ନବରଙ୍ଗପୁର : ଡାବୁଗାଁ ବ୍ଲକ ବଡ଼ ଓଲମା କ୍ଲୋଷ୍ଟର ଅନ୍ତର୍ଗତ ସାନ ଓଲମା ସରକାରୀ ଉନ୍ନୀତ ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବ ନେଇ ଗ୍ରାମବାସୀ ତାଲା ପକାଇଛନ୍ତି । ତେବେ ଅତିରିକ୍ତ ବ୍ଲକ ଶିକ୍ଷା ଅଧିକାରୀ ମହେଶ ଚନ୍ଦ୍ର ସାହା ଗ୍ରାମରେ ପହଞ୍ଚି ଶିକ୍ଷକ ଯୋଗାଇ ଦେବା ନେଇ ପ୍ରତିଶ୍ରୁତି ଦେବା ପରେ ଗ୍ରାମବାସୀ ସ୍କୁଲରୁ ତାଲା ଖୋଲିଥିଲେ। ସ୍କୁଲ୍ ତାଲା ବନ୍ଦ ରହିବାରୁ ମଧ୍ୟାହ୍ନ ଭୋଜନରେ ବାଧା ଉପୁଜିଥିବା ବେଳେ ସ୍କୁଲ ପିଲାଙ୍କୁ ପ୍ରଥମେ ବିସ୍କୁଟ ଦିଆଯାଇ ବିଳମ୍ବରେ ମଧ୍ୟାହ୍ନ ଭୋଜନ ରୋଷେଇ କରି ଦିଆଯାଇଥିଲା । ନୂତନ ଶିକ୍ଷକ ନିଯୁକ୍ତି ଦିଆଯିବ ବୋଲି ପ୍ରତିଶ୍ରୁତି ପରେ ଗ୍ରାମବାସୀ ତାଲା ଖୋଲିଥିଲେ ।
1957 ମସିହାରେ ସ୍ଥାପିତ ସାନ ଓଲମା ସରକାରୀ ଉନ୍ନୀତ ଉଚ୍ଚ ପ୍ରାଥମିକ ବିଦ୍ୟାଳୟ 52 ବର୍ଷରେ ପାଦ ଥାପିଥିବା ବେଳେ ସେହି ଅନୁପାତରେ ସ୍କୁଲର ଉନ୍ନତି ଘଟିନାହିଁ । ଏଠାରେ ପ୍ରଥମରୁ ଅଷ୍ଟମ ଶ୍ରେଣୀରେ 93 ଛାତ୍ରଛାତ୍ରୀ ପାଠ ପଡୁଥିବା ବେଳେ ଏଥିପାଇଁ ମାତ୍ର 2 ଜଣ ଶିକ୍ଷକ ନିଯୁକ୍ତି ହୋଇଛନ୍ତି । ସ୍ଥାୟୀ ପ୍ରଧାନ ଶିକ୍ଷକ ନଥିବା ବେଳେ ଜଣେ ସହକାରୀ ଶିକ୍ଷକ ପ୍ରଧାନ ଶିକ୍ଷକଙ୍କ ଦାୟିତ୍ଵ ତୁଲାଉଛନ୍ତି । ଜଣେ ଶିକ୍ଷକ ପ୍ରଥମରୁ ଅଷ୍ଟମ ଶ୍ରେଣୀ ଯାଏ ପିଲାଙ୍କୁ ପାଠ ପଢାଉଛନ୍ତି । ପ୍ରାୟ ବର୍ଷେ ତଳେ ଏହି ସ୍କୁଲରୁ ଜଣେ ଶିକ୍ଷକ ନବରଙ୍ଗପୁରକୁ ବଦଳି ହୋଇଥିଲେ । ସେହି ଦିନଠାରୁ ଏଠାରେ ମାତ୍ର ଦୁଇ ଜଣ ଶିକ୍ଷକ ଶିକ୍ଷାଦାନ କରୁଛନ୍ତି । ଆସନ୍ତାମାସରେ ଅର୍ଦ୍ଧବାର୍ଷିକ ପରୀକ୍ଷା ଆରମ୍ଭ ହେବାକୁ ଥିବାବେଳେ ଏହି ସ୍କୁଲରେ ଯଥା ଶୀଘ୍ର ଶିକ୍ଷା ନିଯୁକ୍ତି ଦିଆଯାଉ ବୋଲି ଗ୍ରାମବାସୀ ଗତ ଅକ୍ଟୋବର 30 ତାରିଖରେ ଡାବୁଗାଁ ବିଇଓଙ୍କୁ ଅଭିଯୋଗ ପତ୍ର ଦେଇଥିଲେ ଏବଂ ଅଭିଯୋଗ ପତ୍ରରେ ଶିକ୍ଷକ ନିଯୁକ୍ତି ଦିଆନଗଲେ ତାଲା ପକାଇବେ ବୋଲି ମଧ୍ୟ ଚେତାବନୀ ଦେଇଥିଲେ ।
ଗତ ଅକ୍ଟୋବର ମାସରେ ନବରଙ୍ଗପୁରଠାରେ ସାନ ଓଲମା ଗ୍ରାମବାସୀ ବିଦ୍ୟାଳୟ ଓ ଗଣ ଶିକ୍ଷା ବିଭାଗ ମନ୍ତ୍ରୀ ସମୀର ରଞ୍ଜନ ଦାସ, ଡାବୁଗାଁ ବିଧାୟକ ମନୋହର ରନ୍ଧାରୀଙ୍କୁ ମଧ୍ୟ ଶିକ୍ଷକ ଅଭାବ ନେଇ ଅଭିଯୋଗ ପତ୍ର ଦେଇଥିଲେ କିନ୍ତୁ ଶିକ୍ଷା ମନ୍ତ୍ରୀ, ଡାବୁଗାଁ ବିଧାୟକ ତଥା ବ୍ଲକ ଶିକ୍ଷା ଅଧିକାରୀ ଗ୍ରାମବାସୀଙ୍କ ଅଭିଯୋଗକୁ ଗୁରୁତ୍ବ ନଦେବାରୁ ଛାତ୍ରଛାତ୍ରୀଙ୍କ ଭବିଷ୍ୟତକୁ ଆଖି ଆଗରେ ରଖି ଗ୍ରାମବାସୀ ବାଧ୍ୟ ହୋଇ ସକାଳ 10ଟାରେ ସ୍କୁଲରେ ତାଲା ପକାଇଥିଲେ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
