ନବରଙ୍ଗପୁର: ମୋବାଇଲ ଚୋରି ଅଭିଯୋଗରେ ଯୁବକକୁ ଗାଁ ଦାଣ୍ଡରେ ହାତ ଗୋଡ ବାନ୍ଧି ଦିଆଗଲା ଦଣ୍ଡ । ଯାହାର ଫଟୋ ଏବେ ଭାଇରାଲ ହେବାରେ ଲାଗିଛି । ଏହି ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଡାବୁଗାଁ ଥାନା ଅନ୍ତର୍ଗତ ସିନ୍ଧିଭଟ୍ଟା ଗ୍ରାମରେ ।
ସୂଚନା ଅନୁଯାୟୀ ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ଥାନା ପଣ୍ଡୁଗୁଡା ପଞ୍ଚାୟତ ଅନ୍ତର୍ଗତ ପୁଜାରିଗୁଡ଼ା ଗ୍ରାମର ଜଣେ ଯୁବକ ସେହି ଗ୍ରାମର ଜଣଙ୍କ ମୋବାଇଲ ଚୋରି କରି ନେଇଥିଲା । ଏହା ପରେ ଯୁବକ ଜଣକ ସେହି ମୋବାଇଲ ନେଇ ତା ସ୍ତ୍ରୀ ସହ ତାଙ୍କ ସମ୍ପର୍କୀୟ ଘରକୁ ବୁଲିବାକୁ ଯାଇଥିବା ବେଳେ କୌଣସି ସୂତ୍ରରୁ ଖବର ପାଇ ମୋବାଇଲ ମାଲିକ ଗତ ୧୩ ନଭେମ୍ବର ଯୁବକଙ୍କ ଘରେ ପହଞ୍ଚିଥିଲେ । ସେହି ସମୟରେ ଚୋରି କରିଥିବା ଯୁବକର ସ୍ତ୍ରୀ ହାତରେ ମୋବାଇଲ ଥିଲା । ଏହା ଚୋରି ମୋବାଇଲ ବୋଲି ସେମାନେ କହିବା ସହ ଚୋରି କରିଥିବା ଯୁବକକୁ ଡାକିବାକୁ କହିଲେ ।
ମୋବାଇଲ ଚୋରି କରିଥିବା ଯୁବକ ଏ ସମ୍ପର୍କରେ ଜାଣିବା ପରେ ସେଠାରୁ ଖସି ଯିବାକୁ ଚେଷ୍ଟା କରିବା ସମୟରେ ଯୁବକକୁ କାବୁ କରି ଦୁଇ ଗୋଡ଼ ଓ ହାତ ବାନ୍ଧି ଗାଁ ଦାଣ୍ଡରେ ତାକୁ ନିସ୍ତୁକ ମାଡ଼ ମାରିଥିଲେ ଗ୍ରାମବାସୀ ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
