ନୟାଗଡ଼: ମୌଳିକ ସୁବିଧାରୁ ବଞ୍ଚିତ ନୟାଗଡ ଜିଲ୍ଲା ନୂଆଗାଁ ବ୍ଲକ ଅନ୍ତର୍ଗତ ଜାକେଡ଼ା ପଞ୍ଚାୟତ ଅଧିନରେ ଥିବା ସାନଜିରି ଗ୍ରାମର ଲୋକେ । ଏନେଇ ନୂଆଗାଁ ବିଡ଼ିଓ ପ୍ରମୋଦ କୁମାର ଦଳ ବେହେରା ଙ୍କୁ ଅଭିଯୋଗ କରିଛନ୍ତି ଗ୍ରାମବାସୀ । ସାନଜିରି ଆଦିବାସୀ ଗ୍ରାମରେ ୧୦୦ ରୁ ଉର୍ଦ୍ଧ୍ବ ଆଦିବାସୀ ଲୋକ ବସବାସ କରନ୍ତି l
ଜଙ୍ଗଲ ଜାତ ଦ୍ରବ୍ୟ ସଂଗ୍ରହ , ଖଲି ପ୍ରସ୍ତୁତ ଏବଂ ଦିନ ମଜୁରିଆ ଭାବେ କାର୍ଯ୍ୟ କରି ଏହି ଗ୍ରାମର ଲୋକମାନେ ପରିବାର ପ୍ରତି ପୋଷଣ କରିଥାନ୍ତି l ମାତ୍ର ଗ୍ରାମକୁ ପକ୍କା ରାସ୍ତା ଟିଏ ନଥିବା ଯୋଗୁଁ ଲୋକମାନେ ଜଙ୍ଗଲିଆ ରାସ୍ତାରେ ଯାତାୟାତ କରିଥାନ୍ତି l ଯାହାଫଳରେ ବର୍ଷା ଦିନେ ଏହି ଗ୍ରାମଟି ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଥାଏ l ରାସ୍ତା ଖରାପ ଯୋଗୁଁ ଆମ୍ବୁଲାନ୍ସ ସେବା କିମ୍ବା ଅନ୍ୟାନ୍ୟ ସ୍ବାସ୍ଥ୍ୟ ସେବା ପାଇବାରୁ ମଧ୍ୟ ଲୋକମାନେ ବଞ୍ଚିତ ହେଉଛନ୍ତି l
୬୦ ବର୍ଷ ଅତିକ୍ରାନ୍ତ ହୋଇଥିବା ବୟସ୍କ ବ୍ୟକ୍ତି ଏବଂ ମହିଳା ଭତ୍ତା ଏବଂ ଇନ୍ଦିରା ଆବାସ ଯୋଜନାରୁ ଅଧିକାଂଶ ଲୋକ ବଞ୍ଚିତ ହୋଇଛନ୍ତି l ଏଭଳି ଦୟନୀୟ ଅବସ୍ଥାରେ ଜୀବନ ବିତାଉଥିବା ଲୋକମାନେ ଏନେଇ ବିଡ଼ିଓଙ୍କୁ ଲିଖିତ ଅଭିଯୋଗ କରିଛନ୍ତି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
