଆରପାରିକୁ ଚାଲିଗଲେ । ସେହିଦିନଠାରୁ ଅସହାୟ ମହିଳା ଖୀରଦେଇ ଏବଂ ତାଙ୍କର ପୁଅ ଭୋକ ଉପାସରେ ଦିନ କାଟୁଛନ୍ତି ।
ଏବେ ଏହି ଅସହାୟ ମହିଳାଙ୍କୁ ବିଧବା ଭତ୍ତା, ଜାତୀୟ ପରିବାର ମଙ୍ଗଳ ଯୋଜନା ସହାୟତା ତୁରନ୍ତ ଯୋଗାଇ ଦେବାକୁ ସାଧାରଣରେ ଦାବି ହୋଇଛି ।
ନୂଆ ପଡ଼ାରୁ ମୋତିଲାଲ ବାଗ, ଇଟିଭି ଭାରତ
