ନବରଙ୍ଗପୁର: ରାଇଘର ଅନ୍ତର୍ଗତ ଖୁଡୁକ ପଞ୍ଚାୟତର ଗାଇତାବେଡା ଗାଁରେ ଅଭାବନୀୟ ଘଟଣା । ବାରହା ଆକ୍ରମଣରେ ଜଣେ ଚତୁର୍ଥ ଶ୍ରେଣୀର ଛାତ୍ର ଗୁରୁତର ହୋଇଥିବା ସୂଚନା ମିଳିଛି । ଗୁରୁତର ବାଳକର ନାମ ଗୋବିନ୍ଦ ଗଣ୍ଡଙ୍କୁ ଉମରକୋଟ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୂଚନା ଅନୁସାରେ ଗାଇତାବେଡା ଗାଁ ଦୁଇଟି ବାଳକ ନିକଟରେ ଥିବା ଏକ ଜଙ୍ଗଲକୁ ଗାଈ ଚରାଇବାକୁ ଯାଇଥିଲେ । ହେଲେ ସେଠାରେ ହଠାତ୍ ଦୁଇଟି ବଣ ବାରହା ଆସି ଗୋବିନ୍ଦକୁ ଆକ୍ରମଣ କରିଥିଲା । ଏହି ଘଟଣା ପରେ ଅନ୍ୟଜଣେ ବାଳକ ସେଠାରୁ ଖସି ଆସି ତୁରନ୍ତ ଗୋବିନ୍ଦ ଘରେ ଖବର ଦେଇଥିଲା । ଘଟଣା ସମ୍ପର୍କରେ ଗୋବିନ୍ଦର ପରିବାର ଲୋକେ ଜାଣିପାରି ତୁରନ୍ତ ଜଙ୍ଗଲକୁ ଯାଇ ଗୋବିନ୍ଦକୁ ଉଦ୍ଧାର କରିଥିଲେ ।
ତେବେ ଗୁରୁତର ବାଳକର ପେଟ ଚିରି ଯାଇଥିବା ବେଳେ ପେଟ ଭିତରର କିଛି ଅଂଶ ବାହାରକୁ ବାହାରିଥିବା ଜଣାପଡିଛି । ଏହାସହ ଦେହର ବିଭିନ୍ନ ସ୍ଥାନରେ କ୍ଷତବିକ୍ଷତ ହୋଇଛି, ବର୍ତ୍ତମାନ ବାଳକ ଗୁରୁତର ଅବସ୍ଥାରେ ଉମରକୋଟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଛି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
