ନୟାଗଡ଼: ନୂଆଗାଁ ବ୍ଲକ ମାଇଛେଳି ପଞ୍ଚାୟତ ସମ୍ପଡ଼ା ଠାରୁ କାଣିଗିରି ପର୍ଯ୍ୟନ୍ତ ଥିବା ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ରାସ୍ତା ମରଣଯନ୍ତା ପାଲଟିଛି l ଏହି ରାସ୍ତାରେ ଦୈନିକ ଶତାଧିକ ଲୋକେ ଯିବାଆସିବା କରିଥାନ୍ତି l ରାସ୍ତାର ଅବସ୍ଥା ଶୋଚନୀୟ ହୋଇପଡିଥିବାରୁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ସ୍ଥାନୀୟ ଲୋକେ ।
ଏହି ରାସ୍ତା କାମ 2013 ମସିହାରୁ ଆରମ୍ଭ ହୋଇ 2018 ମସିହାରେ ସରିଥିଲା l ନିର୍ମାଣର ମାତ୍ର 5 ବର୍ଷ ପରେ ରାସ୍ତାରୁ ପିଚୁ ଉଠିଯାଇ ରାସ୍ତା ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡିଛି । ଏହି ଖାଲଢିପ ରାସ୍ତାଦେଇ ପ୍ରତିଦିନ ଶହ ଶହ ଲୋକେ ବିପଦସଂକୁଳ ଅବସ୍ଥାରେ ଯାତାୟତ କରୁଛନ୍ତି ।
ସେହିପରି ରାସ୍ତା ଖରାପ ଥିବାରୁ ଗାଁକୁ ଜରୁରିକାଳୀନ ସେବା ଠିକ୍ ସମୟରେ ପହଞ୍ଚିପାରୁ ନ ଥିବା ଅଭିଯୋଗ ଆସିଛି । ଅନ୍ୟପଟେ ଯେଉଁ ଠିକାଦାର ରାସ୍ତାକାମ କରିଥିଲେ ତାଙ୍କସହ କୌଣସି ଯୋଗାଯୋଗ ହୋଇପାରୁ ନାହିଁ । ଫଳରେ ଦୀର୍ଘଦିନ ହେବ ରାସ୍ତାଟି ମରଣଯନ୍ତା ସଦୃଶ ପାଲଟିରହିଛି l ତେବେ ପ୍ରଶାସନ ଏଥିପ୍ରତି ତୁରନ୍ତ ଦୃଷ୍ଟିଦେଇ ରାସ୍ତାକାମ ସମ୍ପୂର୍ଣ୍ଣ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
