ନୟାଗଡ଼: ଜିଲ୍ଲାର ଦଶପଲ୍ଲାରେ ANM ଛାତ୍ରୀଙ୍କୁ ଚାକିରୀରୁ ଛଟେଇ କରାଯାଇଛି । ଏହାର ପ୍ରତିବାଦରେ ସିଡିଏମଓ (CDMO)ଙ୍କ ଦ୍ବାରସ୍ଥ ହୋଇଛନ୍ତି ଛଟେଇ ହୋଇଥିବା ଛାତ୍ରୀ । ଛାତ୍ରୀମାନେ ସିଡିଏମଓଙ୍କୁ ଅଭିଯୋଗ ପତ୍ର ପ୍ରଦାନ କରି ପୁନଃ ନିଯୁକ୍ତି ପାଇଁ ଦାବି କରିଛନ୍ତି ।
କୋରୋନା ଭଳି ମହାମାରୀ ସମୟରେ ନିଜ ଜୀବନକୁ ବାଜି ଲଗାଇ ଛାତ୍ରୀମାନେ ରୋଗୀଙ୍କ ସେବା କରିଥିଲେ । ଟୀକାକରଣରେ ସାମିଲ ହୋଇ ଏହାକୁ ତ୍ବରାନ୍ବିତ କରିଥିଲେ । ହେଲେ ସେମାନଙ୍କୁ ବିନା କାରଣରେ ଚାକିରୀରୁ ଛଟେଇ କରିଦିଆଯାଇଥିବା ଅଭିଯୋଗ ହୋଇଛି l ଦଶପଲ୍ଲା ଅଞ୍ଚଳର ଏକ ଆଉଟ ସୋରସିଂ ସଂସ୍ଥାକୁ ନିଯୁକ୍ତି ପ୍ରଦାନ ପାଇଁ ଦାୟିତ୍ବ ଦିଆଯାଇଛି ।
କିନ୍ତୁ ଏହି ସଂସ୍ଥା ନିଯୁକ୍ତିରେ ଅନିୟମିତତା କରିଥିବା ଅଭିଯୋଗ ହୋଇଛି l ମେଧାବୀ ଅଭିଜ୍ଞ ଛାତ୍ରୀଙ୍କୁ ନିଯୁକ୍ତି ନ ଦେଇ ଟଙ୍କା ଦେଇଥିବା ଛାତ୍ରୀଙ୍କୁ ନିଯୁକ୍ତି ଦିଆଯାଇଥିବା ଅଭିଯୋଗ ହୋଇଛି । ଏହାର ପ୍ରତିବାଦ ଏବଂ ପୁନଃ ନିଯୁକ୍ତି ପାଇଁ ଅଭିଯୋଗପତ୍ର ନୟାଗଡ଼ ସିଡ଼ିଏମଓଙ୍କୁ ପ୍ରଦାନ କରାଯାଇଛି । ଏଥିପ୍ରତି ଦୃଷ୍ଟି ଦେଇ ଏଏନଏମ ଛାତ୍ରୀଙ୍କୁ ପୁନଃ ନିଯୁକ୍ତି ଦେବାକୁ ଦାବି ହୋଇଛି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
