ନୂଆପଡା: ପାଣି ପରେ ଏବେ ମାଟି ଉପରେ ଆଖି । ଓଡିଶା ଜମିକୁ ଆଖି ପକାଇଛି ପଡୋଶୀ ଛତିଶଗଡ। ନୂଆପଡାର ନୂଆମାଲପଡାରେ ଥିବା 30 ଏକର ଜମିକୁ କବଜା କରିବାକୁ ଛତିଶଗଡ କରିଥିଲା ଉଦ୍ୟମ । ରାଜସ୍ବ ବିଭାଗ ଏହା ଉପରେ ହସ୍ତକ୍ଷେପ କରି ନିଜର ସୂଚନା ଫଳକ ଲଗାଇଥିଲା । ଆଉ ଏବେ ତାଙ୍କୁ ବି ଛତିଶଗଡ ଉଠାଇ ନେଇଥିବା ଅଭିଯୋଗ ହୋଇଛି ।
କେବଳ ମହାନଦୀ ପାଣି ଶୋଷୁନି, ଓଡିଶାର ଜମି ବି ଚଷିବାକୁ ପଡୋଶୀ ଛତିଶଗଡର ଲୋଲୁପ ଦୃଷ୍ଟି । ସୀମାନ୍ତରେ ଥିବା ନୂଆପଡାର ନୂଆମାଲପଡା ଜମିକୁ କବଜା କରିବାକୁ ଚାଲିଛି ହୀନ ପ୍ରୟାସ । ୨୦୧୮ ମସିହା ଜୁନ ୧୬ । ଏହି ଗାଁର 30 ଏକର ଜମିକୁ ନିଜ ରାଜ୍ୟର ଭୂମିହୀନ ଚାଷୀଙ୍କୁ ବାଣ୍ଟି ଦେଇଥିଲା ଛତିଶଗଡ । ଫଳରେ ସୀମାନ୍ତରେ ଥିବା ଉଭୟ ପାର୍ଶ୍ବର ଚାଷୀଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା । ଘଟଣାକୁ ଗୁରୁତର ସହ ନେଇ ଓଡିଶା ସରକାରଙ୍କ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ଭିତରକୁ ଅନୁପ୍ରବେଶ ଦଣ୍ଡନୀୟ ଅପରାଧ ନାଁରେ ବୋର୍ଡ ଲଗାଇଥିଲା ।
ଏପଟେ ଓଡିଶା ସରକାରଙ୍କ ବାରଣ ସତ୍ତ୍ବେ ଜମି ଉପରୁ ପଡୋଶୀ ରାଜ୍ୟର ନଜର ହଟୁନି । ରାତି ଅଧିଆ ସୂଚନା ଫଳକକୁ ଗାଏବ କରିନେଇଥିବା ଅଭିଯୋଗ କରିଛନ୍ତି ନୂଆମାଲପଡା ଗ୍ରାମବାସୀ । ସେପଟେ ଏନେଇ କ୍ୟାମେରା ଆଗରେ କିଛି ବି କହିବାକୁ ମନା କରିଛନ୍ତି ସ୍ଥାନୀୟ ତଦସିଲଦାର । ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
