2024 ଆମେରିକାରେ ସତ୍ତା ପରିବର୍ତ୍ତନର ବର୍ଷ, ଟ୍ରମ୍ପ ଶାସନ ଭାରତ ପାଇଁ ଆହ୍ବାନ ନା ସୁଯୋଗ

ଡୋନାଲ୍ଡ ଟ୍ରମ୍ପଙ୍କ ‘ଆମେରିକା ପ୍ରଥମ’ ନୀତି ବିଶ୍ବ ବଜାର ଓ ବାଣିଜ୍ୟକୁ କରିବ କି ପ୍ରଭାବିତ ? କେତେ ପ୍ରଭାବିତ ହେବ ଭାରତୀୟ ଉତ୍ପାଦନ ଶିଳ୍ପ, ରପ୍ତାନୀ-ଆମଦାନୀ, ମୁଦ୍ରାସ୍ଫୀତି ଏବଂ ଦ୍ବିପାକ୍ଷିକ ସଂପର୍କ ?

ହାଇଦ୍ରାବାଦ: ଭୂ-ରାଜନୈତିକ ଦୃଷ୍ଟିରୁ ବେଶ ଚର୍ଚ୍ଚିତ ଥିଲା ବିଦାୟୀ ବର୍ଷ-2024 । ଏକାଧିକ ରାଷ୍ଟ୍ର ଯୁଦ୍ଧଗ୍ରସ୍ତ ହେବା ସହ ଏକାଧିକ ରାଷ୍ଟ୍ରରେ ମଧ୍ୟ କ୍ଷମତା ପରିବର୍ତ୍ତନ ଦେଖିବାକୁ ମିଳିଥିଲା । ଏହା ମଧ୍ୟରେ ସର୍ବାଧିକ ଚର୍ଚ୍ଚାରେ ଥିଲା ବିଶ୍ବର ସର୍ବ-ଶକ୍ତିଶାଳୀ ରାଷ୍ଟ୍ର ଆମେରିକାର ରାଷ୍ଟ୍ରପତି ନିର୍ବାଚନ । ବର୍ଷ ଶେଷ ଭାଗ (ନଭେମ୍ବର)ରେ ହୋଇଥିବା ଏହି ନିର୍ବାଚନରେ ଆମେରିକାରେ କ୍ଷମତା ପରିବର୍ତ୍ତନ ଘଟିଛି । ବିଶ୍ବର ସାମରିକ, ସ୍ଥିରତା, ଅର୍ଥନୀତି ଓ କୂଟନୈତିକ ଦୃଶ୍ୟପଟ୍ଟକୁ ପରୋକ୍ଷରେ ନିୟନ୍ତ୍ରଣ କରୁଥିବା ଆମେରିକାର ଶାସନ ପରିବର୍ତ୍ତନ ପରେ ହେବାକୁ ଥିବା ନୀତିଗତ ପରିବର୍ତ୍ତନର ପ୍ରଭାବ ବିଶ୍ବବ୍ୟାପୀ ଅନୁଭୂତ ହେବାକୁ ଥିବାରୁ ଏହି ନିର୍ବାଚନୀ ଫଳାଫଳ ଥିଲା ବେଶ ପ୍ରାସଙ୍ଗିକ ।

• ନୂଆବର୍ଷ ସହ ଟ୍ରମ୍ପ ଶାସନ :-

ଆମେରିକାରେ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ 47ତମ ରାଷ୍ଟ୍ରପତି ଭାବେ ନିର୍ବାଚନ ଜିତି ପୁଣି ଥରେ ହ୍ବାଇଟ ହାଉସକୁ ଫେରିଛନ୍ତି । ରିପବ୍ଲିକାନ ପାର୍ଟିରୁ ପ୍ରାର୍ଥୀ ହୋଇଥିବା ଟ୍ରମ୍ପ ଏଥର ଡେମୋକ୍ରାଟିକ ପାର୍ଟି ପ୍ରାର୍ଥୀ ତଥା ଉପ-ରାଷ୍ଟ୍ରପତି କମଲା ହାରିସଙ୍କୁ ପରାସ୍ତ କରି ଆମେରିକା ସର୍ବୋଚ୍ଚ ସାମ୍ବିଧାନିକ ସ୍ଥାନ ଅଧିକାର କରିଛନ୍ତି । ବର୍ଷ 2025 ଆରମ୍ଭ ସହ ଆମେରିକାରେ ଟ୍ରମ୍ପ ଶାସନ ଆରମ୍ଭ ହୋଇଯିବ । ବିଦାୟୀ ରାଷ୍ଟ୍ରପତି ବାଇଡେନ ଓ ତାଙ୍କ ଦଳଠାରୁ ଟ୍ରମ୍ପ ଓ ତାଙ୍କ ଦଳର ନୀତି ପୃଥକ ହୋଇଥିବାରୁ ପୂର୍ବ ଶାସନ କାଳରେ କାର୍ଯ୍ୟକାରୀ ହୋଇଥିବା ଏକାଧିକ ନୀତି ଓ ନିଷ୍ପତ୍ତିରେ ଟ୍ରମ୍ପ ପ୍ରଶାସନ ପରିବର୍ତ୍ତନ କରିବା ପ୍ରାୟତଃ ସ୍ପଷ୍ଟ । ତେଣୁ ଏହି ପରିବର୍ତ୍ତିତ ନୀତି ବିଶ୍ବର ବିଭିନ୍ନ ପ୍ରଗତିଶୀଳ ରାଷ୍ଟ୍ରର ଅର୍ଥନୀତିକୁ ସିଧା ପ୍ରଭାବିତ କରିବ ବୋଲି କୁହାଯାଉଛି ।

• ଭୂ-ରାଜନୈତିକ ସ୍ଥିତିରେ ସୁଦୃଢ଼ ହେଉଛି ଭାରତ

ଏକବିଂଶ ଶତାବ୍ଦୀର ତୃତୀୟ ଦଶନ୍ଧିରେ ବିଶ୍ବର ଅନ୍ୟତମ ପ୍ରମୁଖ ରାଷ୍ଟ୍ର ଭାବେ ଭାରତ ଆତ୍ମପ୍ରକାଶ କରିବାରେ ଲାଗିଛି । ବିଶ୍ବର ତୃତୀୟ ବୃହତ୍ତମ ଅର୍ଥବ୍ୟବସ୍ଥା ସହ ବିକାଶିତ ଦେଶର ସମସ୍ତ ମାପଦଣ୍ଡ ଅତିକ୍ରମ କରିବା ପାଇଁ ଭାରତ ଏକ ସ୍ପଷ୍ଟ ରୋଡ-ମ୍ୟାପ ସହ ଆଗକୁ ବଢୁଛି । ଦକ୍ଷିଣ-ଏସିଆ ଓ ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରର ଏକ ସ୍ଥିର ତଥା ଦୃଢ ରାଷ୍ଟ୍ର ଭାବେ ସାମ୍ନାକୁ ଆସୁଥିବା ଭାରତକୁ ମଧ୍ୟରେ ଟ୍ରମ୍ପ ପ୍ରଶାସନର ପରିବର୍ତ୍ତିତ ନୀତି କିଛି ମାତ୍ରାରେ ପ୍ରଭାବିତ କରିପାରେ ।

• ଭାରତ ଉପରେ ଟ୍ରମ୍ପ ଶାସନର ସମ୍ଭାବ୍ୟ ପ୍ରଭାବ

ନିର୍ବାଚନ ସମୟରେ ଟ୍ରମ୍ପ ଯେଉଁ ନାରା ଦେଇଥିଲେ, ତାହା ତାଙ୍କ ପାଇଁ ନିର୍ବାଚନୀ ସଫଳତା ପାଲଟିଥିଲା ବୋଲି ଚର୍ଚ୍ଚା ହେଉଛି । ତାହା ଥିଲା "ଆମେରିକା ପ୍ରଥମ" । ଏହାର ଅର୍ଥ ହେଉଛି ପ୍ରତ୍ୟେକ କ୍ଷେତ୍ର ବିଶେଷ ଭାବେ ବିଶ୍ବ ଅର୍ଥନୀତିରେ ଆମେରିକାର ଅଧିକାର ଓ ସ୍ବାର୍ଥକୁ ସର୍ବୋଚ୍ଚ ପ୍ରାଥମିକତା ଦେବା । ବିଶ୍ବ ବଜାରକୁ ‘ଆମେରିକୀୟ ଡଲାର’ ହିଁ ନିୟନ୍ତ୍ରଣ କରୁଛି । ତେଣୁ ଟ୍ରମ୍ପଙ୍କ ଏହି ନାରା ଆର୍ଥିକ ନିଷ୍ପତ୍ତିରେ ପରିବର୍ତ୍ତନ ହୋଇପାରେ । ଫଳରେ ଆମେରିକାର ପୁଞ୍ଜି ନିବେଶ ପାଇଁ ଲକ୍ଷ୍ୟ ଧାର୍ଯ୍ୟ ଶୁଳ୍କକୁ ବୃଦ୍ଧି କରିବ ବୋଲି ଆଶା କରାଯାଉଛି । ଯାହା ଭାରତ ପରି ଉଦୀୟମାନ ତଥା ପ୍ରଗତିଶୀଳ ଅର୍ଥନୀତି ଉପରେ ପ୍ରତିକୂଳ ପ୍ରଭାବ ପକାଇପାରେ ।

ଆମେରିକାରେ ବଦଳିଲା ସତ୍ତା, ଟ୍ରମ୍ପ ଶାସନ ଭାରତ ପାଇଁ ଆହ୍ବାନ ନା ସୁଯୋଗ (ETV Bharat Odisha)

• ଭାରତ-ଆମେରିକା ବାଣିଜ୍ୟ ଗୁରୁତ୍ବପୂର୍ଣ୍ଣ ସ୍ଥିତିରେ

ଆମେରିକା ସହିତ ଭାରତର ବାଣିଜ୍ୟ ସମ୍ପର୍କ ଗୁରୁତ୍ୱପୂର୍ଣ୍ଣ ସ୍ଥିତିରେ ରହିଛି । ଆମେରିକା ଭାରତର ବୃହତ୍ତମ ବାଣିଜ୍ୟ ଭାଗୀଦାର ତାଲିକାରେ ରହିଛି । ଆର୍ଥିକବର୍ଷ 2024ରେ ଦୁଇ ଦେଶ ମଧ୍ୟରେ ବାଣିଜ୍ୟ କାରବାର ପ୍ରାୟ 120 ବିଲିୟନ ଡ଼ଲାରରେ ପହଞ୍ଚିଛି । ଯାହା ବିଶ୍ବ ବାଣିଜ୍ୟର ଏକ ମାଇଲଖୁଣ୍ଟ । ଟ୍ରମ୍ପଙ୍କ କ୍ଷମତାକୁ ଫେରିବା ଭାରତ ଆଡକୁ ଏକ ନୂତନ ଆହ୍ବାନ ଆଣିପାରେ । 2025 ଜାନୁଆରୀରେ ଟ୍ରମ୍ପ ଆମେରିକାର ରାଷ୍ଟ୍ରପତି ଭାବେ ବିଧିବଦ୍ଧ ଦାୟିତ୍ବ ଗ୍ରହଣ କରିବା ସହ ବୟନଶିଳ୍ପ, ରାସାୟନିକ ପଦାର୍ଥ ଏବଂ ଅଟୋମୋବାଇଲ୍ କ୍ଷେତ୍ରରେ ରପ୍ତାନି ପ୍ରଭାବିତ ହୋଇପାରେ । ପାର୍ଟନର-ଟ୍ୟାକ୍ସ ଏବଂ ଅନ୍ତର୍ଜାତୀୟ ବାଣିଜ୍ୟ ଅର୍ଥନୈତିକ ନୀତି ଭାରତୀୟ ଅର୍ଥନୀତିକୁ ମଧ୍ୟ ପ୍ରଭାବିତ କରିପାରେ ।

ଭାରତ-ଆମେରିକା ବାଣିଜ୍ୟିକ ସମ୍ପର୍କ ଗୁରୁତ୍ୱପୂର୍ଣ୍ଣ ଆମେରିକା ଭାରତର ବୃହତ୍ତମ ବାଣିଜ୍ୟ ଭାଗୀଦାର ତାଲିକାରେ ଆର୍ଥିକବର୍ଷ 2024ରେ ଦୁଇ ଦେଶ ମଧ୍ୟରେ ବାଣିଜ୍ୟ କାରବାର ପ୍ରାୟ 120 ବିଲିୟନ ଡଲାର ବୟନ ଶିଳ୍ପ, ରାସାୟନିକ ପଦାର୍ଥ ଏବଂ ଅଟୋମୋବାଇଲ୍ କ୍ଷେତ୍ରରେ ରପ୍ତାନି ପ୍ରଭାବିତ ହୋଇପାରେ ପାର୍ଟନର-ଟ୍ୟାକ୍ସ ଏବଂ ଅନ୍ତର୍ଜାତୀୟ ବାଣିଜ୍ୟ ଅର୍ଥନୈତିକ ନୀତି ଭାରତୀୟ ଅର୍ଥନୀତିକୁ ମଧ୍ୟ ପ୍ରଭାବିତ କରିପାରେ

• ଆମଦାନୀ ଶୁଳ୍କ ବୃଦ୍ଧି କରିପାରନ୍ତି ଟ୍ରମ୍ପ

ଟ୍ରମ୍ପ ସମସ୍ତ ଆମଦାନୀ ଉପରେ 10-20 ପ୍ରତିଶତ ଶୁଳ୍କ ଲାଗୁ କରିବାକୁ ନିର୍ବାଚନୀ କ୍ୟାମ୍ପନିଂରେ ପ୍ରସ୍ତାବ ଦେଇଥିଲେ । ବିଶେଷ କରି ଚୀନର ସାମଗ୍ରୀ ଉପରେ ବିଶେଷ ଭାବେ 60 ପ୍ରତିଶତ ଶୁଳ୍କ ଲାଗୁ କରାଯିବା ନେଇ ଟ୍ରମ୍ପଙ୍କ ସଙ୍କେତ ପୁରା ବିଶ୍ବରେ ଚହଳ ସୃଷ୍ଟି କରିଥିଲା । ଯଦି ଟ୍ରମ୍ପ ଟ୍ୟାକ୍ସ ପରିମାଣକୁ ପୁନଃ ସ୍ଥିର କରନ୍ତି କିମ୍ବା ଆମଦାନୀ କର ବୃଦ୍ଧି କରନ୍ତି, ତେବେ ଅଟୋ ମୋବାଇଲ ସେକ୍ଟର ଆହ୍ବାନର ସମ୍ମୁଖୀନ ହେବାର ଯଥେଷ୍ଟ ଆଶଙ୍କା ରହିଛି । ବିଶେଷ ଭାବରେ ରପ୍ତାନି କ୍ଷେତ୍ରରେ ଭଲ ସ୍ଥିତିରେ ଥିବା ଭାରତୀୟ ଉତ୍ପାଦନକାରୀଙ୍କୁ ଏହି ନୀତି ଗମ୍ଭୀର ଭାବେ ପ୍ରଭାବିତ କରିପାରେ ।

ଏହା ମଧ୍ୟ ପଢ଼ନ୍ତୁ-

• ନବୀକରଣଯୋଗ୍ୟ ଶକ୍ତି ମିଶନ ପ୍ରଭାବିତ ହୋଇପାରେ :

ପାରମ୍ପରିକ ଜୀବାଶ୍ମ ଇନ୍ଧନ କ୍ଷେତ୍ରରେ ଟ୍ରମ୍ପଙ୍କ ଅଧିକ ଆଗ୍ରହ ରହିଥିବା କୁହାଯାଏ । ଏହି ଆଭିମୁଖ୍ୟ ଅକ୍ଷୟ ଶକ୍ତି ପ୍ରଯୁକ୍ତିବିଦ୍ୟାର ଚାହିଦା ହ୍ରାସ ହୋଇପାରେ । ଅକ୍ଷୟ ଶକ୍ତି କ୍ଷେତ୍ରରେ ବିଶ୍ବର ପୁଞ୍ଜି ବିନିଯୋଗକୁ ମନ୍ଥର କରିପାରେ । ଯଦି ଜୀବାଶ୍ମ ଇନ୍ଧନ ବିନିଯୋଗ ସର୍ବଭାରତୀୟ ସ୍ତରରେ ବୃଦ୍ଧି ପାଏ, ତେବେ ଅକ୍ଷୟ ଶକ୍ତି ସହିତ ଅନ୍ତର୍ଜାତୀୟ ସମ୍ପର୍କ ଥିବା ଭାରତୀୟ ସଂସ୍ଥାଗୁଡ଼ିକର ଗତି ଓ ସ୍ଥିତି ଦୁର୍ବଳ ହୋଇପାରେ । ଯାହା ଭାରତର ଅକ୍ଷୟ ଶକ୍ତି ଭିଜନ ଉପରେ ବିଶେଷ ପ୍ରଭାବ ପକାଇପାରେ ବୋଲି ଆକଳନ କରାଯାଉଛି ।

• ଡଲାର-ଟଙ୍କା (USD-INR) ବିନିମୟ ମୂଲ୍ୟରେ ପରିବର୍ତ୍ତନ :

ପୂର୍ବ କାର୍ଯ୍ୟକାଳରେ ଏହା ସ୍ପଷ୍ଟ ଯେ, ଟ୍ରମ୍ପ ରାଷ୍ଟ୍ରପତି ଭାବେ ବାଣିଜ୍ୟ ଅଭିବୃଦ୍ଧିକୁ ସମର୍ଥନ କରୁଥିବା ନୀତି ଉପରେ ଧ୍ୟାନ ଦେଇଆସିଛନ୍ତି । ଯଦି ଆମେ ଏହି ଆଭିମୁଖ୍ୟ ଏଥର କାର୍ଯ୍ୟକାଳରେ ସମାନ ରହେ, ତେବେ କର୍ପୋରେଟ୍ ଟିକସ ହ୍ରାସ ଏବଂ ବାଣିଜ୍ୟ ସଂରକ୍ଷଣବାଦ ଆମେରିକୀୟ ଡଲାରକୁ ଅଧିକ ପ୍ରଭାବଶାଳୀ କରିପାରେ । ବିଶ୍ବ ବଜାରରେ ଏକ ଶକ୍ତିଶାଳୀ ଆମେରିକୀୟ ଡଲାରର ଅର୍ଥ ହେଉଛି ଭାରତ ପାଇଁ ଆମଦାନୀ ଅଧିକ ମହଙ୍ଗା ହୋଇପାରେ । ଯାହା ସିଧାସଳଖ ଦେଶର ମୁଦ୍ରାସ୍ଫୀତିକୁ ପ୍ରଭାବିତ କରିବ । ତଥାପି, ଭାରତୀୟ ରପ୍ତାନିକାରୀଙ୍କ ପାଇଁ ଏହା ମଧ୍ୟ ଏକ ସମ୍ଭାବ୍ୟ ସକରାତ୍ମକ ଦିଗ ସାବ୍ୟସ୍ତ ହୋଇପାରେ । ନିବେଶକମାନଙ୍କୁ ମଧ୍ୟ ଡଲାର- ରୁପିଆ ବିନିମୟ ମୂଲ୍ୟ ଉପରେ ତୀକ୍ଷ୍ଣ ନଜର ରଖିବାକୁ ହେବ ।

ଏହା ମଧ୍ୟ ପଢ଼ନ୍ତୁ-

• ନୂଆ ଇମିଗ୍ରେସନ ନୀତି

ଏହି କ୍ଷେତ୍ରରେ ପରିବର୍ତ୍ତନ ଭାରତର କର୍ମଜୀବୀ କ୍ଷେତ୍ର ଉପରେ ସିଧା ପ୍ରଭାବ ପକାଇବ । ବିଶେଷ କରି ଆମେରିକାରେ ବୈଷୟିକ କ୍ଷେତ୍ରରେ କାର୍ଯ୍ୟରତ ଥିବା ଭାରତ ପାଇଁ ଟ୍ରମ୍ପଙ୍କ ଇମିଗ୍ରେସନ ନୀତି ଆହ୍ବାନ ସାବ୍ୟସ୍ତ ହୋଇପାରେ । ତାଙ୍କର ପ୍ରଥମ କାର୍ଯ୍ୟକାଳ ମଧ୍ୟରେ, ‘ଏଚ-ଓ୍ବାନ ବି ଭିସା’ କାର୍ଯ୍ୟକ୍ରମ ଉପରେ ପ୍ରତିବନ୍ଧକ ବୃଦ୍ଧି କରାଯାଇଥିଲା । ଏହି ନିଷ୍ପତ୍ତି କୁଶଳୀ ଭାରତୀୟଙ୍କୁ କର୍ମନିଯୁକ୍ତି ଦେବା ଦିଗରେ ପ୍ରଭାବିତ କରିଥିଲା ​। ଆମେରିକୀୟ ଶ୍ରମିକଙ୍କ ବିସ୍ଥାପନକୁ ରୋକିବା ପାଇଁ ଟ୍ରମ୍ପଙ୍କ "ଆମେରିକୀୟ ନାଗରିକଙ୍କୁ ନିଯୁକ୍ତି" ଆଭିମୁଖ୍ୟ ସେଠାରେ ଥିବା ଭାରତୀୟ କର୍ମଜୀବୀଙ୍କ ପାଇଁ ମଧ୍ୟ ଆହ୍ବାନ ସୃଷ୍ଟି କରିପାରେ । ଏହି ପରିବର୍ତ୍ତିତ ନିଷ୍ପତ୍ତି ଭିସାଧାରୀଙ୍କ ପାଇଁ କଠୋର ଯୋଗ୍ୟତା ମାପଦଣ୍ଡ ଆଣିପାରେ ।

• ସମ୍ଭାବ୍ୟ ଲାଭାନ୍ବିତ ହେବାକୁ ଥିବା ବ୍ୟବସାୟିକ କ୍ଷେତ୍ର:-

ସୂଚନା ପ୍ରଯୁକ୍ତିବିଦ୍ୟା ସେବା:

ଟ୍ରମ୍ପଙ୍କ 'ଆମେରିକା ପ୍ରଥମ' ନୀତି ବାଣିଜ୍ୟରେ ଭାରତ ପାଇଁ କେତେକାଂଶରେ ଲାଭାଦାୟକ ସାବ୍ୟସ୍ତ ହୋଇପାରେ । ବିଶେଷ କରି ଚୀନର ପ୍ରଭାବ ହ୍ରାସ ସହ ଭାରତକୁ ଆଉଟସୋର୍ସିଂ ସେବାର ଅନ୍ୟତମ ବିକଳ୍ପ ଭାବେ ସୁଯୋଗ ମିଳିପାରେ । ଭାରତରେ ଆଇଟି ସେବା କମ୍ପାନୀଗୁଡିକ ଆଉଟସୋର୍ସିଂର ଚାହିଦା ଦ୍ୱାରା ଉପକୃତ ହୋଇପାରିବେ । ବିଶେଷ କରି ଆମେରିକା ଭିତ୍ତିକ ଗ୍ରାହକଙ୍କ ଉପରେ ସେମାନଙ୍କର ନିର୍ଭରଶୀଳତା ବୃଦ୍ଧି ହେବାର ସମ୍ଭାବନା ରହିବ ।

ଏହା ମଧ୍ୟ ପଢ଼ନ୍ତୁ-

• ଫାର୍ମାସ୍ୟୁଟିକାଲ୍ସ କ୍ଷେତ୍ର ପ୍ରଭାବିତ ହେବ ନାହିଁ

ଟ୍ରମ୍ପଙ୍କ ନେତୃତ୍ବାଧୀନ ନୂତନ ପ୍ରଶାସନ ଅତ୍ୟାବଶ୍ୟକ ତଥା ଅଧିକ ଚାହିଦା ଥିବା ଔଷଧର ମୂଲ୍ୟକୁ ବୃଦ୍ଧି କରିବାର ସମ୍ଭାବନା ରହିଛି । ଯାହା ଏହି କ୍ଷେତ୍ରର ସମ୍ଭାବ୍ୟ ଲାଭ ପରିମାଣକୁ ହ୍ରାସ କରିପାରେ । ଅବଶ୍ୟ, ଏହି ପଦକ୍ଷେପ ଫାର୍ମାସ୍ୟୁଟିକାଲ୍ସ କ୍ଷେତ୍ରରେ ସାମଗ୍ରିକ ଚାହିଦା କିମ୍ବା ଯୋଗାଣ ଶୃଙ୍ଖଳା ଉପରେ କୌଣସି ପ୍ରଭାବ ପକାଇବ ବୋଲି ଆଶା କରାଯାଉ ନାହିଁ । ଫଳସ୍ୱରୂପ କେବଳ ସାମାନ୍ୟ ମନ୍ଥରତା ବା କ୍ଷତି ସାମ୍ନାକୁ ଆସିପାରେ । ଯାହା କୌଣସି ଭାରତୀୟ ଫାର୍ମାସ୍ୟୁଟିକାଲ୍ସ କ୍ଷେତ୍ରକୁ ପ୍ରଭାବିତ କରିବନାହିଁ ।

ବ୍ୟୁରୋ ରିପୋର୍ଟ, ଇଟିଭି ଭାରତ