ନବରଙ୍ଗପୁର: କେନ୍ଦ୍ର ଗ୍ରାମୀଣ ବିକାଶ ଓ ପଞ୍ଚାୟତରାଜ ମନ୍ତ୍ରୀ ଗିରିରାଜ ସିଂ ଦୁଇ ଦିନିଆ ନବରଙ୍ଗପୁର ଗସ୍ତରେ ଅଛନ୍ତି । କେନ୍ଦ୍ରମନ୍ତ୍ରୀ ଗତକାଲି ସର୍କିଟ ହାଉସ ଠାରେ ପହଞ୍ଚିବା ପରେ ଜିଲ୍ଲା ଆରଡି, ଏଲଆର ଓ ପଞ୍ଚାୟତରାଜ ବିଭାଗର ଅଧିକାରୀମାନଙ୍କ ସହ ସମୀକ୍ଷା ବୈଠକ କରିଥିଲେ । କେନ୍ଦ୍ରୀୟ ଯୋଜନାର କାର୍ଯ୍ୟକାରିତା ଓ ତାହାର ସୁବିନିଯୋଗ ନେଇ ଆଲୋଚନା ହୋଇଥିଲା । ହେଲେ ବୈଠକରେ ବିଭାଗୀୟ ଅଧିକାରୀଙ୍କ ଠାରୁ ସନ୍ତୋଷଜନକ ଉତ୍ତର ନପାଇ ବିଗିଡି ଯାଇଥିଲେ କେନ୍ଦ୍ରମନ୍ତ୍ରୀ । ଏହାସହିତ ରାଜ୍ୟରେ ମନରେଗା ଯୋଜନାରେ ଶ୍ରମିକ ବଦଳରେ ମେସିନ କାମ କରୁଥିବାର ଅଭିଯୋଗ ପାଇଥିବା କହି ଅସନ୍ତୋଷ ବ୍ୟକ୍ତି କରିଥିଲେ ।
କେନ୍ଦ୍ରମନ୍ତ୍ରୀ ଅଭିଯୋଗ କରିଛନ୍ତି ଯେ, ଓଡ଼ିଶା ସରକାର କେନ୍ଦ୍ର ସରକାରଙ୍କ ସମସ୍ତ ଯୋଜନାକୁ ହାଇଜାକ କରି ନିଜସ୍ବ ଯୋଜନାର ଷ୍ଟିକର ମାରି ବାଃ ବାଃ ନେଉଛନ୍ତି । ବିଭିନ୍ନ ଯୋଜନାରେ କେନ୍ଦ୍ର ସରକାରଙ୍କ ଅର୍ଥ ହରିଲୁଟ କରି ବାଟମାରଣା କରାଯାଇଛି । ସବୁ ଯୋଜନାରେ ଦୁର୍ନୀତିର ଗନ୍ଧ ବାରି ହେଉଛି ବୋଲି ଗିରିରାଜ ସିଂ କହିଛନ୍ତି । ଆହୁରି ମଧ୍ୟ ସେ କହିଛନ୍ତି ଯେ, ମହିଳା ସ୍ବୟଂ ସହାୟକ ଗୋଷ୍ଠୀ ଜରିଆରେ ମହିଳାଙ୍କ ଆୟ ଦ୍ବିଗୁଣିତ ହୋଇଥିବା ନେଇ ରାଜ୍ୟ ସରକାର ଡିଣ୍ଡିମ ପିଟୁଛନ୍ତି । ହେଲେ ବାସ୍ତବରେ ମହିଳାମାନେ ମାସିକ ୧୦୦୦ ରୁ ୧୨୦୦ ଆଦାୟ କରୁଛନ୍ତି । ଏତିକି ଟଙ୍କାରେ କେମିତି ମହିଳା ପରିବାର ପ୍ରତିପୋଷଣ କରିପାରିବେ ବୋଲି ସେ ପ୍ରଶ୍ନ କରିଛନ୍ତି ।
