ଭୁବନେଶ୍ୱର: ଓଡ଼ିଶା ପାଇଁ ଗର୍ବ ପାଲଟିଛନ୍ତି ସୋନପୁରର ପୁଅ ରାଜ କିଶୋର ହୋତା । ବଲିଉଡରେ ସହ ନିର୍ଦ୍ଦେଶକ ଭାବେ ନିଜର ଜଲୱା ଦେଖାଇ ଦର୍ଶକଙ୍କୁ ଦେଇଛନ୍ତି ଅନେକ ହିଟ୍ ଫିଲ୍ମ । ପିଲାଦିନରୁ ଫିଲ୍ମ ଇଣ୍ଡଷ୍ଟ୍ରିରେ କ୍ୟାରିଅର ଗଢିବାକୁ ଚାହୁଁଥିବା ରାଜ କିଶୋରଙ୍କ ସ୍ୱପ୍ନ ଏବେ ଧିରେ ଧିରେ ସାକାର ହେଉଛି । ନିକଟରେ ରିଲିଜ ହୋଇଥିବା ଫିଲ୍ମ 'ଭୁଲ ଭୁଲେୟା 3' ଭଳି ଫିଲ୍ମରେ ସହ-ନିର୍ଦ୍ଦେଶନା ଦେଇ ଜିଲ୍ଲା ଏବଂ ରାଜ୍ୟ ପାଇଁ ଗୌରବ ଆଣିଛନ୍ତି ରାଜ କିଶୋର ହୋତା । ନଭେମ୍ୱର 1ରେ ରିଲିଜ ହୋଇଥିବା ଏହି ଫିଲ୍ମ ଲୋକଙ୍କ ମନ ଜିତୁଥିବା ବେଳେ ବକ୍ସ ଅଫିସରେ ବମ୍ପର କଲେକ୍ସନ ମଧ୍ୟ କରୁଛି । ଓଡ଼ିଆ ପୁଅ ରାଜ କିଶୋରଙ୍କ ବଲିଉଡ ଯାତ୍ରାର ସଂଘର୍ଷ କିପରି ରହିଥିଲା । ଇଟିଭି ଭାରତର ସ୍ୱତନ୍ତ୍ର ସାକ୍ଷାତକାରରେ ଅନୁଭୂତି ବଖାଣିଛନ୍ତି ରାଜ କିଶୋର ।
'ଭୁଲ ଭୁଲେୟା 3' କୁ ନେଇ ପ୍ରତିକ୍ରିୟା ରଖିଲେ ରାଜ କିଶୋର ହୋତା
'ଭୁଲ ଭୁଲେୟା 3' କୁ ନେଇ ପ୍ରତିକ୍ରିୟା ଦେଇ ରାଜ କିଶୋର କହିଛନ୍ତି, ‘ମୋର ସ୍ୱପ୍ନ ପୂରଣ ହୋଇଛି । 'ଭୁଲ ଭୁଲେୟା' ପ୍ରାଞ୍ଚାଇଜର ମୁଁ ଗୋଟେ ଅଂଶ ହୋଇପାରିଛି । ଏହା ମୋ ପାଇଁ ଏକ ସ୍ୱପ୍ନ ଥିଲା । ଯାହା ପୂରଣ ହୋଇଛି କହିବି । ମୁଁ ଏହି ଫିଲ୍ମର ପ୍ରଥମ ଭାଗ ଦେଖି ବଡ଼ ହୋଇଥିଲି । ଏବେ ମୁଁ ଏଥିରେ କାମ କରି ବହୁତ ଭଲ ଲାଗିଲା । ଫିଲ୍ମର ନିର୍ଦ୍ଦେଶକ ଅନିସ ବାଜମି ସାରଙ୍କ ସହ କାମ କରି ମୁଁ ବହୁତ ଖୁସି ଏବଂ ତାଙ୍କ ଠାରୁ ମୁଁ ବହୁତ କିଛି ଶିଖିଛି । ଏହି ଫିଲ୍ମରେ କାମ କରିବାର ଅଭିଜ୍ଞତା ବହୁତ ଭଲ ଥିଲା । ମୁଁ ଜଣେ ଓଡ଼ିଆ ପୁଅ ଭାବେ ହିଟ୍ ଫିଲ୍ମରେ କାମ କରି ବେଶ ଖୁସି । ମୋତେ ଏବେ ଲାଗୁଛି ମୁଁ ଯେଉଁ ପରିଶ୍ରମ କରିଥିଲି ତାହାର ଫଳ ମିଳିଛି । କାରଣ ଲୋକେ ଫିଲ୍ମକୁ ବହୁତ ପସନ୍ଦ କରୁଛନ୍ତି । ମୁଁ ଗୋଟେ ଛୋଟ ଗାଁରୁ ଆସି ବଲିଉଡରେ ଯାତ୍ରା କରିଛି ଏବଂ ଫିଲ୍ମ ହିଟ ହୋଇଛି । ମୋତେ ବେଶ ଖୁସି ଯେ ମୁଁ ଏହି ଫିଲ୍ମର ଅଂଶ ହୋଇପାରିଛି ।’
'ବଲିଉଡ ଯାତ୍ରା ନଥିଲା ସହଜ'
ବଲିଉଡ ଯାତ୍ରା ନେଇ ପ୍ରତିକ୍ରିୟା ଦେଇ ରାଜ କିଶୋର କହିଛନ୍ତି, ''ମୁଁ ବଲିଉ଼ଡରେ 16 ବର୍ଷ କାମ କରିଛି । ମୁଁ 2008ରେ ମୁମ୍ୱାଇ ପହଞ୍ଚିଥିଲି । ଯାତ୍ରା ସହଜ ନଥିଲା ବହୁତ ସଂଘର୍ଷ ଥିଲା । ସେହି ସମୟରେ ମୁଁ ସିନମାଟାଗ୍ରାଫି ଭାବେ କ୍ୟାରିଅର ଆରମ୍ଭ କରିଥିଲି । ସେତେବେଳେ ଆସିଥିବା 'କାହାନୀ ଘର ଘର କି', 'ଉତ୍ତରନ', 'ବାଲିକା ବଧୂ' ଭଳି ଟିଭି ସିରିଏଲରେ ସିନେମାଟୋଗ୍ରାଫି ଭାବେ କାମ ଆରମ୍ଭ କରିଥିଲି । ପରେ 2010 ରେ 'I Am Kalam' ଫିଲ୍ମ ସହ ମୁଁ ନିର୍ଦ୍ଦେଶନାରେ ଡେବ୍ୟୁ କରିଥିଲି । ମୁଁ ନିର୍ଦ୍ଦେଶକ ନୀଳମାଧବ ପଣ୍ଡାଙ୍କ ସହ ମୋର ଏହି ପ୍ରଥମ ଫିଲ୍ମ କରିଥିଲି । ସାରଙ୍କଠୁ ମୁଁ ବହୁତ କିଛି ଶିଖିଛି । ଏହା ପରେ ମୋର ନିର୍ଦ୍ଦେଶନାରେ ଯାତ୍ରା ଆରମ୍ଭ କରିଛି । ମୁଁ ଆୟୁଷ୍ମାନ ଖୁରାନାଙ୍କ ଫିଲ୍ମ 'ଡ୍ରିମ ଗାର୍ଲ 2' କରିଥିଲି । ଏହା ପରେ ଏବେ 'ଭୁଲ ଭୁଲେୟା 3' ରେ କାମ କରିଛି । ଆଗକୁ ମୋତେ ଅକ୍ଷୟ କୁମାର, ଅଜୟ ଦେବଗନଙ୍କ କାମ କରିବାର ଇଚ୍ଛା ଅଛି ।''
ରାଜ୍ୟ ପୁରସ୍କାର ନେଇ ଏମିତି କହିଲେ ରାଜ କିଶୋର
ନିକଟରେ 'ହକି' ଉପରେ ନିର୍ମିତ ଏକ ଫିଲ୍ମକୁ ନେଇ ଶ୍ରେଷ୍ଠ ନିର୍ଦ୍ଦେଶକ ଆୱାର୍ଡ ପାଇଛନ୍ତି । ଏହା ପ୍ରଥମ ଡକ୍ୟୁମେଣ୍ଟାରି ଫିଲ୍ମ ଯାହା ହଟଷ୍ଟାରରେ ରିଲିଜ ହୋଇଥିଲା । ଏହି ଫିଲ୍ମ ମହିଳା Empowerment ଉପରେ ନିର୍ମିତ ଯାହା ଏକ ସତ ଘଟଣା ଉପରେ ଆଧାରିତ । ଯାହା ବେଶ ସୁନ୍ଦର ହୋଇଛି । ବର୍ତ୍ତମାନ ନୂଆ ସରକାରରେ ରାଜ୍ୟ ପୁରସ୍କାର ପ୍ରଦାନ କରାଯାଉଥିବାରୁ ଆମେ ବେଶ ଖୁସି । ମୁଁ ସରକାରଙ୍କୁ ଅନୁରୋଧ ମଧ୍ୟ କରିବି ଯେ ସେହି ଆଦିବାସୀ ପିଲାଙ୍କ ପାଇଁ କରନ୍ତୁ ।
ଏହା ମଧ୍ୟ ପଢନ୍ତୁ: 'ଭୁଲ ଭୁଲେୟା 3'ରେ ଓଡ଼ିଆ ପୁଅ ରାଜ କିଶୋରଙ୍କ କମାଲ୍, ସହ-ନିର୍ଦ୍ଦେଶନା ଦେଇ ଏବେ ଚର୍ଚ୍ଚାରେ
'ଭଲ କଣ୍ଟେଣ୍ଟ ମିଳିଲେ ନିଶ୍ଟୟ କରିବି ଓଡ଼ିଆ ପିଲ୍ମ'
‘ଓଡ଼ିଶା ମୋର ମାତୃଭୂମି । ମହାପ୍ରଭୁ ଜଗନ୍ନାଥଙ୍କ କୃପାରୁ ମୁଁ ଗୋଟେ ଛୋଟ ଗାଁରୁ ଯାଇ ବଲିଉଡରେ ସଂଘର୍ଷ କରି ବଡ଼ ବଡ଼ ଷ୍ଟାରଙ୍କ ସହ ଫିଲ୍ମ କରିବା ମୋ ପାଇଁ ବହୁତ ବଡ଼ ଉପଲବ୍ଧି । ମୁଁ ଆଗକୁ ଚେଷ୍ଟା କରିବି ମୋ ପାଖକୁ ଯଦି ଭଲ କଣ୍ଟେଣ୍ଟ ଆସେ, ମନୋରଞ୍ଜନ ସହ କିଛି ସୋସିଆଲ ମେସେଜ ଥିବ । ତେବେ ମୁଁ ନିଶ୍ଚୟ ଫିଲ୍ମ କରିବି । କେମିତି ଗୋଟେ ଭଲ ଓଡ଼ିଆ ଫିଲ୍ମକୁ ନେଟପ୍ଲିକ୍ସ, ହଟଷ୍ଟାର ଭଳି ଓଟିଟି ପ୍ଲାଟଫର୍ମରେ ରିଲିଜ ହେବ ତାହା ଉପରେ ଧ୍ୟାନ ଦେବି । ’
କଳା ଜଗତରେ ପାଦ ରଖୁଥିବା ବ୍ୟକ୍ତିଙ୍କୁ ଏଭଳି ପରାମର୍ଶ ଦେଲେ ରାଜକିଶୋର:
'ଜରୁରୀ ନୁହଁ କି ସେ ଯାଇ ବଲିଉଡରେ କାମ କରିବ । ଆପଣଙ୍କ ପାଖରେ ଯଦି ଦକ୍ଷତା ଅଛି, କ୍ରିଏଟିଭିଟି ଅଛି ଏବଂ କଳା ଅଛି । ତେବେ ଓଡ଼ିଶାରେ ରହି ମଧ୍ୟ ଆପଣ ନିଶ୍ଚୟ ସଫଳତା ହାସଲ କରିପାରିବେ । ଭଲ ସିନେମା କରନ୍ତୁ । ଯାହା ଆପଣଙ୍କ ଜ୍ଞାନ ଅଛି ତାହା ଦେଖାନ୍ତୁ ।'
ଇଟିଭି ଭାରତ, ଭୁବନେଶ୍ୱର
