ନୟାଗଡ଼: ଆଜି ଶ୍ରାବଣର ତୃତୀୟ ସୋମବାର । ନୟାଗଡ଼ ଲଡୁବାବାଙ୍କ ନିକଟରେ ଦେଖିବାକୁ ମିଳିଛି ପ୍ରବଳ ଗହଳି । ଜିଲ୍ଲା ତଥା ଜିଲ୍ଲା ବାହାରୁ ଶତାଧିକ ଭକ୍ତମାନେ ଏଠାରେ କରିଛନ୍ତି ଜଳଲାଗି । ଓଡ଼ିଶା ପ୍ରାଚୀନ ସଂସ୍କୃତି, ପରମ୍ପରା ଭିତରେ ନୟାଗଡ଼ ଜିଲ୍ଲାର ସରଣକୁଳ ଲଡୁବାବାଙ୍କ ମହିମା ସେତିକି ପୁରୁଣା ଓ ଜନାଦୃତ ।
କିମ୍ବଦନ୍ତୀ କହେ, ପ୍ରଥମେ ନକୁଳ ସମ୍ପ୍ରଦାୟର ଲୋକେ ନକୁଳେଶଙ୍କୁ ପୂଜା କରୁଥିଲେ । ଲଡୁ ଗଉଡର ଗାଈ ସବୁଦିନ ନକୁଳେଶଙ୍କ ନିକଟରେ କ୍ଷୀର ଦେଇଯାଉଥିଲା । ଏହା ଜାଣିବା ପରେ ଲଡୁ ଗଉଡ ଗାଈ ଉପରେ ରାଗି ଯାଇ ଏକ କେନ୍ଦୁ ବାଡି ପ୍ରହାର ଆରମ୍ଭ କରିଥିଲା । ଏଥିରେ ଗାଈ ଚମକି ପଡ଼ି ସେଠାରୁ ଅନ୍ତର୍ଦ୍ଧାନ ହୋଇଯାଇଥିଲେ । ତେବେ ଏହି ସମୟରେ ଗାଈର ଖୁରା ସେହି ପଥର ଉପରେ ପଡି ଖଣ୍ଡିଆ ହୋଇଥିଲା ଓ ପଥର ଦେହରୁ ରକ୍ତ ସ୍ରାବ ହୋଇଥିଲା । ଘଟଣା ବିଷୟରେ ରାଜାଙ୍କୁ ସ୍ବପ୍ନ ଦେଶା ମିଳେ, ଲଡୁ ଗାଈ ବିଷୟରେ । ଏହା ପରେ ଲଡୁ ଗଉଡ ସମସ୍ତ ଘଟଣା ରାଜା ଆଗରେ ପ୍ରକାଶ କରିବା ପରେ ସେହି ସ୍ଥାନରେ ଏକ ମନ୍ଦିର ନିର୍ମାଣ ହୋଇଥିଲା ।
ଆଉ ଏହା ପରେ ନକୁଳେଶ ଠାକୁର ଲଡୁବାବା ହୋଇ ଜଗତ ବିଖ୍ୟାତ ହେଲେ ।
ତେବେ ବିଶ୍ବାସ ରହିଛି ଏଠାରେ ମାନସିକ ରଖିଲେ ମନସ୍କାମନା ପୂର୍ଣ୍ଣ ହୋଇଥାଏ । ତେଣୁ ପ୍ରତି ବର୍ଷ ଶହଶହ ଶ୍ରଦ୍ଧାଳୁ ଏଠାକୁ ଆସି ବାବାଙ୍କ ଉପରେ ଜଳାଭିଷେକ କରିଥାନ୍ତି । ରାଜ୍ୟର ଅନ୍ୟ ଶୈବ ପୀଠମାନଙ୍କ ମଧ୍ୟରେ ଏହି ପୀଠର ସ୍ବତନ୍ତ୍ର ସ୍ଥାନ ରହିଛି ।
ନୟାଗଡରୁ ଉତ୍ପଳ ସାହୁ, ଇଟିଭି ଭାରତ
