ନୟାଗଡ଼: ଜିଲ୍ଲାର ରଣପୁର ଉପର ମଣିନାଗକୁ ଯାଇଥିବା ରାସ୍ତା କଡରେ ଜଣେ ମହିଳାଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି l ମଣିନାଗ ପାହାଡ ଶିଖରକୁ ଯିବା ବାଟରେ ଏକ ଗଛରେ ଜଣେ ମହିଳାଙ୍କ ମୃତଦେହ ଝୁଲୁଥିବା ଲୋକେ ଦେଖିବାକୁ ପାଇଥିଲେ l ପରେ ଖବର ପାଇ ରଣପୁର ଥାନା ପୋଲିସ ଘଟଣା ସ୍ଥଳରେ ପହଞ୍ଚି ମହିଳାଙ୍କ ମୃତଦେହ ଜବତ କରିଛି । ମୃତ ମହିଳା ଏକ ନିମ୍ବ ଗଛରେ ଓଢଣୀ ଦ୍ବାରା ରଶି ଲଗାଇଥିବାର ଜଣାପଡୁଛି ।
ସେ ବ୍ୟବହାର କରୁଥିବା ସ୍କୁଟି ସେଠାରେ ଥୁଆ ହୋଇଛି l ମହିଳା ଜଣଙ୍କ ରଣପୁର ଥାନା ହଂସରା ଗ୍ରାମର ମାନସୀ ରାଉତରା । ସେ ବ୍ରଜରାଜପୁର ପଞ୍ଚାୟତ ଗୋଳାପୋଖରୀ ଗ୍ରାମର ସୁବାସ ରାଉତରାୟଙ୍କୁ ବିବାହ କରିଥିଲେ l ପାରିବାରିକ ସମସ୍ୟାକୁ ନେଇ ମହିଳା ଜଣକ ଆତ୍ମହତ୍ୟା କରିଥାଇପାରନ୍ତି ବୋଲି କଳ୍ପନାଜଳ୍ପନା କରୁଛନ୍ତି ସ୍ଥାନୀୟବାସୀ ।
ମାନସୀ ରଣପୁରର ହରଚଣ୍ଡି ସାହିରେ ଭଡା ଘରେ ରହି ଆସୁଥିଲେ l ପୋଲିସ ମୃତଦେହ ଜବତ କରି ରଣପୁର ମେଡିକାଲକୁ ପଠାଇଥିଲା l ଗତକାଲିଠୁ ପୋଲିସ ତଦନ୍ତ ଜାରି ରଖିଛି l ଏହା ଆତ୍ମହତ୍ୟା ନା ହତ୍ୟା ସେ ନେଇ ସ୍ପଷ୍ଟ ହୋଇପାରିନି l
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
