ନୟାଗଡ:ନିଶବ୍ଦ ଥିଲା ରାତି, ପାୱାର କଟ୍ ମଧ୍ୟରେ ଥାନାରେ ଚାଲିଥିଲା ସରକାରୀ କାମ । ହଠାତ୍ ଶୁଭିଲା ଗୁଳିଗୋଳାର ଶବ୍ଦ, କେହି କିଛି ଭାବିବା ଆଗରୁ ମାଡି ଆସିଲେ 400 ରୁ 500 ସଶସ୍ତ୍ର ମାଓବାଦୀ ଆଉ ଟଳିପଡିଲେ 15 ପୋଲିସକର୍ମୀ । ସେହି ବିଭତ୍ସ ହତ୍ୟାକାଣ୍ଡକୁ ଆଜି 13 ବର୍ଷ ବିତିଯାଇଛି ହେଲେ ମନରେ ଏବେବି ସତେଜ ଅଛି ସେଦିନର ଲୋମହର୍ଷଣକାରୀ ରାତି । 2008 ଫେବୃଆରୀ 15, ନୟାଗଡ ପାଇଁ ଥିଲା କାଳରାତି । ଏକାକାଳିନ 6ଟି ସ୍ଥାନରେ ମାଓବାଦୀ ରଚିଥିଲେ ହତ୍ୟାକାଣ୍ଡର ତାଣ୍ଡବ । ଶୁଣନ୍ତୁ ସେଦିନ 4ଟି ଗୁଳି ଖାଇଥିବା ମହିଳା କନେଷ୍ଟବଳ ପ୍ରତିମା ରାଉତଙ୍କ ମୁହଁରୁ ମାଓବାଦୀଙ୍କ ବିଭତ୍ସ କାହାଣୀ...
ରିଜର୍ଭ ଅଫିସ, ନୟାଗଡ ଥାନା, ଅସ୍ତ୍ରାଗାର, ମହିପୁର ଫାଣ୍ଡି, ନୂଆଗାଁ ଓ ଦଶପଲ୍ଲା ଥାନାରେ ଏକାକାଳିନ ଆକ୍ରମଣ କରିଥିଲେ ମାଓବାଦୀ । ସମସ୍ତ ଅଞ୍ଚଳରେ ପାୱାର୍ କଟ୍ କରିବା ପରେ ଅନ୍ଧାରୁଆ ରାତିରେ ଥାନା ଉପରେ ଆଖିବୁଜା ଗୁଳି ବର୍ଷା କରିଥିଲେ । ଅସ୍ତ୍ରାଗାର ଭିତରେ ପଶି ଲୁଟିନେଲେ ଶହ ଶହ ଅସ୍ତ୍ରଶସ୍ତ୍ର । ରାତି ପାହିଲା ବେଳକୁ ଜଳୁଥିଲା ଥାନା । 15 ପୋଲିସ କର୍ମୀଙ୍କ ସମେତ ଜଣେ ସାଧାରଣ ଲୋକର ମୃତଦେହ ପଡି ରହିଥିଲା ଓ 5 ଜଣରୁ ଊର୍ଦ୍ଧ୍ବ ଆହତ ତଳେ ପଡି ହେଉଥିଲେ ଛଟପଟ୍ । ରାଜ୍ୟରେ ସୃଷ୍ଟି ହୋଇଗଲା ଆଲୋଡନ । ସେତବେଳକୁ ନୟାଗଡ ଇତିହାସରେ ଲେଖା ସରିଥିଲା ମାଓବାଦୀଙ୍କ ଗୁଳିକାଣ୍ଡ କାହାଣୀ ।
ନୟାଗଡ ପୋଲିସ ଓ କ୍ରାଇମବ୍ରାଞ୍ଚ ମାମଲାର ତଦନ୍ତ କରି 13 ଜଣଙ୍କୁ ଗିରଫ କରିଥିଲା କିନ୍ତୁ ପ୍ରମାଣ ଅଭାବରୁ ନିର୍ଦ୍ଦୋଶରେ ଖଲାସ ହୋଇଗଲେ 6 ଅଭିଯୁକ୍ତ । ଆଉ ଜଣେ ମାନସିକବିକାରଗସ୍ତ ଅଭିଯୁକ୍ତର ବିଚାରଧିନ ଅବସ୍ଥାରେ ହିଁ ମୃତ୍ୟୁ ହୋଇଥିଲା । ଘଟଣାରେ 2 ଜଣଙ୍କୁ ଛାଡିଦେଲେ ବାକି ସମସ୍ତେ ନିର୍ଦ୍ଦୋଶରେ ଖଲାସ ହୋଇଗଲେଣି । ତେବେ ଘଟଣାର ମୁଖ୍ୟ ଅଭିଯୁକ୍ତ ମାଓ ନେତା ସବ୍ୟସାଚି ପଣ୍ଡା ଏବେ ବି ଜେଲରେ ଅଛି ।
ନୟାଗଡରୁ ଜୟେନ୍ଦ୍ର ବେହେରା, ଇଟିଭି ଭାରତ
