ନବରଙ୍ଗପୁର: ବିଶ୍ୱାସ ଜିତିବା ପାଇଁ ଅନ୍ଧବିଶ୍ୱାସର ଆସ୍ଥା । ବିଜ୍ଞାନ ଯୁଗରେ ବି ସ୍ବପ୍ନାଦେଶକୁ ସଫଳ କରିବା ପାଇଁ ଘଞ୍ଚ ଜଙ୍ଗଲରେ ତପସ୍ୟା କରୁଛନ୍ତି ମହିଳା । ମା’ ବାସୁକିଙ୍କ ସ୍ବପ୍ନାଦେଶ ପରେ ଘଞ୍ଚ ଜଙ୍ଗଲରେ ୪ଦିନ ହେଲା ମାଙ୍କୁ ଆରଧନା କରୁଛନ୍ତି ନବରଙ୍ଗପୁରର ବାଲମତି । ନା କୌଣସି ଖାଦ୍ୟ ଗ୍ରହଣ କରୁଛନ୍ତି ନା ରାତିରେ ଶୋଉଛନ୍ତି । ଗତ ଶନିବାର ମହିଳା ଜଣଙ୍କ ସ୍ବପ୍ନରେ ଆସି ମା ବାସୁକି କହିଥିଲେ ସାତ ଦିନ ସାତ ରାତି ତପସ୍ୟାରେ ରହିଲେ ଭଗବାନଙ୍କ କୃପା ମିଳିବ । ଏହା ପରେ ରାତିଅଧରୁ ଉଠି ପାପଡାହାଣ୍ଡି ବ୍ଲକର ଧାମନାପଦର ଗ୍ରାମ ନିକଟସ୍ଥ ବାହାଲି ଜଙ୍ଗଲକୁ ଯାଇଥିଲେ ମହିଳା । ଏହା ପରେ ଆରମ୍ଭ କରିଥିଲେ ସାଧନା । ଭଗବାନଙ୍କୁ ଜଙ୍ଗଲର ଏକ ପାହାଡରେ ବସି ମା’ଙ୍କୁ ଆରଧନା କରୁଛନ୍ତି ମହିଳା ।
ମହିଳା ଜଣଙ୍କୁ ଏପରି ଅବସ୍ଥାରେ ଦେଖି ତାଙ୍କ ସ୍ବାମୀ ତାଙ୍କୁ ଜଙ୍ଗଲରେ ଜଗିରହିଥିବା ବେଳେ ଗ୍ରାମବାସୀ ମହିଳାଙ୍କୁ ଦେଖିବା ପାଇଁ ଭିଡ ଜମାଇବା ସହ ପୂଜାର୍ଚ୍ଚନା ମଧ୍ୟ କରୁଛନ୍ତି । ଏଥିସହ ଦକ୍ଷିଣା ମଧ୍ୟ ଦେଉଛନ୍ତି । ବାଲମତି ଖାଦ୍ୟ ଗ୍ରହଣ କରୁନଥିବା ବେଳେ କେବଳ ୨ ଚାମଚ କ୍ଷୀର ପିଇ ତପସ୍ୟା କରୁଛନ୍ତି । କାହାରି ସହ ମଧ୍ୟ କଥା ହେଉନାହାନ୍ତି । ବାଲମତିଙ୍କ ବିଶ୍ବାସ ମା’ଙ୍କୁ ଆରଧନା କଲେ କୃପା ମିଳିବା ପରେ ଲୋକଙ୍କ ସେବା କରିପାରିବେ । ଏ କଥା ସେ ସ୍ବପ୍ନାଦେଶ ପରେ ତାଙ୍କ ସ୍ବାମୀଙ୍କୁ କହିଥିଲେ ।
ବାଲମତିଙ୍କ ଘର ଦଳେଇଗୁଡ଼ା ଗ୍ରାମରେ ହୋଇଥିବା ବେଳେ ତାଙ୍କ ସ୍ବାମୀ ସିଙ୍ଗି ହରିଜନ ଗାଈ ଚରାଇ ପରିବାର ଚଳାନ୍ତି ଓ ବାଲମତି ଝଡ଼ା ଫୁଙ୍କା କରନ୍ତି । ତେବେ ଗତ ଶନିବାର ମଧ୍ୟ ରାତି ସମସ୍ତେ ଶୋଇଥିବା ବେଳେ କାହାରିକୁ କିଛି ନକହି ଘରୁ ବାହାରି ଯାଇଥିଲେ ସ୍ତ୍ରୀ ବାଲମତି ହରିଜନ । ସକାଳ ହେବା ପରେ ବାଲମତି ଘରେ ନଥିବା ଦେଖି ସ୍ୱାମୀ ସିଙ୍ଗି ଓ ଗ୍ରାମବାସୀ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ। ଖୋଜିବା ସମୟରେ ନିକଟସ୍ଥ ଧାମନାପଦର ଗ୍ରାମ ଠାରୁ କିଛି ଦୂରରେ ଥିବା ବାହାଲି ଜଙ୍ଗଲର ଏକ ଛୋଟିଆ ପାହାଡ଼ରେ ତପସ୍ୟାରତ ଅବସ୍ଥାରେ ବସିଥିବା ଦେଖିବାକୁ ପାଇଥିଲେ ।
ଜଙ୍ଗଲକୁ ଯାଇ ତପସ୍ୟା କଲେ ଭଗବାନଙ୍କ କୃପା ମିଳିବ ବୋଲି ଶନିବାର ରାତିରେ ସ୍ବପ୍ନାଦେଶ ହୋଇଥିବା ତପସ୍ୟାରତ ବାଲମତି ସ୍ବାମୀ ସିଙ୍ଗିଙ୍କୁ କହିଥିଲେ । ଭଗବାନଙ୍କ କୃପା ମିଳିବା ପରେ ବାଲମତି ଲୋକଙ୍କ ସେବା କରିପାରିବେ ବୋଲି ମଧ୍ୟ ସ୍ୱାମୀଙ୍କୁ କହିଥିଲେ ସ୍ତ୍ରୀ । ଯେଉଁଠୁ ଆରମ୍ଭ ହୋଇଯାଇଥିଲା ବାଲମତିଙ୍କ ସାଧନା । ତେବେ ଏହି ଖବର ପ୍ରସାରିତ ହେବା ପରେ ମହିଳାଙ୍କୁ ଦେଖିବା ପାଇଁ ଆଖପାଖ ଅଞ୍ଚଳର ଲୋକଙ୍କ ଭିଡ଼ ଜମିଛି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
