ନୂଆପଡ଼ା: କୋଭିଡ କଟକଣା ମଧ୍ୟରେ ସରିଲା ପ୍ରସିଦ୍ଧ ଛତର ଯାତ୍ରା । ନୂଆପଡ଼ା ଜିଲ୍ଲା ବନ ପାହାଡ଼ ଘେରା ଦୁର୍ଗମ ଆଦିବାସୀ ଅଧ୍ୟୁଷିତ ଦେଓଦରା ଗ୍ରାମ ଠାରେ ମହାମାରୀ କୋଭିଡ ନିୟମକୁ ପାଳନ କରି ମଙ୍ଗଳବାର ଅଧିଷ୍ଠାତ୍ରୀ ଦେବୀ ଇନ୍ଦ୍ରାଦି ମା'ଙ୍କ ଛତରା ଯାତ୍ରା ସଂପନ୍ନ ହୋଇଯାଇଛି । 24 ଗାଁର ବାସିନ୍ଦା ମିଳିତ ହୋଇ ଦେବୀ ମା'ଙ୍କ ପୂଜାର୍ଚ୍ଚନା କରିଛନ୍ତି ।
ସର୍ବ ପ୍ରଥମେ ଉପକାଗଙ୍ଗା ସ୍ଥିତ ମାଟି ଘର ଠାରେ ମାଟି ଦେବତାଙ୍କୁ ପୂଜାର୍ଚ୍ଚନା କରିବା ପରେ ଡୁମାଗୁଡ଼ିଆ ଠାରେ ସିନ୍ଦ୍ରାଦି, ଝାରୁଗୁଡୁ, ଗୁରମେଲବୁଢ଼ୀ ଆଦିମାତାଙ୍କୁ ପୂଜାକରି ବୋଦା ବଳି ଦେଇଛନ୍ତି ଝାଙ୍କର ଗାଁ ଲୋକେ । ପରେ ଇନ୍ଦ୍ରାଦି ମାଁଙ୍କ ପୀଠ ଦେଓଦରା ଗ୍ରାମ ଠାରେ ଯଥା ରୀତିନୀତି ଅନୁଯାୟୀ ଛତର ଯାତ୍ରା ଆରମ୍ଭ ହୋଇ ଶେଷ ହୋଇଯାଇଛି । କୋରୋନା କଟକଣା ମଧ୍ୟରେ ସ୍ବଳ୍ପ ସଂଖ୍ୟକ ଶ୍ରଦ୍ଧାଳୁଙ୍କ ଗହଣରେ ଛତର ଯାତ୍ରା ପାଳିତ ହୋଇଥିଲା । ଦେବୀ ମା 24 ଟି ଗାଁର ଶ୍ରଦ୍ଧାଳୁଙ୍କ ଠାରୁ ପୂଜା ପାଇବା ସହ ବୋଦା ବଳୀ ପାଇଛନ୍ତି । ରକ୍ତ ରଞ୍ଜିତ ଦେଓଦରା ମାଟିରେ ମନସ୍କାମନା ଧାରୀ ଶ୍ରଦ୍ଧାଳୁ ଅଦିଆ ପଡି ମା'ଙ୍କ ଶରଣ ଯାଇଛନ୍ତି ।
ଦେବୀ ମା ଦୁଃଖୀଙ୍କ ଦୁଃଖ ହରଣ କରନ୍ତି, ନିଃସନ୍ତାନଙ୍କୁ ସନ୍ତାନ ପ୍ରାପ୍ତି କରନ୍ତି ଓ ଗରିବଙ୍କୁ ଧନ ସମ୍ପତ୍ତି ପ୍ରଦାନ କରନ୍ତି ବୋଲି ସ୍ଥାନୀୟ ଲୋକଙ୍କ ପ୍ରଗାଢ ବିଶ୍ବାସ ରହିଛି । ତେବେ ଚଳିତ ବର୍ଷ କୋରୋନା କଟକଣା ପାଇଁ ଦେବୀ ମା'ଙ୍କ ଛତର ଯାତ୍ରା ଫିକା ଫିକା ଲାଗିଥିବା ଶ୍ରଦ୍ଧାଳୁ ପ୍ରକାଶ କରିଛନ୍ତି ।
ନୂଆପଡ଼ାରୁ ମୋତିଲାଲ ବାଗ, ଇଟିଭି ଭାରତ
