ନୂଆପଡା: 'ମୋ ସରକାର’ ଓ 5'ଟି' ଯୋଜନାକୁ ନେଇ ସବୁ ଜିଲ୍ଲାରେ ଧରପକଡ । 5 ‘ଟି’ ସଚିବଙ୍କ ଘନଘନ ବିଭିନ୍ନ ଜିଲ୍ଲା ପରିଦର୍ଶନ ଓ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ସମସ୍ତ ସରକାରୀ ବାବୁ ଆତଙ୍କିତ ଅବସ୍ଥାରେ ରହିଛନ୍ତି। ହେଲେ 5T ସଚିବଙ୍କ ଗସ୍ତ ପରେ ବି ସ୍ଥିତି ଯଥା ପୂର୍ବଂ ତଥା ପରଂ । ଯନ୍ତ୍ରଣାରେ ତଳେ ଗଡୁଛନ୍ତି ଗର୍ଭବତୀ । ନାହାଁନ୍ତି ଡାକ୍ତର । ଶୁଣୁନାହାନ୍ତି ନର୍ସ ।
ଏପରି ଅଭାବନୀୟ ଘଟଣା ନୂଆପଡା ଜ଼ିଲ୍ଲା ଖଡ଼ିଆଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଦେଖିବାକୁ ମିଳିଛି। ସରକାରଙ୍କ 5'ଟି' ମୋ ସରକାର ଆହ୍ବାନ ହାଟରେ ପଡି ଦାଣ୍ଡରେ ଗଡୁଛି । 5'ଟି' ସଚିବ ଭି କାର୍ତ୍ତିକେନ୍ ପାଣ୍ଡିଆନ ନୂଆପଡା ଜ଼ିଲ୍ଲାକୁ ଦିନିକିଆ ଗସ୍ତରେ ଆସି ଜ଼ିଲ୍ଲା ମୁଖ୍ୟ ଚିକିତ୍ସାଳୟ ସ୍ଥିତି ପରଖି ଫେରିଯାଇଥିବା ସପ୍ତାହ ନପୁରୁଣୁ ଖଡ଼ିଆଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଦେଖାଦେଇଛି ରୋଗୀସେବାର ବିପର୍ଯ୍ୟାସ୍ତ ପରିସ୍ଥିତି ।
ସୂଚନା ଅନୁସାରେ, ଘଟଣାକୁ କେହି ଜଣେ ମୋବାଇଲରେ ସୁଟିଂ କରି ଭାଇରାଲ କରିବା ପରେ ରୋଗୀସେବାର ଅସଲି ଚିତ୍ର ସାମ୍ନାକୁ ଆସିଛି। ରବିବାର ଡାକ୍ତରଙ୍କ ଅନୁପସ୍ଥିତିରେ 10 ଜଣ ଗର୍ଭବତୀ ମହିଳାଙ୍କୁ ଏକା ସ୍ଥାନରେ ତଳେ ବସାଇ ବେପୁରିଆ ଭାବରେ ରକ୍ତ ଚଢାଯାଉଥିବା ଦେଖାଦେଇଛି ।
ସେହିଭଳି ସବୁଠାରୁ ସମ୍ବେଦନଶୀଳ ଘଟଣା ଜଣେ ମହିଳା ଜନନୀ ଯନ୍ତ୍ରଣାରେ ଛଟପଟ ହେଉଛନ୍ତି। ସ୍ବାସ୍ଥ୍ୟକେନ୍ଦ୍ର ଚଟାଣରେ ଗଡି ଯାଉଛନ୍ତି। ବ୍ୟାକୁଳରେ ମା' ମା' ବୋଲି ଚିତ୍କାର କରୁଛନ୍ତି । ହେଲେ ପାଖରେ ଡାକ୍ତର କିମ୍ବା ନର୍ସ କାହାରି ଦେଖାନାହିଁ ।
ସରକାର 'ମୋ ସରକାର' ଯୋଜନା କରି ବାହୋସ୍ପୋଟ ମାରୁଥିବାବେଳେ, 5T ସଚିବ ପ୍ରଥମ ପର୍ଯ୍ୟାୟରେ ସ୍ବାସ୍ଥ୍ୟକେନ୍ଦ୍ର ବୁଲି ଦେଖୁଛନ୍ତି । କିନ୍ତୁ ସଚିବ ଗଲାପରେ ବାସ୍ତବ ଚିତ୍ର ଆଖିରେ ନଦେଖିଲେ ବିଶ୍ବାସ କରିହେବନି ବୋଲି ସାଧାରଣରେ ଚର୍ଚ୍ଚା ହେଉଛି ।
ନୂଆପଡାରୁ ମୋତିଲାଲ ବାଗ୍, ଇଟିଭି ଭାରତ
