ନୂଆପଡା: ଜିଲ୍ଲା ଖଡ଼ିଆଳ ପ୍ରଥମ ଶ୍ରେଣୀ ବିଚାର ବିଭାଗୀୟ କୋର୍ଟରେ ଅଘଟଣ । ଜଣେ କନିଷ୍ଠ କିରାଣୀ ବେକରେ ରଶି ଲଗାଇ ଆତ୍ମହତ୍ୟା କରିଥିବା ଜଣାପଡ଼ିଛି । ମୃତ କିରାଣୀଙ୍କ ପରିଚୟ ଅଭିଳାଷ କୁମାର ଜଗତ ବୋଲି ଜଣାପଡିଛି । ଅଭିଳାଷଙ୍କ ଗାଁ ନୂଆପଡା ଜିଲ୍ଲା ବୋଡେନରେ ବୋଲି ଜଣାପଡିଛି ।
ପ୍ରାପ୍ତ ସୂଚନା ମତେ କିରାଣୀ ଅଭିଳାଷ ଜଗତ ଖରା ଛୁଟିରେ ନିଜ ଗାଁ ବୋଡେନ ଯାଇଥିଲେ । ତାଙ୍କର ଛୁଟି ଚଳିତ ମାସ 17 ତାରିଖ ପର୍ଯ୍ୟନ୍ତ ଥିଲା । ହେଲେ କୋର୍ଟରେ ପେଣ୍ଡିଂ କାମ କରାଇବା ପାଇଁ ତାଙ୍କୁ 12 ତାରିଖ ଠାରୁ କୋର୍ଟକୁ ଡକାଯାଇଥିଲା । ହେଲେ ମାନସୀକ ଚାପ ଯୋଗୁଁ ସେ ନିଜ ବେକରେ ରଶି ଲଗାଇ ଆତ୍ମହତ୍ୟା କରିଛନ୍ତି ବୋଲି ଅଭିଯୋଗ ହୋଇଛି ।
ମୃତକଙ୍କ ବାପା ହରିହର ଜଗତଙ୍କ ଅଭିଯୋଗ ଯେ ତାଙ୍କ ପୁଅକୁ ବରିଷ୍ଠ କିରାଣୀ ମାନେ ଅଧିକ କାମ ଦେଉଥିଲେ । ଯାହାଫଳରେ କୌଣସି ଉପାୟ ନପାଇ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଏନେଇ ଖଡ଼ିଆଳ ଥାନାରେ ଏକ ମାମଲା ରୁଜୁ ହୋଇ ଅଧିକ ତଦନ୍ତ ଚଳାଇଛି ଖଡ଼ିଆଳ ପୋଲିସ ।
ନୂଆପଡ଼ାରୁ ମୋତିଲାଲ ବାଗ, ଇଟିଭି ଭାରତ
