ନୟାଗଡ଼: ଅଜଣା ରୋଗରେ ପୀଡିତ ହୋଇ ଶଯ୍ୟାଶାୟୀ ଯୁବକ । ବସାଉଠା କରି ପାରୁନଥିବା ବେଳେ ପେଟ ଫୁଲାଇ ଶୋଇ ରହିଛି 21 ବର୍ଷିୟ ଯୁବକ ସନ୍ତୋଷ ବିଶ୍ବାଳ। ନବମ ଶ୍ରେଣୀରେ ପଢୁଥିବାବେଳେ ହଠାତ୍ ଏହି ଅଜଣା ରୋଗର ଶିକାର ହୋଇଥିଲେ ସନ୍ତୋଷ । ଏପଟେ ପାଖରେ ଯଥେଷ୍ଟ ଅର୍ଥ ନଥିବାରୁ ପୁଅର ଚିକିତ୍ସା କରାଇପାରୁ ନାହାଁନ୍ତି ବିଧବା ମା’ । ଏହି ଘଟଣାଟି ହେଉଛି ନୟାଗଡ ଜିଲ୍ଲା ଖଣ୍ଡପଡ଼ା ବ୍ଲକ ଅନ୍ତର୍ଗତ ଗୁଣ୍ଠୁଣି ଗାଁର । ସେହି ଗାଁର ସ୍ବର୍ଗତ ଅର୍ଜୁନ ବିଶ୍ବାଳଙ୍କ ପୁଅ ହେଉଛି ସନ୍ତୋଷ ।
ଘଟଣାରୁ ପ୍ରକାଶ ଯେ, ଦାଦନ ଶ୍ରମିକ ଭାବେ ଜାମୁ-କାଶ୍ମୀରକୁ ଯାଇ ଥିଲେ ସ୍ବାମୀ ଅର୍ଜୁନ ବିଶ୍ବାଳ l କାମ କରି ଯାହା ଅର୍ଥ ପଠାନ୍ତି, ସେଥିରେ ପରିବାର ଚଳେ l ହେଲେ ଭାଗ୍ୟର ବିଡମ୍ବନା ଦେଖ, ସ୍ବାମୀ କାମ କରୁଥିବା ବେଳେ ବିଦ୍ୟୁତ ଆଘାତ ପ୍ରାଣ ହରାଇଲେ l କିନ୍ତୁ ତାଙ୍କ ମୃତଦେହ ଆଉ ଗୁଣ୍ଠୁଣିଗାଁକୁ ଆସି ପାରିଲା ନାହିଁ l ପୁଅ ବାପାଙ୍କୁ ଦେଖି ପାରିଲାନି କି ପତ୍ନୀ ସ୍ବାମୀକୁ ଦେଖିପାରିଲେ ନାହିଁ l ପତ୍ନୀଙ୍କ ଆଖିରୁ ଦୁଃଖର ଲୁହ ସୁଖୀ ନଥିବା ବେଳେ ଆଉ ଏକ ଦୁଃଖର ବୋଝ ପତ୍ନୀ ସସି ବିଶ୍ବାଳଙ୍କ ଉପରେ l
ସ୍ବାମୀଙ୍କୁ ହରାଇବାର 15 ବର୍ଷ ବିତିଯାଇଥିଲା ବେଳେ 21ବର୍ଷୀୟ ପୁଅ ସନ୍ତୋଷବିଶ୍ବାଳ ଏବେ ରୋଗରେ ପୀଡ଼ିତ ହୋଇ ଶଯ୍ୟାଶାୟୀ । ପୁଅର ଚିକିତ୍ସା ନିମନ୍ତେ ଜମି ବାଡ଼ି ବିକ୍ରି କରି ବିଭିନ୍ନ ଡାକ୍ତରଖାନା ବୁଲାଇ ନୟାନ୍ତ ହୋଇ ଗଲେଣି ଶଶୀମଣି l ଶେଷରେ ନାଚାର ହୋଇ ସରକାରୀ ସହାୟତା ପାଇଁ ସେ ଗୁହାରି କରିଛନ୍ତି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
