ନବରଙ୍ଗପୁର: ବିଦ୍ୟୁତ କର୍ମଚାରୀଙ୍କ ମୃତ୍ୟୁ ପରେ କ୍ଷତିପୂରଣ ଦାବିରେ ଗ୍ରାମବାସୀଙ୍କ ରାସ୍ତାରୋକ । କୋଷାଗୁମୁଡ଼ା ବ୍ଲକ ଭଣ୍ଡିଆ ଛକରେ ଶବ ରଖି ରାସ୍ତାରୋକ କରିଥିଲେ ଆନ୍ଦୋଳନକାରୀ । ଉଚିତ କ୍ଷତିପୂରଣ ସହ ମୃତକଙ୍କ ପରିବାରର ଜଣଙ୍କୁ ଚାକିରି ଦେବାକୁ ଦାବି ହୋଇଛି ।
ସୂଚନା ମୁତାବକ, ଗୁରୁବାର ସନ୍ଧ୍ୟାରେ ଛାଲିପେଟା ଗ୍ରାମରେ ଜଣେ ଅସ୍ଥାୟୀ ବିଦ୍ୟୁତ କର୍ମଚାରୀ ପୋଲରେ ଚଢି କାମ କରୁଥିବାବେଳେ ବିଜୁଳି ଆଘାତର ଶୀକାର ହୋଇଥିଲେ । ହଠାତ ବିଦ୍ୟୁତ ଚାର୍ଜ ହୋଇଯିବାରୁ ତଳେ ପଡି ବିଦ୍ୟୁତ କର୍ମଚାରୀ ମୋହନ କାତିଙ୍କ ମୃତ୍ୟୁ ହୋଇଥିଲା । ଏନେଇ ଗ୍ରାମବାସୀ ବିଦ୍ୟୁତ ବିଭାଗକୁ ଜଣାଇବା ପରେ ମଧ୍ୟ କୌଣସି ବିଭାଗୀୟ ଅଧିକାରୀ ଘଟଣା ସ୍ଥଳକୁ ଆସିନଥିବା ଆନ୍ଦୋଳନକାରୀ ଅଭିଯୋଗ କରିଛନ୍ତି । ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା ।
ଆଜି ଗ୍ରାମବାସୀ ଓ ପରିବାର ଲୋକେ ଶବକୁ ଆଣି କୋଷାଗୁମୁଡ଼ା ଓ ପାପଡାହାଣ୍ଡି ରାସ୍ତାର ଭଣ୍ଡିଆ ଛକ ନିକଟରେ ରଖି ରାସ୍ତାରୋକ କରିଥିଲେ । ଘଟଣା ସ୍ଥଳରେ କୋଡ଼ିଙ୍ଗା ପୋଲିସ ଓ ପାପଡାହାଣ୍ଡି ତହସିଲଦାର ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା କରିଛନ୍ତି । ବିଦ୍ୟୁତ ବିଭାଗର ଅଧିକାରୀ ପହଞ୍ଚି ଲୋକଙ୍କୁ ବୁଝାସୁଝା କରିବା ପରେ ପରିସ୍ଥିତି ଶାନ୍ତ ପଡିଛି । ପରିବାରର ଜଣକୁ ଚାକିରୀ ଓ ଦଶାହ କାର୍ଯ୍ୟ ପାଇଁ କିଛି ଆର୍ଥିକ ସାହାଯ୍ୟ ଏବଂ ରେଡକ୍ରସ ପାଣ୍ଠିରୁ 10 ହଜାର ଟଙ୍କା ଦେବାକୁ ପ୍ରତିଶ୍ରୁତି ମିଳିଥିବା ଜଣାପଡିଛି ।
ନବରଙ୍ଗପୁରରୁ ତପନ ବିଶୋୟୀ, ଇଟିଭି ଭାରତ
