ନୂଆପଡା: ୪୩ ଜଣ ଦାଦନ ଶ୍ରମିକଙ୍କୁ ଉଦ୍ଧାର କରିଛି ଖଡ଼ିଆଳ ପୋଲିସ । ଉଦ୍ଧାର ହୋଇଥିବା ଶ୍ରମିକମାନେ ବଲାଙ୍ଗୀର, ସୋନପୁର, ବରଗଡ଼ ଆଦି ଜିଲ୍ଲାର ବୋଲି ସୂଚନା ଦେଇଛି ପୋଲିସ । ଆଜି(ଶୁକ୍ରବାର) ସନ୍ଧ୍ୟା ୬ଟା ବେଳେ ବସ ଖଡ଼ିଆଳ ବସ୍ଷ୍ଟାଣ୍ଡରୁ ବିଜୟୱାଡ଼ା ଅଭିମୁଖେ ବାହାରିଥିଲେ ଏହି ଶ୍ରମିକ । ତେବେ କୌଣସି ସୂତ୍ର ପୋଲିସ ଖବର ପାଇ ଖଡ଼ିଆଲ ବସ୍ଷ୍ଟାଣ୍ଡରେ ପହଞ୍ଚି ଶ୍ରମିକଙ୍କୁ ଉଦ୍ଧାର କରିଥିଲା ।
ବସ୍ ଷ୍ଟାଣ୍ଡ ନିକଟରେ ଏକ ଘରୋଇ ଯାତ୍ରୀବାହୀ ବସ୍କୁ ଅପେକ୍ଷା କରି ରହିଥିଲେ ଏହି ଶ୍ରମିକ । ଏହି ଯାତ୍ରୀବାହୀ ବସରେ ଦାଦନ ଶ୍ରମିକ ଚାଲାଣ ହେଉଥିବା ଖବର ପାଇଥିଲା ଖଡ଼ିଆଳ ପୋଲିସ । ତଦନ୍ତ ବେଳେ ବସ୍ରେ ୪୩ ଜଣ ଦାଦନ ଶ୍ରମିକ ଚାଲାଣ ହେଉଥିବା ଜାଣିବାକୁ ମିଳିଥିଲା ।
କାହା ଇଙ୍ଗିତରେ ଶ୍ରମିକମାନେ ଦାଦନ ଭାବରେ ଖଟିବାକୁ ଯାଉଥିଲେ ଏବଂ ଏଥିରେ କେଉଁ ଦଲାଲ ସାମିଲ ରହିଛନ୍ତି ତାହାକୁ ନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ । ପୋଲିସ ଏହାକୁ ନେଇ ଅଧିକ ତଦନ୍ତ ଜାରି ରଖିଛି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
