ନବରଙ୍ଗପୁର: ପ୍ରେମକୁ ନେଇ ବେପାର । ଦଲାଲ ସାଜି ପ୍ରେମିକାକୁ ବିକ୍ରି କରିଦେଲା ପ୍ରେମିକ । ପ୍ରେମିକାକୁ ବିବାହର ପ୍ରତିଶୃତି ଦେଇ ଶାରୀରିକ ସମ୍ପର୍କ ରଖିବା ପରେ ଟଙ୍କା ଲୋଭରେ ଅନ୍ୟ ଜଣଙ୍କୁ ବିକ୍ରି କରିବାକୁ ପଛାଇଲା ନାହିଁ ପ୍ରେମିକ । ମାତ୍ର ୭୦ ହଜାର ଟଙ୍କାରେ ପ୍ରେମିକାକୁ ବିକ୍ରି କରିଦେବା ଅଭିଯୋଗ ଆସିଛି ନବରଙ୍ଗପୁର ଜିଲ୍ଲାରୁ । ଗତ ଦୁଇ ଦିନ ପୂର୍ବେ ନନ୍ଦାହାଣ୍ଡି ବ୍ଲକରେ ଜଣେ ଯୁବତୀଙ୍କୁ ୧୦ ହଜାର ଟଙ୍କାରେ ବିକ୍ରି କରିଥିବା ଘଟଣା ସାମ୍ନାକୁ ଆସିଥିବା ବେଳେ ଗତକାଲି ଏଭଳି ଆଉ ଏକ ଘଟଣା ଜିଲ୍ଲାରେ ଯୁବତୀ ବିକ୍ରି ରାକେଟ ସକ୍ରିୟ ଥିବା ଦିଗକୁ ଇଙ୍ଗିତ କରୁଛି ।
ଏହା ମଧ୍ୟ ପଢନ୍ତୁ:-ଯୁବତୀଙ୍କୁ 10 ହଜାର ଟଙ୍କାରେ ବିକ୍ରି ଅଭିଯୋଗ, କାର୍ଯ୍ୟନୁଷ୍ଠାନ ଦାବି କଲା BJP
ଅଭିଯୋଗ ଅନୁସାରେ, ପାପଡାହାଣ୍ଡି ବ୍ଲକର ଜଣେ ଯୁବତୀ କଳାହାଣ୍ଡି ଜିଲ୍ଲା ଗୋଲମୁଣ୍ଡାର ଜଣେ ଯୁବକଙ୍କ ସହିତ ସାକ୍ଷାତ ହୋଇଥିଲା । ଯୁବକ ଜଣଙ୍କ ସାଙ୍ଗ ହେବା ବାହାନାରେ ଯୁବତୀଙ୍କ ଫେସବୁକ ଆଇଡି ଓ ନମ୍ବର ନେଇଥିଲେ । ଏହାପରେ ଉଭୟଙ୍କ ମଧ୍ୟରେ ଆରମ୍ଭ ହୋଇଥିବା ପ୍ରେମ ସମ୍ପର୍କ । ପ୍ରେମିକ ଜଣଙ୍କ ଯୁବତୀଙ୍କ ଘରେ କେହି ନଥିବାର ସୁଯୋଗ ନେଇ ତାଙ୍କୁ ଜୋର ଜବରଦସ୍ତି ଉଠାଇନେଇଥିଲେ । ପରେ ରାଜ୍ୟ ତଥା ରାଜ୍ୟ ବାହାରେ ବିଭିନ୍ନ ସ୍ଥାନରେ ତାଙ୍କୁ ଧମକ ଦେଇ ଶାରୀରିକ ସମ୍ପର୍କ ରଖିଥିଲେ ।
ଏହାପରେ ଯୁବତୀ ଜଣଙ୍କୁ ନାଗପୁରକୁ ନେଇ ଲାଲା ନାମକ ଜଣେ ବ୍ୟକ୍ତିଙ୍କୁ ୭୦ ହଜାର ଟଙ୍କାରେ ବିକ୍ରି କରିଥିଲେ । ପରେ ଲାଲା ଉକ୍ତ ଯୁବତୀଙ୍କୁ ଜୋରଜବରଦସ୍ତି ଶାରିରୀକ ସମ୍ପର୍କ ରଖିଥିଲେ । ଏହାକୁ ବିରୋଧ କରିଥିଲେ ଯୁବତୀ । ଏହାସହ ତାଙ୍କୁ ଛାଡି ଦେବାକୁ ଅନୁରୋଧ କରିଥିଲେ । ପରେ ଯୁବତୀ ଜଣକ ଛାଡିବାକୁ କାକୁତି ମିନତି ହେବାରୁ ଯଦି ଭୂମି ଦିଦି କହିଲେ ତା ଘରକୁ ଛାଡି ଦେବି କହିଥିଲେ ଲାଲା ।
ଘଟଣା କ୍ରମେ ଏକ ମାରୱାଡି ଦମ୍ପତି ସେହି ମହିଳା ନିକଟରେ ୭୦ ହଜାର ଟଙ୍କା ଦେଇ ଯୁବତୀକୁ ଉଦ୍ଧାର କରିଥିଲେ । ଯୁବତୀ ଜଣକ କୌଶଳ କ୍ରମେ ନବରଙ୍ଗପୁର ମା ଘର ଶାଖାର ଅଧ୍ୟକ୍ଷା କାଦମ୍ବିନୀ ତ୍ରିପାଠୀଙ୍କ ସହାୟତା ରେ ସେଠାରୁ ଉଦ୍ଧାର ହୋଇଥିଲେ । ଓ ନିଜ ଘରକୁ ଫେରିଥିବା ପ୍ରକାଶ କରିଛନ୍ତି । ନ୍ୟାୟ ପାଇଁ ପାପଡାହାଣ୍ଡି ଥାନାର ଦ୍ୱାରସ୍ଥ ହୋଇଛନ୍ତି ପୀଡ଼ିତା ଯୁବତୀ । ତେବେ ଏଠାରେ ପ୍ରଶ୍ନ ଉଠୁଛି ଘଟଣା ରେ ବାରମ୍ବାର ଉଠୁଥିବା ଭୂମି ନାମ୍ନୀ ମହିଳା ଜଣକ କିଏ । ଆଉ କିଏ ସେହି ମାରୱାଡୀ ଦମ୍ପତି ଯିଏ ୭୦ ହଜାର ଟଙ୍କା ଦେଇ ଏହି ଯୁବତୀଙ୍କୁ ଉଦ୍ଧାର କରିଥିଲେ । ଘଟଣାରେ ତାଙ୍କ ଭୂମିକା କଣ । କାହିଁକି ସେମାନେ ଏହି ଯୁବତୀ ଙ୍କ ସହାୟତା କରିଥିଲେ । ତାହା ବର୍ତ୍ତମାନ ରହସ୍ୟ ଘେରରେ ଚାଲିଆସିଛି ।
ନବରଙ୍ଗପୁରରୁ ତାପନ କୁମାର ବିଷୋୟୀ, ଇଟିଭି ଭାରତ
