ନୟାଗଡ: ପଞ୍ଚାୟତ ନିର୍ବାଚନ ପାଇଁ ସଜବାଜ ହେଲାଣି ନୟାଗଡ଼ ଜିଲ୍ଲା ରଣପୁର ବିଜେପି l ରାଜ୍ୟରେ ଏକ ଚର୍ଚ୍ଚିତ ନିର୍ବାଚନ ମଣ୍ଡଳୀ ଭାବେ ବେଶ୍ ପରିଚିତ ରଣପୁର । ଆଗାମୀ ପଞ୍ଚାୟତ ନିର୍ବାଚନ ପାଇଁ ବିଜେଡି ଏବଂ ବିଜେପି ପ୍ରସ୍ତୁତି ହେଲେଣି କିନ୍ତୁ କଂଗ୍ରେସ ମଧ୍ୟ ପଛରେ ନାହିଁ । ବିଜେପି ଦଳ ପକ୍ଷରୁ ପଞ୍ଚାୟତ ନିର୍ବାଚନରେ ସଫଳତା ହାସଲ କରିବା ପାଇଁ ଆରମ୍ଭ ହୋଇଛି କସରତ ।
ତେବେ ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର ରଣପୁର ନିର୍ବାଚନ ମଣ୍ଡଳୀକୁ ଗସ୍ତ କରି ଭାରତୀୟ ଜନତା ପାର୍ଟିର ବିଭିନ୍ନ କର୍ମକର୍ତ୍ତା ସମ୍ମିଳନୀରେ ଯୋଗ ଦେଇଛନ୍ତି । ତୃଣମୂଳ ସ୍ତରରୁ ସଙ୍ଗଠନକୁ ମଜବୁତ କରିବା ପାଇଁ ନିଜର କର୍ମୀଙ୍କୁ ନେଇ ସମ୍ବିତ ଅଣ୍ଟା ଭିଡିଛନ୍ତି ।
21 ବର୍ଷର ବିଜେଡି ସରକାରଙ୍କ ଶାସନର ଅପାରଗତାକୁ ଗାଁ ଗାଁରେ ଲୋକଙ୍କ ନିକଟରେ ପହଞ୍ଚାଇ ମୋଦି ସରକାରଙ୍କ ମାଳମାଳ ଜନ କଲ୍ୟାଣକାରୀ ଯୋଜନାକୁ କିଭଳି ଗ୍ରାମାଞ୍ଚଳର ସମସ୍ତ ଜନସାଧାରଣଙ୍କ ପାଖରେ ପହଞ୍ଚି ପାରିବ, ସେନେଇ ସମସ୍ତ କର୍ମୀମାନେ ବ୍ରତରୂପେ ପାଳନ କରିବାକୁ ନିଜ ଭାଷଣ ମାଧ୍ୟମରେ ଉଦବୋଧନ ଦେଇଛନ୍ତି । ପୂର୍ବତନ ସମବାୟ ମନ୍ତ୍ରୀ ତଥା ରଣପୁର ନିର୍ବାଚନ ମଣ୍ଡଳୀର ପୂର୍ବତନ ବିଧାୟିକା ସୁରମା ପାଢ଼ୀ, ନୟାଗଡ ଜିଲ୍ଲା ସମ୍ପାଦକ ତାପସ ରଞ୍ଜନ ମାର୍ଥାଙ୍କ ସମେତ ଭାରତୀୟ ଜନତା ପାର୍ଟିର ଶତାଧିକ କର୍ମୀମାନେ ସମ୍ମିଳନୀ କରି ନିର୍ବାଚନ ପାଇଁ ରଣାଙ୍ଗନ ପ୍ରସ୍ତୁତ ହେଉଥିବା ନେଇ ସୂଚନା ଦେଇଛନ୍ତି ।
ତେବେ ବିଜେପି ଦଳ ପାଇଁ ସମ୍ବିତ ପାତ୍ର ସାଜିଛନ୍ତି ମୁଖ୍ୟ ପ୍ରଚାରକ । ସେପଟେ ଆଗାମୀ ପଞ୍ଚାୟତ ନିର୍ବାଚନରେ ବିଜେଡି ଏବଂ ବିଜେପି ମଧ୍ୟରେ ଜୋରଦାର ଲଢ଼େଇ ହେବା ନେଇ ଚର୍ଚ୍ଚା ହେଉଛି।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
