ନବରଙ୍ଗପୁର: କାଜୁବାଡରୁ ମୁର୍ମୁଷ ଅବସ୍ଥାରେ ଯୁବତୀ ଉଦ୍ଧାର। ଘଟଣାକୁ ନେଇ ଯୁବତୀଙ୍କ ମା ଦୁଷ୍କର୍ମ ହୋଇଥିବା ସନ୍ଦେହ କରିଛନ୍ତି l ଶୁକ୍ରବାର ତେନ୍ତୁଳୀଖୁଣ୍ଟି ଥାନା ଅନ୍ତର୍ଗତ କଙ୍ଗରା ଗ୍ରାମର ଏକ କାଜୁ ବାଡ଼ରୁ ଜଣେ 22 ବର୍ଷୀୟ ଯୁବତୀ ମୁର୍ମୁଷୁ ଅବସ୍ଥାରେ ପଡ଼ିଥିଲେ। ଖବର ପାଇ ପରିବାର ଉଦ୍ଧାର କରି ନବରଙ୍ଗପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ l
ପିଡିତାର ମୁଣ୍ଡରେ ଓ ବେକରେ ଗଭୀର ଆଘାତ ଲାଗିଥିବା ଦେଖିବାକୁ ମିଳିଛି l ପିଡିତା ଜଣକ କଥା କହିବାର ପରିସ୍ଥିତିରେ ନଥିବାବେଳେ, ତା ମାଆ କିନ୍ତୁ ଯୁବତୀଙ୍କୁ ଦୁଷ୍କର୍ମ କରାଯାଇ ହତ୍ୟା କରିବାକୁ ଚେଷ୍ଟା କରାଯାଇଥିବା ସନ୍ଦେହ କରିଛନ୍ତି l
ସମ୍ପୃକ୍ତ ଯୁବତୀ କିମ୍ବା ପରିବାର ଲୋକେ କିଛି ମୁହଁ ଖୋଲି ନଥିବା ବେଳେ ଆଜି ଯୁବତୀର ମା ଙ୍କ ବୟାନ, ଘଟଣାଟିକୁ ଗୁରୁତ୍ବ ଦେଇଛି l ଶନିବାର ଯୁବତୀଙ୍କ ମା ନବରଙ୍ଗପୁର ଓ ତେନ୍ତୁଳୀଖୁଣ୍ଟି ପୋଲିସ ସମ୍ମୁଖରେ ମୌଖିକ ଭାବେ ଅଭିଯୋଗ କରିଛି l ଅଭିଯୋଗ ପାଇଲା ପରେ ପୋଲିସ ତତ୍ପରତା ଦେଖାଇ ଯୁବତୀକୁ ପଚରାଉଚରା କରୁଥିବା ଦେଖିବାକୁ ମିଳିଛି l
ଅନ୍ୟପଟେ ନବରଙ୍ଗପୁର ସମାଜସେବୀ କାଦମ୍ବିନୀ ତ୍ରିପାଠୀ ପୀଡିତ ଓ ତାର ପରିବାରକୁ ଭେଟି ଶୀଘ୍ର ନ୍ୟାୟ ପ୍ରଦାନ କରୁ ବୋଲି ଦାବି କରିଛନ୍ତି l ଯୁବତୀ ଜଣକ ସୁସ୍ଥ ହେବା ପରେ ହିଁ ପ୍ରକୃତ ଘଟଣା କଣ ହୋଇଛି ତାହା ଜଣାପଡିବ ବୋଲି ପୋଲିସ କହିଛି l
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
