ନୟାଗଡ଼: ଲାଞ୍ଚ ନେବାବେଳେ ଭିଜିଲାନ୍ସ ହାତରେ ଧରା ପଡିଲେ ଭାପୁର ବ୍ଲକ ପ୍ରାଣୀ ଚିକିତ୍ସା ଅଧିକାରିଣୀ (BVO) ମମତା ହେମ୍ରମ । ଭାପୁର ବ୍ଲକ ଢିପମାଳର ପ୍ରହଲ୍ଲାଦ ନାୟକ ନାମକ ଜଣେ ଛେଳି ଚାଷୀଙ୍କ ସବସିଡ଼ି ଟଙ୍କା କରାଇ ଦେବା ପାଇଁ ଅଫିସ ପକ୍ଷରୁ ତାଙ୍କୁ 15 ହଜାର ଟଙ୍କା ଦାବି କରା ଯାଉଥିଲା । ତେବେ ଏନେଇ ପ୍ରହଲ୍ଲାଦ ନୟାଗଡ଼ ଭିଜିଲାନ୍ସକୁ ଖବର ଦେଇଥିଲେ ।
ଗୁରୁବାର ପୂର୍ବ ଯୋଜନା ମୁତାବକ ପ୍ରହଲ୍ଲାଦ ଟଙ୍କା ଦେବା ବେଳେ ଭିଜିଲାନ୍ସ ଅଧିକାରୀ ବ୍ଲକ ପ୍ରାଣୀ ଚିକିତ୍ସା ଅଧିକାରୀ ଓ ଅଫିସର ଜଣେ ପିଅନଙ୍କୁ ଗିରଫ କରିଛନ୍ତି । ଏହାସହ ତାଙ୍କ ଠାରୁ ଟଙ୍କା ଜବତ କରିଥିବା ନେଇ ନୟାଗଡ଼ ଭିଜିଲାନ୍ସ ଡିଏସପି କହିଛନ୍ତି ।
ସେପଟେ ଏହାକୁ ଖଣ୍ଡନ କରିଛନ୍ତି ପ୍ରାଣୀ ଚିକିତ୍ସା ଅଧିକାରିଣୀ l ସେ କହିଛନ୍ତି ଉକ୍ତ ଚାଷୀଙ୍କ ଠାରୁ ଟଙ୍କା ମାଗିବା ପାଇଁ ଜିଲ୍ଲା ପ୍ରାଣୀ ଚିକିତ୍ସା ଅଧିକାରୀ ବାରମ୍ବାର ତାଙ୍କୁ ଚାପ ପକାଉଥିଲେ । କିନ୍ତୁ ସେ ଏହାକୁ ବାରଣ କରୁଥିବାବେଳେ ଆଜି ସେ ଟଙ୍କା ନେଇ ନଥିବା କହିଛନ୍ତି ଗିରଫ ବ୍ଲକ ପ୍ରାଣୀ ଚିକିତ୍ସା ଅଧିକାରୀ ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
