ନୟାଗଡ଼: ଦିବ୍ୟାଙ୍ଗ ପୁଅର ସହାୟତା ପାଇଁ ସରକାରଙ୍କୁ ଆକୁଳ ନିବେଦନ କରିଛନ୍ତି ଅସହାୟ ବାପା ।
ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ଡିହଗାଁ ମାଳିସାହିରେ ରୁହନ୍ତି ୧୬ ବର୍ଷୀୟ ଦିବ୍ୟାଙ୍ଗ ରିତେଶ ରଣା l ପିଲାଟି ଦିନରୁ ସେ ମା ଛେଉଣ୍ଡ l ଦୁଃଖ ବୁଝିବାକୁ କେହି ନାହାଁନ୍ତି l ବାପା ପ୍ରମୋଦ ରଣା ତାଙ୍କ ପାଇଁ ବାପା ଓ ମା ।
ତେବେ ପ୍ରମୋଦଙ୍କ ଆଉ ଦୁଇଟି ନାବାଳକ ପୁଅ ଅଛନ୍ତି l ସରକାରଙ୍କ ତରଫରୁ ମିଳୁଥିବା ଭିନ୍ନକ୍ଷମ ଭତ୍ତା ୭୦୦ ଟଙ୍କା ଏବଂ ରାସନ କାର୍ଡ଼ରେ ମିଳୁଛି ୫ କେଜି ଚାଉଳ ଯାହା ସମୁଦ୍ରକୁ ଶଙ୍ଖେ l ଦିବ୍ୟାଙ୍ଗ ପୁଅର ଦେଖାଶୁଣା କରିବାକୁ କେହି ନଥିବାରୁ ପ୍ରମୋଦଙ୍କୁ ଅନ୍ୟ କୌଣସି ସ୍ଥାନକୁ ଯାଇ ଦୁଇ ପଇସା ରୋଜଗାର କରିବା ସମ୍ଭବ ହେଉନି l
ଏଭଳି ସ୍ଥିତିରେ କଷ୍ଟ ଯନ୍ତ୍ରଣା ମଧ୍ୟରେ ବିତୁଛି ପ୍ରମୋଦ ରଣାଙ୍କ ଜୀବନ l ଏପଟେ ଦିବ୍ୟାଙ୍ଗ ପୁଅର ଚିକିତ୍ସା ପାଇଁ ଅର୍ଥ ଆବଶ୍ୟକ l ଏଣୁ ସରକାର ପୁଅର ଚିକିତ୍ସା ପାଇଁ ଦୃଷ୍ଟି ଦେବାକୁ ନିବେଦନ କରିଛନ୍ତି ଅସହାୟ ବାପା l
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
