ନୟାଗଡ଼: ପାନ ଦୋକାନରେ ମଦ ବେପାର । ନୟାଗଡ଼ ଜିଲ୍ଲା ଇଟାମାଟି ଥାନା ଅନ୍ତର୍ଗତ ହରେକୃଷ୍ଣପୁର ଗ୍ରାମରେ ଜଣେ ବ୍ୟକ୍ତି ପାନ ଦୋକାନରେ ବେଆଇନ ଭାବେ ମଦ ବିକ୍ରି କରୁଥିଲା । ଶୁକ୍ରବାର ପୋଲିସ ଖବର ପାଇ ଦୋକାନରେ ଚଢ଼ାଉ କରି 22ଲିଟର 140ଏମ୍ଏଲ ମଦ ଜବତ କରିଛି । ଏହାସହ ଅଭିଯୁକ୍ତ ପାନ ଦୋକାନୀ କୃଷ୍ଣଚନ୍ଦ୍ର ମହାନ୍ତିକୁ ଗିରଫ କରି କୋର୍ଟ ଚାଲଣ କରିଥିବା ଥାନା ଅଧିକାରୀ ଦୀପକ ଖଣ୍ଡାୟତ ସୂଚନା ଦେଇଛନ୍ତି ।
ସୂଚନା ଅନୁଯାୟୀ, ଇଟାମାଟି ଥାନା ଅନ୍ତର୍ଗତ ହରେକୃଷ୍ଣପୁର ଗ୍ରାମରେ ଦୀନବନ୍ଧୁ ମହାନ୍ତିଙ୍କ ପୁଅ କୃଷ୍ଣଚନ୍ଦ୍ରଙ୍କର ଏକ ପାନ ଦୋକାନ ରହିଛି । ସେ ତାଙ୍କ ଦୋକାନରେ ବେଆଇନ ଭାବେ ମଦ ବିକ୍ରି କରି ଆସୁଥିଲେ । ଏନେଇ ପୋଲିସ କୌଣସି ବିଶ୍ବସ୍ତ ସୂତ୍ରରୁ ଖବର ପାଇଥିଲା । ଏହାପରେ ପୋଲିସ ଶୁକ୍ରବାର ଉକ୍ତ ପାନ ଦୋକାନ ଉପରେ ଚଢ଼ାଉ କରିଥିଲା । ଘଟଣାସ୍ଥଳରୁ 123 ଟି 180 ଏମ୍ଏଲ୍ ମଦ ବୋତଲ ଜବତ କରାଯାଇଛି । ଏଥିମଧ୍ୟରେ ବିଭିନ୍ନ ବ୍ରାଣ୍ଡର ସମୁଦାୟ 22 ଲିଟର 140 ଏମ୍ଏଲ୍ ମଦ ରହିଛି । ଏହାସହ ଅଭିଯୁକ୍ତକୁ ଗିରଫ କରାଯାଇ କୋର୍ଟ ଚାଲଣ କରାଯାଇଥିବା ଥାନା ଅଧିକାରୀ ଦୀପକ ଖଣ୍ଡାୟତଙ୍କ ପକ୍ଷରୁ ସୂଚନା ମିଳିଛି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
